عمي دردي، يوخسا زمي دردي؟ - تبريزلي باي بک
بای بک، آذربايجان | آراگؤن, ۳-ي زومار آی , ۱۱۰۰۸ اینجی ایل, چولا ۰۲:۲۵ [گ.ؤ] | یازی و قوشوق
 |
. | سون گونلرده باش وئرن اولايلار و ميللي فعاللاري بير بيرينه شوبهه لي دوروما سالماغ اوچون يورودولن سيياستلرين اؤنو آلينماليدير. اته گينده داش اولانلار بلليديلر، هايلارين قاباغا آتانلار بلليديلر و ميللي دوشونجه ميزين يارانماسي و گوجلنمه سي اوچون چاليشانلاردا اورتاداديلار. آما، رئکلام گوجونه ماليک اولان ساتقينلارين چاباسي بلکي سويداشلاري جايديرسين و يا تاولاسين، آنجاق، هاميميز چاليشماليييق کي يارانان قارماشالي و ايفتيرا کاراکتئرلي دورومو ساکينلشديرک و ميللي ماراخلاريميزا اوستونلوک وئرمه گي بير گرک اولاراق قوروياق. |
آماج اويانماغديرسا، اونوندا شراييتلري اولماليدير. آما، هر دانيشانا آييلميش دئمک اولماز.
ايللردير کي آذربايجانين گونئييندا اويانيش هرکاتي گئدير. ايللردير بو هرکاتين باشسيز قالديغي، يئترسيز و قايناغسيز اولدوغو و گوجلو دوشونجه سيستئمي نين اولماديغين دئييب و گئنه ده دئييرم.
مع السف، ائله ايللردير کي آدلاري بيزدن اولانلارين سالديريسينا اوغراييرام. اولسون، آتالار دئميشکن، سسسيز قالانا اعتيراض ائديلمز! يا ساده دئسم اگر، ياتان تهلوکه سيزليکده اولار٫ يا اؤلر!
ماراخلي اولان بودور کي، ايچيمده هيسلريم دئيير کي، سالديريلار نقدر گوجلو اولسادا، دئمک سنين و دوشونجه وين اتکيسي وار. اتکيلي اولسادا، بو اتکي مثبتدير يا منفي، اونادا گله جک قرار وئره جک.
آذربايجاني گونئي و حتّی اونون قوزئي ايله بيرلشمه سي نين خولاصه ائتمکدن آجيغيم گه لر. آذربايجان سئنئرلاري داها گئنيشدير، بونو بيلمه يه ن و يا بيله رک سايمايان٫ بيزيم ميللي هرکاتيميزا لازيم دئييلدير.
تورپاغ بيزيمديرسه، يورد آذربايجان تورکونوندورسه، دئمک نه روسيه سي، نه فارس رئژيمي، نه گورجوستان، نه عراق و نه تورکيه سي بو تورپاغلاري منيمسه مه مه ليدير. تورکيه يه اولان يانليش اومودلاردان يولا چيخان فاناتيک آبتاللارين تپکيسي نه اولورسادا، آچيقجا دئييرم کي آدي گئدن اولکه لرين هاميسييلا لازيمي تارتيشمالار گئتمه ليدير.
هر زامان دئميشم کي، اوتوروب و تورپاغيميزين الدن گئتمه سين گؤزله مکدنسه، بيز باشقالارينا تورپاغ تهلوکه سي ياراتماليييق. يوخسا يوز ايللرده اولدوغو کيمين، گئنه بيزيم تورپاغلار داغيلاجاق و گئت-گئده آذربايجان تورکو محو ائديله جک.
اوزو يولا، مدني، قوناغسئور يا بئلنچي تاولاييجي لقبلرله بيزي قانديريبلار! قوناغ سئوديکده يوردوموزون ايشقالچيسينا بدل اولسا، بونا قوناغسئورليک مي دئييلر؟ بيزي اؤلدوروب قانيميزي ايچنلره يولداشليق ايشارتلري وئرمک، سيزجه عاغيللي و منطيقلي بير تپکيميدير؟
بونلار بيزيم گوجوموزون گؤسترگه سي يوخ، کي قورخوموزون و سياسي دونيادان گئري قالديغيميزين گؤسترگه سيدير.
