روس-گورجو ساواشي، آذربايجان چيخارلاري - تبريزلي باي بک
بای بک، آذربايجان | اِلگؤن, ۲۶-ي قويروخدوغان , ۱۱۰۰۸ اینجی ایل, چولا ۰۰:۰۰ [گ.ؤ] | یازی و قوشوق
 |
. | آما بونلارين اونوتدوقلاري، و يا اصلینده اونوتماغ ايسته ديکلري بير گرچک وار. گونئي آذربايجان بو گون ايران آدلانان اولکه نين اراضيسي ساييلماقدادير! آيا بو حاکيمييت صاباح گونئي آذربايجان موستقيلليگين ائلان ائدنده فارسلاردان مي يانا اولاجاقلار؟ صاباح کوردلر کرکوکو اؤز ترکيب حيصه لرينه آلاندا، عراق-اين ايچ مسئله سيدير دييه اونو دستکليه جکلر مي؟ چين حاکيمييتي دوغو تورکوستاندا قان تؤکرکن، چين يانليسي اولاجاقميدير؟ ياخود تورکيه نين تپکيسي بونلارا نه اولاجاقدير؟ يا تورکمنيستانين؟ يا او بيري تورک اولکه لرين؟ اصلا سوروشورام کي، روسيه ده ايشقال آلتيندا اولان تورکلرين گله جگينه بيگانه مي قالماليييق؟ |
دئييرلر بير گون بير موللا دانيشيرميش، قادينلار اونا قولاغ آسيرميشلار. موللا دئيير کي، اگر بالاجا بير اوشاق قالي نين اوستونه ايشسه، قالي نين باتيخ يئرين کسيب و آتماغ لازيمدير! موللا دئيير کي، اوشاغين ايشمگين هئچ نه تميزله يه بيلمز، حتّی سو و گونش ايشيغيدا!
سؤزو گئدن موللا ايشلرين مسجيدده بيتيريب و ائوه گئدير. اودايا گيرنده، گؤرور قالي دليک-دئشيک اولوب. آروادين چاغيريب و بو ندير سوروشور! آروادي دئيير کي: بس بو گون دئمه دين کي اوشاغ هارا ايشسه، اوراني کسيب آتماغ لازيمدير؟ ائله اونا گؤره ده من اوشاغيميزين ايشديگي يئرلري کسيب و آتميشام!
موللا باشينا چالير و دئيير کي: آي عاغيلسيز قادين، من او سؤزلري اؤزوموزه دئمه ديم کي! منه تاجيرلر پول وئرميشلر کي قاليلاري نين ساتيشينا يارديمجي اولام، منده او سؤزلري ميلته دئييرديم!
ايندي دييه سن بيزيم آنليميزين يازيسين يازماغ، بئلنچي موللالارا دوشوب! موللا دئييرمده، آما يازي يازيب-پوزانلار موللا اولمايا بيليرلر!
دوغروسو بودور کي هر بير اولايدا، ايلک اؤنجه اؤز تهوکه سيزليگيميزي، و داها سونرا اؤز قازانجلاريميزا گؤره داوراناق. تهلوکه سيزليک و قازانجلاريميزي، گئچيجي اولانلاردا، داعواملي شکيلده سيرالاياراق، اونلارين هانچيسي نين گونوموزه و گلجگيميزه ان چوخ يارارلي اولاجاغينا منطيقله قرار وئرمک چوخ واجيب بير ايشدير.
مع السف گئنه بئلنچي اولايلاردا آذربايجانليلار و اؤزلليکله ده گونيليلر سسسيز قاليرلار. من بيلميرم بو شخصلر کي بوش سؤزلره زامان تاپيب و بيربيرينه سالديريرلار، ندن بئله اؤنملي ايشلرده تاپيلميرلار؟ بو سورو دييه سن من اؤلنه قدر جاوابسيز قالاجاق!
گؤزوموزون اؤنونده، تورکلرين تاريخي تورپاغلاريندا قورولان دئولتلر بير بيرينه سالديراراق، دخلي اولمايان يئرلري بومبالاييب و سيلاهسيز اينسانلاري اؤلدورورلر! گورجولر بير طرفدن، روسلارسادا بير طرفدن، اؤز چيخارلاري اوچون، ميلتلري قانا بوغورلار!
اولاي هاردان باشلايير؟ اولايا ندن ندير؟
آبخازييا و اوسئتيا ايکي رايون اولاراق گورجوستان ترکيب حيصه سينه داخيل اولماقدالار. سووئت بيرليگينده بير چوخلو جوغرافي دييشيملري ياپان روس حاکيملر، گئچميشده کي اولايلاردان اينديده يارارلانيرلار. البتته کي گئچميشده اويقولانان پلانلارين هاميسي يارار وئريجي دييلدير، و ائله اونا گؤره ده سووئتلر بيرليگي نين داغيلماسينا تانيغ اولدوق. آما، سؤز گونوموزدن گئدير، سؤز، گئچميشدن درس آلاراق گلجگي پلانلاماغ آنلاييشي نين واجيب اولدوغوندان گئدير.
