موصاحيبه، موزاکيره يا موحاکيمه؟ گوناز تي.وي نين چاغريشينا باخيش

موصاحيبه، موزاکيره يا موحاکيمه؟ گوناز تي.وي نين چاغريشينا باخيش - تبريزلي باي بک

بای بک، آذربايجان | آراگؤن, ۱۳-ي قويروخدوغان , ۱۱۰۰۸ اینجی ایل, چولا ۰۲:۳۵ [گ.ؤ] | یازی و قوشوق

به ينمه ديکلريميزين ايللردير بايراغلاري وار، گئچيجي دئولتلري وار، خاريجده پارلامئنتلري وار، بيزسه بير بيريميزي ديديب ديديشديريريک! بس دير، ميللي هرکاتا بوندان چوخ خييانت ائتمه يک! سيزده، اونلاردا و بيزده پارچالاريميزي آتاغ بير يانا، ميللي بير سيمگه اوچون موزاکيره ائدک! بونون نه سي پيسدير؟ بونون هاراسي خييانتدير؟ بونون کيمه ضرري وار؟ هر حالده بلليدير کي ميللي بير سيمگه نين يارانماسي بير چوخلو اؤز باشينا ليدئر و قوروما ضرر ووراجاقدير، آما، سيزجه ميللي قازانج و بيرليک اؤنمليدير يا تشکيلاتلارين ياساق ماراخلاري؟

گئچي قاليب جان هايينا، لوتفن قصاب پيي آخدارماسين!

بايراغ يا سيمگه قونوسو گونئي ميللي هرکاتيني يئني و تام آنلاميندا ده ييشيک بير دنمه گتيريب چيخارديب. ايللردير گونئي هرکاتي اوچون بير موشترک سيمگه نين ياراديلماماسي ندنلري نه اولا بيلير؟

بللي اولدوغو کيمين، بو گونه قدر ايکي يا اوچ قوروم طرفيندن اؤز باشيناليغلا بايراغ اورتايا چيخيب. اؤز باشينا دئمگين ندني اونا گؤره دير کي بو قوروملار ايلک اؤنجه اؤنري اولاراق سوندوقلاري بايراغي داها سونرا تشکيلات بايراغي و داها سونرادا گونئي آذربايجان ميللي بايراغي اولاراق مئيدانا چيخاريبلار! حيله بازليق و ديکتاتورلوق، آنلاييشسيزليق و سايقيسيز اولان بو قوروملارا ندن بو گونه قدر کسکين اعتيراض اولمونلاييب و گونئي هرکاتين ييپراتان سيمگه مسئله سي چؤزولمييب؟

سون زامانلاردا گونئيدن بير سيمگه اؤنريسي اورتايا قويولدو. ايلک دفعه اولاراق، بير اؤنري ميللي فعاللارين گؤروشون توپلاماغ اوچون کامويونا سونولدو! بو اولاي گرچکدنده گونئي ميللي هرکاتيندا يئني دؤنمين باشلاماسينا ندن اولوب.

سيمگه ني کيملر و نه آماجلاق اؤنريبلر بير قونودور، آنجاق بو گونکي دورومدان ميللي قازانجلاريميزين ايلرله مه سي اوچون يارارلانماغ باشقا بير قونو، و حتّی ان اؤنملي قونولاردان بيري!

من شخصن گوناز-دا گئدن سيياستلري به ينمه ديگيمه گؤره، اونلارين ايشلرينه داها باش قوشماغ آماجيم يوخدور، آما بو گئجه ايلگينج بير اولايا شاهيد اولدوغوم اوچون، مجبوري بو مقاله ني يازماغا قرار وئرديم.

اونوتماميشام کي جناب اوبالي نين دستورو ايله تئلئفونلاريمي کسميشلر، باي بک سيته سين صيرف منه باغلي اولدوغونا اينانديقلاري اوچون تخريب ائتميشلر و هر فيرساتدان آذربايجانين تاريخي دوشمنلري اولان باتي اولکه لرين سيياستلرين اويقولاميشلار! اولسون، دوشونجه آيريليغي اولور آما، ميللي وارليغلاردان واز گئچمک بيزيم حرکتده خييانت آدلانديريلير. اگر گوناز و رهبري بو سؤزلره اعتيراضي وارديرسا، گلسين ايفشا ائتسين!

بايراغ مسئله سينه گلينجه، احمد اوبالي بو گئجه ايلگينج تاويرلارلا سانکي هاميني موحاکيمه ائده جک قدر گوجه صاحيبدير کيمين، گله جک گونلرده هاميني محکمه يه چاغيردي! هر حالده تئلئويزيوني ايزله ينلر آنلاييرلا نه دئمک ايسته ديگيمي!