بو گون مئهران باهارلي-دان بير مقاله اوخودوم. سون گونلرده يئنيدن گوندمه چيخان بايراغ مسئله سينه توخوناراق، او مسئله نين ياراتديغي تارتيشمالاردان موثبت قازانجلار الده اولوندوغون ساياراق، بئلنچي اولايلاردان داهادا يارارلي قازانماغ اوچون چاغريدا بولونوبدور.
سؤزو گئدن يازيدا اولانلار گرچک اولسادا، سايين باهارلي سهو اولاراق اونلارين اورتايا چيخماسين بايراغ مسئله سيندن زامانلاييبلار. آنجاق، ايللردير کي بو اؤنملي مسئله لري دؤنه دؤنه هر يازيمدا تيکرار ائده رک، اينانيلماز ايفتيرالارا و تهديتلره اوغراميشام.
جناب باهارلي-نين يازيسيندا اينجله ديگي قونولاردان، داها اؤنجه تابو (باره سينده دانيشماغ يا اعتيراض ائتمک ياساق اولان) اولانلارا ايشاره ائديب:
- گونئيين قوزئيدن آيري و اؤزل سياسي کيمليگه ماليک اولماسي،
- گونئي و قوزئيين بيربيري نين مسئله لرينه نه زامان و نئجه موداخيله ائتمه لري،
- گونئي آذربايجانين نئجه اولوشاجاغي (موستيقيلليگين نئجه الده اولونماسي)،
- ائلچي بئيين گونئيله باغلي گؤروشلري، دوغرو و يانليشلارين اينجلنمه يه آلينماسي،
- منيمسه مک و ديکتاتورچولوغون، اؤزلليکله گاموح فورماسيندا اولانلارين ديشلانماسي،
- فئدرالچيلارين ايري سورونلارين کيچيک گؤسترمه چابالاري و ميلتي چاش-باش سالمالاري، ايران مرکزلي دوشونجه و چابالاري، سيمبولا قارشي اولوب و اوندان قورخمالاري و بو داورانيشلارييلا سانکي ايرانچيديلار کيمي گؤستريشلري،
- سياسي آدلانان فعاللاريميزين تاريخي و سياسي بيلگيلري نين يوخ و يا چوخ آز اولدوغو، اسکي تاريخ و دئولتچيليکلريميزله تانيش اولماديقلاري و.س.
سيرالانان گرچکلر دوغرو اولسالاردا، بايراغ مسئله سي نين تارتيشيلماغا چيخاريلماسييلا اورتايا چيخماميشلار و ايللردير کي ان آزي منيم اؤز يازيلاريمدا يئر آليبلار.
ايلگينج اولان طرف بودور کي، جناب باهارلي نين يازديغي مقاله، منجه ايللر اؤنجه يازيلمالييدي آما، گئنه ده يئرلي و يارارليدير. آرزو ائديرم کي، بلکي قلمين ده ييشمه سيله باخيشلاري ده ييشن٫ آما گئنه آدلاري ميللي فعال اولانلاريندا ماراغين اؤزونه جلب ائتسين.
مئهران باهارلي؛
منده سيزين سؤزلرينيزي دئميشم آما، گونئي ايله قوزئيين آيري آيري ستاتوسلاري وار و ائله سيياستلريده بو سورج ايچينده آيري اولماليدير دئديم! منه دئديلر بؤلوجو، دئديلر وطن خائيني و ان الده اولان لقبسه اطلاعات مأمورو اولدو!
منده دئديم کي هر مسئله ده گونئي و قوزئي بيربيزينه گيرممه لي و يانليش اتکي بوراخماماليديلار، هله دئديم کي خاريجده کي لر اؤزلرين عاغيللي و هاقلي بيله رک، ايچريده کي لره باشليغ ائتممه ليديلر و آنلاماديقلاري دوروملارا نوسخه يازماماليديلار، منه گئنه ايفتيرالار وورولدي!