گلين گونئي اوسئتيا آدلانان بؤلگه نين دورومونو اينجله يه ک! بو اينجله مه ده، بير چوخلو فاکت ياراشديرماغ اولار، اونلاردان اؤنملي اولانلارين بير نئچه سي بوردا سيرلاناجاقلار.
روس ايمپئرييا سيستئمي، آبش-اين قافقازلارداکي ماراخلاري و روسييه ايله توققوشمالاري، بؤلگسل ستراتئژيک وارليقلار، ناتو و روس فئدئراسيياسي نين توققوشماسي، آوروپا بيرليگيله آبش-اين قافقازلاردا توققوشماسي، آبش-دان يارارلاناراق، اؤزونو بؤلگه ده سوپئر گوج ائتمگه چاليشان ايسرايل، بؤلگه ده يئني جوغرافي پلانلار و.س کيمي فاکتلار گؤزده اولماليديرلار.
سووئتلر بيرليگي نين داغيلماسي روسلار اوچون آغير و اونوتولماز ضربيدي. بو ضربه روسلارين دونيادا سوپئر گوج اولا بيلمک ايمکانلارين قيسيتلادي، روسلارين ديبسيز-بوجاقسيز قايناقلارا صاحيب اولمالارين انگلله دي و دونيا دوزه نين روسلارا قارشي دييشديردي.
بو دورومدان گؤزلجه يارارلانان دونيانين سوپئر گوجو اولان آمئريکا شتاتلاري، اؤز قاناتلارين گچميشده روسلارا آييد اولان بؤلگه لره آچدي. بو بؤلگه لردن بيريسه گورجوستان اولماقدادير.
۱۹۹۱ آپريلين ۹-اوندا گورجوستان نئچه دفعه قانلي دؤيوشدن سونرا، و سووئتلر بيرليگي نين داغيلديغي نين آرديندان، اؤز موستقيلليگين ائلان ائتدي. گورجوستان سووئتلرده بير رايون اولاراق، بير چوخلو تورپاغ، و او تورپاغلارين ايچينده ياشايان، گورجو اولمايان اينسانلارا صاحيب اولموشدور. ايللر بويو روسلارين ظولمو آلتيندا اولان ميلتلر، اينديسه بيربيرينه زولم ائتمک اوچون قيلينج اله آلميشلار!
گورجوستاندا بير چوخلو تورک تورپاغلارييلا بيرليکده ساخلانمش دورومدالار. روسلارين ائتنيک داغيتما و تورپاغ تميزله مک سيياستي سونوجو، تورکلرين چوخو اؤز کيمليکيرين اونوتاراق، يئردن چيخميش گؤبلکلر کيمي ياشاما گيريشيبلر. ائله اونا گؤره دير کي اونلار، کيمسه اولماديقلارينا ايناناراق، و ان اوزوجو اولان نوکتا، کيمسه اونلاري اؤزوندن بيلمه ديگينه گؤره، هر زامان اؤلوم، تزييق و سورگون اولماغا بويون اَيمه لي اولوبلار.
اوسئتيايا گئتمه دن اؤنجه، آذربايجان و تورک تورپاغي اولان بورچاليدان ياد ائدک. دونيانين گؤزو اؤنونده ائتنيک تميزله مه سينه معروض قالان، ايللرجه ال-به-ال گزديريلن بؤلگه کي سونوندا گورجولره تسليم ائديليب، آذربايجان رئسپوبليکاسي باشدا اولاراق، هئچ بير تورک دئولتي نين ماراغين اؤزونه جلب ائده بيلمه ميشدير. بورچاليدان قولايجا ال اوزن آذربايجان رئسپوبليکاسي نين باشچيلاري، قاراباغادا مي عئيني ياخلاشيمدا بولوناجاقلار؟
اوسئتيا بؤلگه سي روسيه دئوريميندن سونرا، گونئي گورجوستانا وئريلدي. اوندان اؤنجه، روسلارين الينده اولان بوتؤو اوسئتيادا بير چوخلو ساواش مئيدانا چيخميشدير. او ساواشلارين چوخو ايسه موستقيلليک اوغروندا يارانان چاتيشمالار اولوبدور کي گونوموزده ده داعوامينا شاهيد اولوروق.