بايراغ ياراتانلارا، سيمگه اؤنرنلره و او اؤنريلري تارتيشانلارا سانکي خييانتکارديرلار کيمي سالديران جناب اوبالي، اونوتوبدور کي باشخانلاريندان بيري اولدوغو گايپ چته سي نين حاضيرلاديغي پارچاني ساعاتلرجه تئلئويزيونوندان رکلام ائديبلر! صيرف گاموح-آ سالديرماغ اوچون، گئديب هر تورلو پارچالارين يارانماسينا مئيدان حاضيرلاييب و اونو تئلئويزيوندا ميلته قبول ائتديرمک ايسته ييبلر! اوستو آچيلاندادا، تشکيلات بايراغي دييه رک اورتادان قاچيبلار!

سؤزلريمين هاميسينا سنديم وار، دئسينلر کي يالاندير، سندين همن اؤنلرينه قويوم.

اگر اوبالي بئي گرچکدنده آذربايجان ميللي هرکاتينا اؤرک يانديرير، پس ندن ميللي فعاللارا سالديراراق، اونلارا تؤهمت ووراراق و اونلاري تهديد ائديرميش کيمي تاورييلا پروقرام حاضيرلاياجاغيندان بحث ائدير؟ اگر بو پروقرام بايراغ و سيمگه قونوسونا دئموکراتيک شکيلده ياناشاجاقديرسا، پس بو ايفتيرالار و شانتاژلار ندن قايناغلانير؟

من بئله اينانيرام کي بير چوخلو ضيالي آرتيق گوناز لا دانيشماغ ايسته ميرلر، دانيشماغا راضي اولان بير نئچه سيده اولسادا، آرتيق بو سؤزلري ائشيتديکدن سونرا هر حالده اؤزلرين کنارا چکه جکلر!

آخي نئجه اولور کي هم هامييا خائيين دييه سن، همده اونلاري تارتيشماغا دعوت ائدسن؟ سالديريلارا معروض قالانلار پروقراما قاتيلماغي اؤزلري نين کيچيلمه لري کيمي ديرلنديريب و واز گئچديکلرينده ده، جناب اوبالي هامي خائييندير ديه اؤزون قاليب تانيتاجاق و من حاقلييام دئيه جک! يوخ جناب اوبالي، بو يولون سونو سيزه هئچ نه باغيشلايان اولماياجاقدير!

اگر بير سورونا توخونماغ ايسته ييرسيزسه، او قونويلا ايلگيلي هر کسه سايقي ايله ياناشماليسيز، هر زامان دئييرسيز کي بير تشکيلاتا باغلي دييلسيز، نه ايسه من اينانمارام آما…، او زامان سيز طرفسيز اولاراق صيرف مسئله نين آيدينلانماسي اوچون پروقرام حاضيرلاماليسيز! سانکي سيزين تشکيلاتين بايراغينا ايهانت اولوبموش کيمين، يئني سيمگه و اؤنريلن بايراغلارا تووهين ائده رک اونلاري قوندارما آدلانديريسيز! لوطفا سيزده تيکراري سؤزلردن دئمه يين کي بيزيم بير دنه ميللي بايراغيميز وار! سؤز بوردا گونئيدن گئدير و گونئي اوچون يئني و موستقيل بايراغين اولماسينا عاغيللا ياناشان هر کس اعتيراف ائديب.

سيمگه و بايراغ مسئله سينه توخونماغ ايسته ين اؤزگور و دئموکرات بير تئلئويزيون، ايلک اؤنجه اؤز چاغيريشي باره ده دوشونمه ليدير. دعوت آدينا قوناغلاري اولکوتمک آخي هاردا گؤرونوب، هاردا قبول اولونان بير ايشدير؟

جناب اوبالي، اؤزو ييخيلان آغلاماز! سيزين آپارديغينيز تخريباتچي سياست سونوندا سيزه قاييداجاق، نئجه کي قاييديبدير! د.ا.ک گئنه سيزلرين برکتيندن پارچالاندي، خاطيرليرام کي ايران-لا عراق ساواشيندا بير نئچه ايرانلي پيلوت (خلبان) اوچوغلاري عراقا آپاريب و اورا سيغينديلار، اولاي موللالارين بيرينه چاتديريلدي و او دئدي کي: هئچ نيگاران اولمايين، اوچوغلارين سندي بيزيم آديميزادير! اينديده د.ا.ک پارچالانيب آما، مؤهورلري بعضيلرين الينده دير! گلين ياريشاغ گؤرک کيم داها هيزلي قاچار! بو دا سيزين اؤنريزدير کي د.ا.ک-ي پارچالاديقدان سونرا اورتايا آتيبسيز، کيم چوخ ايشلرسه او بيري اونا قاوشمالي اولسون! کيمينله و نه اوچون ياريشيرسيز اوبالي بئي؟