دئديم کي گونئيين موستقيل اولماسي اوچون، اؤنجه اؤزل و ميللي بير دوشونجه يارانماليدير، دئديم بو دوشونجه ده اولان اؤزلليکلردير کي بيزيم ميللي هرکاتيميزا يؤن وئرير، دئديم کي ميللي دوشونجه ده روحانيلرده اولماليديلار، کومونيستلرده و.س آما، مني ترس آنلايانلار دين ساواشي يارادير دييه سالديرديلار!
دئديم ائلچي بئي هر نقدرده داهي و عاليم اولسايدي، آذربايجاني قوراجاغ يا قورويا بيله جک سيياستچي دئييلدير، سؤزومون ايثباتي اورتادا، يانليش سيياستلر سونوجو اؤز حاکيمييتي دئوريلدي! دئديم کي ائلچي بئيين بوتؤو آذربايجان ايدياسيدير کي بيزه قوتسالدير، اونون شخصي داورانيشلاري و سياسي فعاليتي بيزلره قوتسال اولماماليدير! قوتسالليقدا سهو اولماماليدير، آما گؤروروک کي هامي اؤز ديلينده دئيير کي بئي سهوسيز دئييلدير! ي آما، منيم سؤزلريمي آنلامايان و يا آنلامامايا چاليشان شخصلر دئديلر آماندير ائلچي بئيه تؤوهين ائديلدي!
گاموح و اوندا باش وئرن سهولره ايللر اؤنجه توخوندوم، داغيلماسينا قارشي اولاراق، اونا ليدئرليک فورماسي و سياسي باخيشي نين ده ييشمه سيني اؤنرديم، حتّی در. ماهمودعلي چؤهرقانلي-يا آچيق مکتوب يازديم و اؤنرديم کي گاموح-اون گله جگين قارالاتمايين! او زامان گاموح موخاليفلري منيم اليمي اؤپمه يه قالخديلار، اونلار سانديلار کي منده اؤز شخصي قازانجلاريم اوچوندور کي گاموح-او تنقيد ائديرم، گاموح-چولارسا اولايلاردان قاچماغ اوچون سالديرييا گئچديلر، ايندي، داغيلميش بير گاموح، اوتانان گاموح-چولار، اوزدن گئتمه يه ن بير سيرا گاموح فاناتيکي، قارا گئچميش و سئوينن گاموح موخاليفلري اورتادا قاليب! من گئنه دئييرم کي گاموح و يا هر بير تشکيلاتيميز ايندي بيزه لازيمديلر، آما، ميللي دوشونجه يه اوستونلوک وئرديکلري سوره جه!
ايلک اولاراق آچيقلاديم کي فئدئراليسم و اونا اينانانلار بيزيم ميللي هرکاتيميز اوچون تهلوکه ديرلر. آما، بو دوشونجه يه اينانانلارين پئشمان اولدوقلارين گؤزه آلاراق، اونلارين آيدينلانماسي اوچون دانيشيقلارين يارانماسين اؤنرديم. حتّی، بوش يئره رکلام ائديلن در. ضيا صدر الشرافي نين شيشيرديلمه سينه قارشي چيخديم، ايران بايراغي آلتيندا قورولان توپلانتيلارا قوشولمايين دئديم، ايران چرچوه سين قورويان توپلوملارا اؤيه اولمايين، آما، قاتيلديلار و اؤيه اولدولار، سونوج نه اولدو؟ ميللي هرکاتين داهادا گوجسوز اولدوغونا ندن اولدولار و پارچالانمالار ياراتديلار!
دئديم کي سنتي شکيلده آد چيخارتميش، ياش و يا سابيقه سينه باخاراق سؤز صاحيبي اولان فعاللارين بيلگيسي گونجل دئييلدير. دئديم کي آغ ساققاللار آدينا توپلوم ياراتماغ گرکلي دئييلدير، اؤنرديم کي گئنج فعاللارين گونجل بيليملرده اَيتيم آلمالاري بير اصلدير. دئديم کي آذربايجان اوچون و ايندي اؤزلليکله گونئي اوچون هر ساهه ده بيليم آدامي و اوزمان يئتيشديرمک گرکليدير! منه دئديلر سايقيسيزليق ائدير و شووونيسمين سيياستين اويقولايير!