ايلگينچ اولان بودور کي، اوسئتيا دئينده، ايکي بؤلگه دن دانيشماغ لازيمدير کي بيري گورجوستاندا و دييريسه روسيه دا يئر آلماقدادير. آما، ملسف، يازارلار و دانيشانلارين بير چوخو روسيه دا يئر آلان بؤلومو بيله رک يا بيلمه دن اونوتورلار! سورو سورماغ اولار کي، روسيه اوردوسو گونئي اوسئتيادا ميللي موقددراتين ميلت الينده اولماسينا ايناناراق گورجوستانا سالديراندا، آيا روس دئولتي قوزئي اوسئتيادادا عئيني شراييتي ياراديرمي؟
اگر سؤز اوسئتيانين موستقيلليگي، يا حتّی موختارليغيندان گئدير، بس ندن روس حاکيمييتي آلتيندا قالان بؤلگه ده کيمسه نين دانيشماغا ايجازه سي يوخدور؟
اوسئتيا چوخداندير کي تانينميش ائتنيک توپلومو اولاراق تانينيبدير، اورانين گئچميشده موستقيل ستاتوسو اولوبدور آما، تاريخين بير چوخ سورجينده، دئولتلر آراسيندا پايلاشيليبدير. بير زامان روسلارين، بير زامان روملارين و بير زاماندا عوثمانلي تورکلرين الينده اولان بو بؤلگه، اسکي تاريخده تورک دونياسينا آييد اولان يئردير. آما، گورجوستان ترکيب حيصه سينه داخيل ائديلنده، آماج ميلتلري بيرلشديرمک يوخ، کي اونلاري آييرماغ اولوبدور. ندن تانينميش بير ائتنيک ايکي يا اوچ يئره بؤلونمه ليدير کي هر زامان بيرلشمک اوچون ساواش آپارسين؟ داها ايلگينج بودور کي، تانينميش بير ائتنيکين بير بؤلومون اؤز حاکيمييتينه آلان بالاجا اولکه لر، ندن اونلارا آييد اولمايان وارليغي قولايجاسينا الده ائدرکن شوبهلنمييبلر؟ و، ندن گونوموزده گؤردوگوموز کيمي، ائتنيک توپلوملارين داغيتماغ اوچون، و اونلاري اؤز کيمليکلرينده اريتمک اوچون گوج قوللانيرلار؟
گورجوستان اوسئتيايا صاحيب اولماقلا، سيزجه اؤزونه هاق قازانريميش اولوبدور کي اوردا ائتنيک تميزله مه سيياستي اويقولاسين؟ آيا بو اولايدا بيز اؤزوموزله توتوشدورما ياپساق سهو مي اولاجاقدير؟
ائله بيزيده بير ميلت اولاراق پارچالاييب، بير پارچاني روسلار و بير پارچانيدا فارسلار اييلنديلر! اوندان سونرادا او پارچالارين داهادا پارچالانماسينا اؤزن گؤسترديلر، وارليقلارين پايلاديلار و کيمليگين زدله ديلر! بوردا بنزه اولان بير چوخو فاکتا گؤز يوما بيليرميگيک؟
آما، بو آرادا هر نقه دهرده بنزرليکلر اولسا، بير اؤنملي فاکت آذربايجاني باشقا ائتنيکلردن آييرماقدادير. اودا بودور کي آذربايجانين عادي تاريخ بويو بير موستقيل، تورپاغ صاحيبي و تانينميش اولکه کيمي گئديبدير. آذربايجان سوپئر گوجلرين ماراخلاري اوغروندا ايشقال اولوناراق پارچالانيب، هر پارچا ايسه دييشيک پروسئسلرله اريتمه و آسيميلاسيونا معروض قاليب.
دئمک ايسته ديگيم بودور کي، آذربايجاندا ياشايان آزينليقلارين دورومو ايله، باشقا ائتنيکلرين دورومو عئيني اولماماليدير. ندن کي آذربايجاندا ياشايان آزيلنليقلارين دئمک اولار هاميسي سونرادان گلمه لرديلر. اونلارين آذربايجاندا ياشاماغ هاقلاري اولسادا، اوردا تورپاغ هاقلاري اولماماليدير.
آذربايجانين قاراباغ پروبلميله اوسئتيانين دورومون توتوشدوراراق، آذربايجان حاکيمييتيندن گورجوستان اراضي بوتؤولوگون دستکله مسين ايسته ينلر، آيا بو اؤنملي نوکتالاري اونوتورلارمي؟
گورجوستانا حربي موداخيله ائدن روسيه ، اسکيدن بري پئشينده اولدوغو سيياستي داعوام وئرمکده دير. روس ايمپئريياسي و اونون گئنيشلنمه سي هر زامان روس سيياستچيلري نين ايلک آماجي اولوبدور.