حئيف، داها چوخداندير کي سيزلرله تارتيشماغا سون وئرميشم، آما گئنه ميللي موجاديله ميزه ماراخلي اولدوغوم اوچون مجبور اولدوم بو يازيني يازام. آما، من يا منيم کيمينلر اولماسالاردا، سيزين و هاميميزين ايشلري مرجک آلتيندادير و بير گون هاميميز جاواب وئرمه لي اولاجاييق. ۳ ساعاتليغ پروقرامين ۲.۵ ساعاتي آمريکانين ايرانا قارشي يوروتدوگو سيياسته صرف اولونورسا، ائله اوندا سولدوز، اورمو، کرکوک، ناخچيوان، قاراباغ، بورچالي، تورکمنصحرا و انزلي کيمي يئرلره گئتمک ايمکاني اولماياجاقدير! آخي او قالان ياريم ساعات ايچينده ده اينسان هاقلاري يادا فارسجا مقالرلر اوخوناجاقدير!

تشکيلاتلارينيزين هاميسين توپلاسانيز، باتي آذربايجاندا جانييلا چاليشان گئنج عسگرلريميزين بير دقيقه سي نين قازانجيني بيله الده ائده بيلمه سيز! تک سيز يوخ، سوزوم توم خاريجده کئيفه مشغول اولان قوروملا و شخصلردير! ان آزي، گئچن ۱۵ ايلده نه لر ائديبلر بو خاريجده ياشايانلار؟ اؤزلري بيربيرين قبول ائديبلر مي؟ نئجه اولور کي ايچريدن بير قالخيش، بير حرکت و بير ايلرله مه مئيدانا چيخاندا هامي گئدير ميکروفون آرخاسينا؟ ياني کي گونئي هرکاتي نين ليدئريديرلر مي؟ يوخ آرتيق، اينانميرام ايچريده کي لر بو سهوه بير داها يول وئرسينلر.

منجه، سيز گله جک جانلي يايينيزدا بو چاغيريشينيزا دوزه ليش وئرمه ليسيز، ان آزيندان ايفتيرا آتديغينيز صاديق ميلتچيلردن عذر ايستمه ليسيز، داها سونرا، مدني و دئموکراتيک يول ايله سيمگه و بايراغ مسئله سين آيدينلاتماغ ايسته ديگينيزي آچيقلاييب و قاتيلماغ ايسته ينلري ادب ايله پروقرامينيزا دعوت ائتمه ليسيز. او تي.وي اگر دئديگينيز کيمي ميللي هرکاتا حصر اولونوبدورسا، او زامان ميلتيميزين هر تورلو دوشونجه سينه اوندا يئر وئرمه ليسيز! سيزين سانسورالارينيز، سس کسمه لرينيز و ميللي فعاللارا شارلاتان دئمکلرينيز گونازين گئچميش ايميجين آرادان آپارير!

گونئي هرکاتي اوچون بير سيمگه، گونئيده ياراناجاق اولان دئولت اوچون بير بايراغ و ميللي بيرليگي الده ائده بيله جک گوجونه ماليک اولان بير اورتام يارانماليدير. سيزين و بيزيم چاباميز بو يولدا اولاجاقدير! نوستالژيلره، فانتازيلره و خولييالارا قاپانماقلا، نه آذربايجان موستقيل اولاجاق و نه بيزلر ليدئر!

ميلتيميز نه سيزين و نه باشقاسي نين ياراتديغي پارچالاري ايسته مير! بو ميلتين پارلامئنتي يوخدور، رئفئراندوما دا ايمکان يوخدور، ان آزي بو سينيخ سالخاخ قوروملار چيخسينلار اورتايا و آچيقجا سؤزلرين دئسينلر، ايچريدنده بير نئجه نفر تاپيلار کي سؤزلري ديشارييا يئتيرسينلر. بو اولار گئچيجي بايراغين سئچمه پروسئسي نين باشلانماسي! يوخسا سيز دئيين اونلار ساتقيديلار و آرا قاريشديرماغ ايسته ييرلر، اونلار دئسين سيز ساتقينسيز و خاريجه قوللوغ ائديرسيز، من دئييم کي ايسته ميرم قارا اولسون، او دئسين کي ايسته ميرم ساري اولسون، پس سوتلري کيم ساغاجاق؟

لوطفا ايلک دفعه يارانميش اولان بو دئموکراتيک تارتيشما مؤوقئييتيميزي کورلامايين، اونا قارا ياخمايين و بوراخين تا ايلک و سون اولاراق سيمگه مسئله سي اؤز سونوجونا وارسين. بايراغسيز قالديقجا، گونده بير نفر باشقا تشکيلات قورماغ فيکرينه دوشه جک!

گئچي قاليب جان هايينا، لوتفن قصاب پيي آخدارماسين!

تبريزلي باي بک
۰۲/۰۸/۲۰۰۸
کرويدون