مئهران باهارلي؛
آرزو ائديرم سيزين بو گون يازديغينيز يازيدا اولان گرچکلر بير چوخ سويداشين الينه و سونرادا بئينينه چاتسين. چوخ اؤنمليدير کي بو دوشونجه لر بسلنسين. بيزيم گله جگيميزي ياپان گرچکلري بو دوشونجه لرله ياراتماليييق.
آما، جناب باهارلي؛
بيلگينيزه چاتديرمالييام کي بو دوشونجه٫ ايسته ديگيميز کيمي قولاي يارانماياجاق. ندنلرينه توخونماغ هم سيز و هم منيم گؤرويمدير. مانعاني تانيمادان، اونو آشماغ اوچون هئچ نه ائتمک اولماز. مانعانين ماهييتيني تانيمادان، او مانعاني آرادان آپارماغ اولماز.
منجه، بوتؤو آذربايجان، گونئي و قوزئي آذربايجان و يا اؤزلليکله گونئي اوچون اؤزل سيياست ياراتماغ اوچون، گوجلو سيياستچيلريميز اولماليدير. بو سيياستچيلرين ايلک اولاراق، گئچميش و گونوموزده کي اولايلاردان دوغرو بيلگييه صاحيب اولمالاري شرطدير. سيزجه، بئله سيياستچيلريميز وار مي دير؟
مع السف اورتادا اوينايان شخصلر بيلگيسيز اولسالاردا، اؤزلرين عاليم بيليب و اينانديقلاريني تنقيد ائتمگه بيله راضيليق وئرميرلر. بو شخصلر ايکي بؤلومده لر، يا آمريکا و باتي يانليسيديلار، يادا کي اونالارا موخاليفتده اولان چئشيتلي دوشونجه لر صاحيبلريديلر. بو بؤلمه لر عومومي شکيلده بيزيم دورومو آنلاتان گرچکلرديلر.
دونياني يا قارا و يا آغ گؤرن سيياستچيدن هئچ نه قازانماغ اولماز. دونيانين گرچکلري آپ-آچيق اولسادا، بئلنچي آداملارين داورانيشين ده ييشميه جکدير. ائله اونا گؤره دير کي بيزيم طالعييميز قارا يازيلير و هر زامان اوتوزان بيزلر اولوروق.
آمريکا يا باتي يانليلاري اسکيلردن قالان سؤيلمين تام عئينيسيني هاق ائديرلر. دئييشلرده واردير کي، موسکودا يئل اسنده، بيزيم کومونيستلره سويوق ده يير! اينديسه من بئله بير سؤز آرتيرماغ ايستيرم کي، آمريکانين قارني آغريياندا، بيزيمکيلر ماوالدان چيخمير!
بو ايکي دوشونجه نين ساواشينا قاپيلان، اؤزلرين ميللي فعال آدلانديران شخصلري نئجه ميللي دوشونجه يه گئري گتيرمک اولار؟
ايندي دوروم چوخ آغيردير، دونيا سيياستي هيزلا ايلرليير، هر دئولت اؤز ميللي منافعيين قوروماغ اوچون جان آتير، يادلارين قازانجي اوغروندا اينسانلار اؤلدورولور و بيزيمکيلر بوندان خبري يوخموش سانکي، گئنه اسکي شوعارلاري وئرمکله اؤزلرين تاولاييرلار!
بير دفعه بو فعاللارا آنلاتماغ لازيمدير کي دونيانين سيياستي “عمي دردي يوخ، زمي درديدير”. آرتيق بونو بيزدن اوستون اولانلار اعتيراف ائديرلر، آما، همن اوستون اولانلار بيزه دئموکراسيدن دانيشيرلار.
من بئله اينانيرام کي بيزيمکيلر دئييلنده، گرک ايکي قوروپدان آد آپاريلا، بيرينجي قوروپ بيلمه دن اينانانلارديلار، ايکينجيسيسه بيله رک جايديرانلارديلار.
بيرينجي بؤلومده يئر آلانلاري بلکي اويالتماغ اولور، آما، ايکينجي قوروپدا يئر آلانلار بيزه پوتانسييئل تهلوکه، و حتّی تانينميش دوشمنلردن داها قورخونج ايتکي گتيره جکلرينده شوبهه ميز اولماماليدير.