تاريخده قيسسا بير گزي ياپاراق، روسلارين نقه دهر جينايتکار اولدوقلارين قولايجا گرمک اولار. ميلتلري محو ائتمگه بيله قالخيشان بو سيياست ايله، دوستلوقدان و اينسانليقدان دانيشماق آبتالليق اولاجاقدير.
روسلار و اونلارين ضيدي اولان آبش سيياستينده دئموکراسي و اينسان هاقلاري کيمي شوعارلارا اينانماقسا، يازي نين باشلانقيجيندا دئديگيم موللانين آروادي اولماق کيمي اولاجاقدير!
روسيه و گورجوستانين سون ساواشي ندن باشلادي؟ اوردان باشلادي کي گورجوستان حاکيمييتي توم اينسان هاقلارين ازه رک، ميلتلرين اؤز موقددراتينا صاحيب اولمالارين پوزاراق و آبش-باتي ايتتيفاقي نين وئرديکلري شوعارلاري وئره رک! گونئي اوسئتيايا سالديردي! بو سالديري چوخ گئنيش اولموش و ايتگيلرين سايي اون مينلري آشماقدادير. آما، ندن باتي خبر آگئنتليکلرينده بو ساواشدان هئچ بيلگي وئريلمير و ساواش سانکي روسيه نين گورجوستانا سالديريسيندان باشلايير؟
بير چوخلو سيياستچي، ائدوارد شئواردنادزه (گورجوستانين اسکي جومهور باشخاني) کيمي سابيقه لي سيياستچيلر داخيل اولاراق، بو ساواشدا و گئنيش ميقياسدا ويهشيليگين تؤره ديلمه سينسه، باتي نين و اؤزلليکله ده آبش-اين رولو اولدوغونو آچيقلاييرلار. اونلار دئييرلر کي سااکاشويلي (اينديکي جومهور باشخاني) آبش و باتيدان آلديغي يارديم و دستکلرين تورونا دوشوب. اونلار دئييرلر کي، گورجوستاني روس-باتي ساواشينا قوربان وئرن سااکاشويلي، اولکه سي نين آغير ضرر گؤرمه سي و اراضي سورونلاري نين داهادا درينلشمه سينه ندن اولوبدور.
ميخاييل سااکاشويلي اؤز تحصيلاتين آمئريکادا بيتيريب، داها سونرا، شئواردنادزه کابينئتينه داخيل اولاراق، آ.ب.ش-باتي ايتتيفاقي نين يارديمييلا دئوريم ياپاراق حاکيمييتي الينه گئچيريب! ۲۰۰۳-اونجو ايلده گورجوستاندا باش وئرن دئوريمين باشيندا گئدن، ميلليتچي اولان سااکاشويلي گورجولره سؤز وئرميشدي کي مملکتين اراضي بوتؤولوگون قوروياجاق و آبخازييا ايله گونئي اوسئتياني (کي اؤزلرين موستقيل ائلان ائديبلر آنجاق هئچ اولکه اونلاري تانيماييبدير) اولکه يه گري قايتاراجاق!
سون ايکي ايلده، آبش و باتي گورجوستانا اينانيلماز يارديملار ائديبلر. سيلاه و حربه اَيتيم باخيميندان چوخلو يارديملار آلان سااکاشويلي حاکيمييتي، گورجوستانين داغيلميش ايقتيصاديياتي، اينسانلارين آجليغين و اولکه نين گئري قالديغين هئچه ساياراق، يئني آلديغي تئخنيکالارلا قورورا قاپانميشدير. بو قورورون نتيجه سي، اوتانج وئريجي اولدو.
بير هفته اؤنجه قورورلا گونئي اوسئتيايا سالديران، اون مينلرجه اينساني اؤلدورن و يوز مينلرجه اينساني يئريندين-يوردوندان ائدن بو جناب، اوچ گوندن سونرا دونيايا يالواراراق، اؤزونون يازديغي پئشماننامه ني ايمازلادي! اونون حسابلاديغي کيمي يورومه يهن ساواش، اونا سؤز وئرنلرين و اونو شيشيردنلرين نه قدر هيلکار اولدوقلارين بير داها سوبوتا يئتيردي.
بوردا، گئنه بير توتوشدورما لازيم اولاان گؤرونور. گئني آذربايجان ايشقال آلتيندادير و قوزئي بؤلمه موستقيل بير دئولتدير. گونئي فارسلارين ايشقالي آلتيندادير آما هله ليک گونئيدن آچيقجاسينا مودافيه ائدن گوج اورتادا يوخدور.
بير نئچه آديني ميللي فال قويان شخص، گونئيين موقددراتين آبش و باتي الينه وئرمکدن يانا اولدوقلارين بيلديره رک، هر نه اولور اولسون آما آبش-آ ضرر گلمه سين سيياستين اويقولاماغا چاليشيرلار! بو شخلسرين اينانجيندان ايلهام آلاراق، يئنيدن ياراتماغ سيستئميله روس-گورجو ساواشين ايضاح ائتمک يارارلي اولاجاقدير.