ميثال اوچون، آمريکا يا روسيه ايکي دوشونجه قايناغي اولاراق، ايکي سوپئر گوج (بيري ياريم سوپئر گوج) اولسالاردا، اؤز قازانجلاري اوچون هر تور جينايته ال وورورلار. اؤزلليکله ده سون عصرلرده باش وئرن سويقيريملار، قتل عاملار و ايتکيلرين باشيندا ائله بو ايکي اولکه گئدير. آرتيريم کي بونلارين آرخاسيندا و يانلاريندا اولان بير چوخلو بالاجا تهلوکه لي اولکه ده يئر آلماقدادير، آما اصل رقيب اولان بونلارديلار.
بو ايکي دوشونجه نين هر هانچيسينه اينانماق و اونو قوروماغ بيزيم ميللي منفتلريميزله ضيدييتده اولاجاقدير. ندن؟ چونکو ميللي منفعتلريميزي قوروماغ اوچون، بونلارين ايکيسيله ده ساواشمالي اولاجاييق! اولان ايشميدير؟ بلي، بو ايکي دوشونجه نين تام اورتاسيندا سؤمورگچيليغ و گوج آرتيمي ياتيبدير. ياني کي اونلارين هر بير آديمي، باشقالارينا عايد اولان وارليقلاري منيمسه مک اولاجاقدير. بيزه ايسه٫ اورتادا يارارلاناجاق اولان دؤشونجه سيتمي لازيمدير.
بيلمه ليگيک کي بو دوشونجه لرين هئچ بيرينده اينسان و اينسانليغا ده ير وئريلمييب و وئريلمه يه جکديرده. گؤزوموزون اؤنونده، بيري نين ايشقال آدلانديرديغي او بيريسي نين قورتولوش ساواشي اولور، بو بيريسي نين دئموکراسيسي او بيريسي نين سويقيريمي اولور! بئله بير قارماشيق و يالان دولو دوشونجه يه ايناناراق، اونلاري قورومادا نه يارار اولاجاقدير؟ طبيعيي ائله او دوشونجه نين صاحيبلري يارارلاناجاقلار. بو آرادا اونوتولانسا، باشقا ميلتلرين اينساني و ميللي وارليقلاري اولاجاقدير.
من هر زامان دئميشم کي آذربايجان اوچون گرک آذربايجانا اؤزل دوشونجه سيستئمي يارانسين. اينگيلتره نين سيياستچيسي نين دئديگينه گؤره، “بيزيم داييمي دوستوموز يوخ، کي داييمي ماراخلار”يميز اولماليدير.
آيا سيزجه بو ماراخلاري تعريف ائده بيله جک گوجه صاحيب اولموشوق مو؟ من دئييرم کي يوخ، چوکو هله بيزيم آديميزا دانيشانلار يا او طرف يادا بو طرف دوشونجه سينه قاپيليبلار و ميللي ماراخلاريميزي اونلارا فدا ائديرلر.
من هئچ قبول ائده بيلميرم بير اينسانين، گؤزو گؤره گؤره، واختي اولاندا اوخويا اوخويا و باشارديقجا اينجه له يه اينجه له يه، ايکي غدار، قان تؤکن و يورد داغيدان دوشونجه آرخاسينا دوشسون و اؤز کيمليگي، اؤز ميللي وارليقلارين و ميلتي نين گله جگين اونلارا ساتسين!
سونوندا دئييم کي، داها زامانيميز يوخدور کي اوتوراغ و ياتميش فعاللاريميزين اويانيب و ميللي فعال اولدوقلاريني گؤزله يه ک! و يا خاريجي گوجلرين قوللوغوندا اولان ساتقينلارين اوزلري نين قارا اولماسين گؤزله يه ک! زامان سوغوشور و ايتکيلر چوخالير!
آرزو ائتمکدن يورولدوم، آما آرزو ائديرم کي آذربايجان اوچون ميللي بير دوشونجه سيستئمي نين يارانماسينا شاهيد اولام!
ايللر اؤنجه منيم اورمودان مودافيعه ائتمک اوچون سيلاهلانماميزي ترور آکتي آدلانديرانلارين بو گونکو مودافيعه چاغريشلارينا، اويانيش مي دئييم يا چئوريليش مي؟
اويانش اوندا اولور کي بيريسي بيلگيله نير و يا سهولرين آنلاياراق دوغرو يولا گلير!
چئوريليش اودور کي گئچيجي ماراخلاري اوچون اؤزون يئلين گئديشيه بوراخير!
ايندي بيزيم هرکاتيميزا اويانانلار لازيمديرلر تا چئرويلرنلري دئشلاسينلار! چئوريلنلرين مع السف هم ساييلاري، هم پوللاري و هم گوجلري چوخدور. چونکو او يوخاريدا دئديگيم دوشونجه لرين قوللوغوندالار تا آذربايجان مرکزلي دوشونجه سيستئمي نين يارانماسين انگلله سينلر! بونلارين شخصي قازانجلاري بيزيم ميللي ماراخلاريميزين يوخ اولماسينا باغليدير، ميللي ماراخلاريميزي يوخ ائتمک ايستميريکسه، بو ساتقينلارين ماسکه سين چيخاريب و هرکاتيميزدان دئشلاماليييق!
سون گونلرده باش وئرن اولايلار و ميللي فعاللاري بير بيرينه شوبهه لي دوروما سالماغ اوچون يورودولن سيياستلرين اؤنو آلينماليدير. اته گينده داش اولانلار بلليديلر، هايلارين قاباغا آتانلار بلليديلر و ميللي دوشونجه ميزين يارانماسي و گوجلنمه سي اوچون چاليشانلاردا اورتاداديلار. آما، رئکلام گوجونه ماليک اولان ساتقينلارين چاباسي بلکي سويداشلاري جايديرسين و يا تاولاسين، آنجاق، هاميميز چاليشماليييق کي يارانان قارماشالي و ايفتيرا کاراکتئرلي دورومو ساکينلشديرک و ميللي ماراخلاريميزا اوستونلوک وئرمه گي بير گرک اولاراق قوروياق.
جناب باهارلي-يا باشاري آرزولايب و ايسته ييرم اونا وئريلن تپکيلر داها منطيقلي و داها ياراديجي اولسون.
اؤيرنمه ليييک کي سؤزون نه اولدوغونا دوشونک، اونو کيم دئديگينه يوخ!
تبريزلي باي بک
۲۳/۰۸/۲۰۰۸
کرويدون
٫بير ميللتين سسي
پایلاش | پرینت
بورا باغلي يازيلار:
- وقتي شوونيستها قات ميزنند! اشتباه فجيع فارسهاي دو آتشه در خصوص دو تشکل آذربايجاني و تلاش آنها براي سؤ استفاده - تبريزلي باي بک
- شرفدن دانيشانلار، شرفسيزليکدن اوزاق دورارلار! تحميل ائديلن بايراغ بيزي پارچالاياجاق مي؟ - تبريزلي باي بک
- چگونه ميتوان مانع پشيمان شدن مردم از شروع و دفاع از مبارزات ملي شد؟ - تبريزلي باي بک
- يئکه داش، آتماماغ علامتيدير - تبريزلي باي بک
- يا قارداشيم اول، يا قارشيمدا! - تبريزلي باي بک
- سورولاردان قاچماياغ! بلليدير کي گونئي هرکاتي اوچون بايراغ گرکليدير- تبريزلي باي بک
- آذربايجان و اونا عايد اولان بؤلگه لرده چئشيتلي سورونلارين اولوشومو - تبريزلي باي بک
- عراق-دا گئدن پروسئسلرده تورکمنلره تيکيلن بؤرک! - تبريزلي باي بک
- عدم احساس مسئوليت و دروغگوئي در حال تبديل “سمبل پيشنهادي” به “بايراغ تحميلي” است - تبريزلي باي بک
- مشروطه يا کشمکش دموکراسي بين تورکها و پادشاهشان چه ربطي به فارسها دارد؟ - تبريزلي باي بک
http://www.baybak.com
بای بک سایتیندان پرینت اولوب
http://www.11008.baybak.com/il_11008_say_943.azr
یازینین اینترنت آدرسی
گوروش کاپانیبدی