فرض ائدک کي، فارسلار همان گورجولرديلر، گونئي آذربايجانسا همان گونئي اوسئتيادير. اوسئتيايا يارديم ائدن روسسيه سه همان گونئيه يارديم اوچون آداي اولان آبش-دير.
آتالار دئييرلر کي، ايستيرسن گؤره سن بيري نه چکير، اؤزووو اونون يئريني قوي!
روس-گورجو ساواشي نئجه باشلاييبديرسا، ياراتديغيميز يئني اوچلو ايله ايضاح ائتمگه چاليشاجاغام. فرض ائدک کي، فارسلار اونلارا دستک، سيلاه و بيلگي وئرن روسلارا داياناراق، گونئي آذربايجانا کي اؤزون آبش-اين يارديمييلا موستقيل ائلان ائديبدير سالديريب! بو سالديري، گئنيش ميقياسدادير، يئردن و گؤيدن بومبالار اينسانلارين باشينا ياغير. دونيا مئديياسيدا بونا سسسيز قاليب و يا ان گئچيجي شکيلده ياناشيرلار.
آيا، او دئديگيم ميللي فاللارين گؤزلتنتيسي بو اولماياجاقدير کي داياناجاق اولدوقلاري آبش مئيدانا گيرسين و فارسلارين قولاغين بورسون؟ ائله اوندادير کي روس-گورجو ساواشيندا اولان فاکتلاردان بير نئچه سي آچيقلانميش اولاجاقدير.
روسلار ايللردير کي گونئي اوسئتياني دستکليير، هر باخيمدان اوراني گوجلنديرير و گورجوستاني الده توتماغ اوچون، اوسئتيا و آبخازييا کيمي کارتلاري اوينايير. تبيدير کي بو کارتلاري روسون اليندن آلماغا قالخيشان هرکه سي اورتادان قالديرماغ، روسيه نين ايلک ايشي اولاجاقدير!
قافقازلاردا گئدن ساواشلارين هاميسي اوردا اولان ميلتلري قوروماغ اوچون يوخ، کي اوردا اولان ستراتئژيک وارليقلاري اله گئچيرمک اوچون ياپيليبلار. قافقازلاردا هئچ بير زامان ميلتلر بير-بيريله ساواشماييبلار، مگر خاريجي گوجون ماراخلاري سؤز قونوسو اولسون.
ائرمنيستان قاراباغا سالديراندا، روسلاردا، آ.ب.ش-دا و باتيدا سسسيز قالديلار کي هئچ، حتّی ائرمنيستانا آچيق و گيزلي شکيلده يارديم ائتديلر. نئجه اولور کي بو گون روسيه گونئي اوسئتيا اوچون گؤز ياشي تؤکور؟ آيا همان روسيه دييلميدير کي چئچئنلري قانا بله دي؟ آيا همان روسيه دييلدير کي قاراباغين ايشقالينا زمين حاضيرلادي و اينديسه اورانين گئري قايتاريلماسين انگلليير؟
نئجه اولور کي آبش و باتي ايندي گورجوستاني هاقلي بيليرلئ و گونئي اوسئتيانين موستقيلليگينه راضي اولمورلار، آما همان گوجلر ايراق ساواشيندا کوردلري دستکله ديلر و ائله اينديده کوردوستان ياراتماغ اوچون اللريندن گله ني ياپيرلار!
عاغيلسيزليق اولاجاقدير کي بيز بو گرچک فاکتلارا گؤز يوموب، روسيه سي اولسون، آبش-اي اولسون و هر هارا اولورسا اولسون پئچينه دوشوب و اونلارين تاولايان سؤزلرينه ايناناق. من هر زامان دئميشم کي آذربايجاني آزاد ائتمک اوچون سؤز يوخ، کي عمل لازيمدير. عملسه ائله سيلاه اله آليب و پلانسيز سالديرماق دييلدير، عمل گوجلو سيياست اويقولاماقدير کي آذربايجانين ميللي منافعسين هر شئيدن اوستون توتسون.
ناتو گئتديکجه دونياني آبش-اين الينه سالماغ اوچون ياييلماقدادير. ملسف بو گرچکلره گؤز يومان بير چوخلو سيياستچي، دونيادا اولان بيتنلري دوزگون شکيلده اينجله يه بيلميرلر. ناتو و اونون يارانيش فلسفه سي، ياپديغي ايشلر و ياراتديغي تهلوکه لر اولدوغو کيمي بو سيياستچيلر طرفيندن تانيتديريلماماقدادير.
باشقا بير سهو دوشونجه سيستئمي کي اؤزلليکله گونئي آذربايجان ميللي هرکاتين آخسادير، ايکي قوتوبلي اينانجلاردير. ياني کي، اگر سن آمئريکانين سيياستيندن راضي اولماديغيوي دئسن، فرق ائتمز کي فاکتلا دانيشيرسان يا يوخ، سنه روسپرست دامقاسي وورولاجاقدير! و بونون قارشيسيندا، اگر روسيه ني تنقيد ائتسن، ايمپئريياليسم نؤکري دامقاسي آنليوا وورولاجاقدير! دئديگيم سهو سيستئمده، اورتا يول، و اصلینده آذربايجان ماراخلاريندان چيخيش ائدن يول يوخدور.
من چاليشيرام کي آذربايجان ماراخلارينا اوستونلوک وئرن بير سيستئم يارادا. ياني کي، هر زامان آمئريکا سيياستي بيزه يارارلي اولدو اونا، و هر زامان روسيه سيياستي بيزدن يانا اولدو اونا دستک وئريلسين. آما، اونوتماماغ شتريله کي بو آرادا اولان سيياستلر هر زامان او سوپئر گوجلرين يارارينا اولاجاقدير و بيزه قالان اولان، سادجه ميللي ماراخلاريميزي قوروماغ اولاجاقدير تا گوجوموزو آرتاق و اوندان سونرا گوج بازارلنا داخيل اولاق.
قوزئي آذربايجان حاکيمييتيندن کسکين اينتيقاد ائتديکلريمدن اولان بيري، قوزئي آذربايجاني تک اورونلو بير اولکه يه چئويرمک چاباسي اولوبدور. قوزئي حاکيمييتي نفت-قاز پوللارينا صاحيب اولدوقدان سونرا، اوردا ياپيلاجاق اولان ياپيتلارين گوجلو اولماسينا اؤزن وئرمکدن ايمتيناع ائتمگه باشلاييب.
آذربايجان رئسپوبليکاسيندا گؤستريلن اينکيشافلار نه اينکي يارارلي دييلدير، بلکي بير باخيشدان تهلوکه ليده ساييلماليدير. تسسوور ائدين کي بير گون نفت-قاز ايستحصالاتي دايانسين! ياخود آنبارلاريميزدا اولان ميللي سرمايه ميز بيتسين! او زامان آذربايجان رئسپوبليکاسي نه ايله ياشاياجاقدير؟
آذربايجان قايناقلاريندان يارارلانان باتي و يانداشلاري هر زامان ساتقين بير حاکيمييت تاپاراق اونو ايش باشيندا ساخلاماق اوچون جان آتاجاقلار. روسيه نين خزر دنيزينده ماليک اولدوغو گوج هر زامان بيزيم وارليقلاريميزي آزالتماقدا اولوبدور. آما، بو ضررلر ايکي طرفدن گلنده، ميلتيميز داها آغير دوروما دوشه جکدير.
ايندي هم باتي و هم روسيه بيزيم اولکه يه باسقي اويقولاماقدالار و حتّی بير دئييشله دئسم، بيزي يؤنتيرلر. آذربايجانين نفتي يا قاضي هاردان گلير و هارا گئدير، نئچه يه، کيمه و نئجه ساتيلير، گلن پوللار هاردان، نئجه و نئچه دير، آلينان پوللار هارا، نئجه و ندن خرجله نير، بللي دييلدير! ائله اونا گؤره دير کي بو قارماشادان چيخماغ اوچون، نفت-قاز مثله سي ميللي سوييه يه قالديريلمالي و اونلارين اوزرينده ياپيلان مواميله لرين اوستو آچيلماليدير.
آذربايجان نفت-قاز ياتاقلارين اله گئچيرمک اوچون، روسيه نين ياناکي قويولاريندان سونرا (قويونون آغزي روسيه دا اولوبدا ديبي آذربايجاندا يئر آلير) چکيلن کمرلر (ب.ت.ج - باکي-تيبليسي-جئيهان) و اونا بنزر نقليات سيستئملر سوپئر گوجلرين ماراخلاريندان اولوبدور. بونلارا، گله جکده رسمي بير اولکه اولاراق تانينان و عربلرين موتتفيقي اولاجاق اولان ايسرايلين ماراخلارينيدا آرتيرماغ لازيمدير.
بو ندنلره گؤره، ب.ت.ج بؤلگه ده گوجلرين ساواشديغي مال حالينه گلديکجه، آذربايجان تهلوکه سيزليگي سورو آلتينا گئده جکدير. ب.ت.ج-ني پارتلاتماغ اوچون روسيه نين سون چابالاري و تورکييه ده کي پارتلاييشلاري بير آرايا گتيرنده، او زامان موصيبتلريميزين نقه دهر درين اولدوغون آنلامالي اولوروق.
دونيا دوزه ني يئنيدن قورولور و من گئچميش يازيلاريمدا اونا ايشاره ائتميشديم. دونياني بؤلمک اوچون نئچه قوطب ساواشيرلار؟ آبش، آب، روسيه ، چين، ياپونييا، عرب بيرليگي و ايمکان داخيلينده تورک بيرليگي. آيا، زامان گليب چاتماييبدير کي تورک بيرليگي نين تمللري باره ده جيدي دانيشيقلار باشلاسين؟
سون زامانلاردا بير سيرا يئترسيز چابالار گؤستريليبدير. تورک اولکه لرين بير آرايا گلمه لري، اورتاق ديل و تئلئکاناللارين يارانماسي، ويزالارين قالديريلماسي و کولتور-تاريخ يؤنوندن ياخلاشمالار هاميسي ديرلي آدديملارديلار، آما يئترلي دييللر. حتّی، باشقا يؤندن باخاندا بيله، شوبهه لي گؤرونورلر.
تورکييه نين آوروپا بيرليگينه گيرمک اوچون چابالاري، آب قوراللارينا اويماسي و باتيدان موتتفيق سئچمه سي، بو اولکه نين تورک دونياسيندان دانيشمالارين سورو آلتينا سالماقدادير. ندن کي اگر تورکييه دئيير کي تورک دونياسي يارانماليدير، دئمک آوروپا بيرليگي نين قارشيسيندا قالخاجاق اولان بير گوجدن دانيشير. و بو او دئمکدير کي بير اولکه عئيني زاماندا ايکي دوشمن، يا موخاليف توپلومون ترکيبينده اولا بيلمز. بو آچيقلامادان بونو چيخارتماق اولار کي تورکييه چاليشير تا آوروپا بيرليگينه قارشي اولاجاق تورک بيرليگي کارتيندان يارارلاناراق، اؤزونون آوروپا بيلريگينه گيرمه سيني قولايلاشديرسين. يوخسا باشقا تور دوشونمک اوچون هئچ ندن گؤرومور. تورکييه سيياستچيلري چالشيرلار تا آوروپا يئتکيليلرينه دئسينلر کي يا بيزي اؤز آرانيزا آلين، يادا بيز سيزه قارشي ايتتيفاق ياراداجاييق! من اينانيرام کي تورکييه نين بو ايشي تورک دونياسينا اينانج و خيدمت آماجييلا يوخ، کي آوروپاني شانتاژ ائتمک اوچون ياپيلماقدادير.
آما، اگر بير گون تورک کونفئدئراسيياسي يارانارسا، دئمک تورک ددونياسيندا اولان وارليقلاريميز اؤز اليميزده و اؤز قازانجيميز يؤنونده اولاجاقدير. تورک دونياسي يارانيرسا، سوپئر گوجلر و باشقا بيرليکلرين تام اورتاسيندا، و اؤنملي اولان، يئر کوره سي نين تام زنگين يئرينده قورولاجاقدير. بو گرچکلشيرسه اگر، زنگينليک و اينکيشاف تورکلرين اولاجاقدير.
آما بونون کيمي بؤيوک و زامان آپاران پلانين گرچکلشمه سي اوچون، تورکلرين اينديدن بيربيرين تانيمالاري، سايقي دويمالاري و يارديم ائتمه لريدير. لازيمدير کي تورک اولکه لري، تورکلردن ۳۰٪ يارارلانماغ اوچون، تورک اولمايانلارين ۵۰٪ ياراريندان واز گئچسينلر. چتينليک چکمه يهن قازانماز.
تورکلره آييد اولان هر بير سورون گئنيش شکيلده تورک دونياسيندا يانسيتيلمالي و تپکي ياراتماليدير. ملسف بو گون گؤروروک کي تورک اولکه لري بير بيرينه ضيد سيياست يورودورلر، البتته دئييم کي بو سيياستلر خاريجدن اونلارا ديکته اولونور و هاکميمييتده اولانلارين ياخلاشيق هئچ بيري ميلتچي دييلديرلر.
آذربايجان رئسپوبليکاسي ۱۷ ايلدير کي قاراباغي الدن وئريب، بو حاکيمييت گيلر و گورجوستاندان يانا اولاراق، گورجولره وئريلن تورپاغلاريميزي دانير! گورجوستانين اراضي بوتؤولوگون دستکليير و اوردا ياشايان ميليونلارجا تورکون گله جگين ساتير. بو ايشي گرنلرين فيکريجه، اگر اراضي بوتؤولوگو دستکلنمه سه ، او زامان آذربايجانيندا اراضي بوتؤولوگو دستکلنمز!
آما بونلارين اونوتدوقلاري، و يا اصلینده اونوتماغ ايسته ديکلري بير گرچک وار. گونئي آذربايجان بو گون ايران آدلانان اولکه نين اراضيسي ساييلماقدادير! آيا بو حاکيمييت صاباح گونئي آذربايجان موستقيلليگين ائلان ائدنده فارسلاردان مي يانا اولاجاقلار؟ صاباح کوردلر کرکوکو اؤز ترکيب حيصه لرينه آلاندا، عراق-اين ايچ مسئله سيدير دييه اونو دستکليه جکلر مي؟ چين حاکيمييتي دوغو تورکوستاندا قان تؤکرکن، چين يانليسي اولاجاقميدير؟ ياخود تورکيه نين تپکيسي بونلارا نه اولاجاقدير؟ يا تورکمنيستانين؟ يا او بيري تورک اولکه لرين؟ اصلا سوروشورام کي، روسيه ده ايشقال آلتيندا اولان تورکلرين گله جگينه بيگانه مي قالماليييق؟
بيزلرين باشقا بير ايراديميزدا بودور کي سورونلاريميزا اؤز گؤزوموزله يوخ، کي بيزه تعريف اولونانلار آچيسيندان باخيريخ. قاراباغ بيزيمدير، اورا ايشقال اولوبدور و هامي بونا شاهيددير، آما، اوسئتيانين باشينا گلنلري پايلاشمير. اوسئتيا گورجولره وئريليب، ياني کي، گورجوستان بو آرادا ائرمنيستانين دوروموندادير و اؤزونه آييد اولمايان اراضيلري منيمسمک ايستيير. بوردا يئرلري بيله رک دييشديرنلردن سوروشمالي اولاجاغام کي، بيز ائرمنيستاندان مي يانا اولاجاييق يوخسا قاراباغيميزدان مي؟ بيز تورک تورپاغيندا يارانان گورجوستاندان و يا ائرمنيستاندان مي يانا اولاجاييق يوخسا بورچاليدان و قاراباغدان؟
آذربايجان اوچون موستقيل ضياليلار يئتيشديريلمه ليدير. سياسي و بيليم ساهه لرينده اتکي بوراخا بيلن اينسانلاريميز اولماليدير. نه يازيق کي هله ليک بو باشارييا ناييل اولماميشيق. من بوندان قورخورام کي صاباح گونئي موستقيلليگين ائلان ائدنده، اوراني يؤنته بيله جک اولان موستقيل و ميلتچي سيياستچيميز اولماسين و مجبور اولاق باشقالري نين بيزه سئچديکلري، تورکجه دانيشان و يا آذربايجان دوغولان ساتقينلارا باش اَيک! ايراقدا اولانلاري گؤردوک، باشيميزا گلمه سيني مي گؤزلمه ليگيک؟
بيزه اؤزل اولان يولو گئتمک زورونداييق، بيريلرين پئشيندن دوشمک بيزه ياراشماز
تبريزلي باي بک
۱۴/۰۸/۲۰۰۸
کرويدون
٫بير ميللتين سسي
پایلاش | پرینت
- وقتي شوونيستها قات ميزنند! اشتباه فجيع فارسهاي دو آتشه در خصوص دو تشکل آذربايجاني و تلاش آنها براي سؤ استفاده - تبريزلي باي بک
- شرفدن دانيشانلار، شرفسيزليکدن اوزاق دورارلار! تحميل ائديلن بايراغ بيزي پارچالاياجاق مي؟ - تبريزلي باي بک
- چگونه ميتوان مانع پشيمان شدن مردم از شروع و دفاع از مبارزات ملي شد؟ - تبريزلي باي بک
- يئکه داش، آتماماغ علامتيدير - تبريزلي باي بک
- يا قارداشيم اول، يا قارشيمدا! - تبريزلي باي بک
- سورولاردان قاچماياغ! بلليدير کي گونئي هرکاتي اوچون بايراغ گرکليدير- تبريزلي باي بک
- آذربايجان و اونا عايد اولان بؤلگه لرده چئشيتلي سورونلارين اولوشومو - تبريزلي باي بک
- عراق-دا گئدن پروسئسلرده تورکمنلره تيکيلن بؤرک! - تبريزلي باي بک
- عدم احساس مسئوليت و دروغگوئي در حال تبديل “سمبل پيشنهادي” به “بايراغ تحميلي” است - تبريزلي باي بک
- مشروطه يا کشمکش دموکراسي بين تورکها و پادشاهشان چه ربطي به فارسها دارد؟ - تبريزلي باي بک
http://www.baybak.com
بای بک سایتیندان پرینت اولوب
http://www.11008.baybak.com/il_11008_say_849.azr
یازینین اینترنت آدرسی
گوروش کاپانیبدی