بير گون يوخيدي، ائله بو گونده يوخدور! تبريزلي باي بک

بای بک، آذربايجان | اُرتاگؤن, ۱۰-ي قويروخدوغان , ۱۱۰۰۸ اینجی ایل, چولا ۲۲:۳۹ [آ.خ] | یازی و قوشوق

بونلارا آدليم يازارلار، روحانيلر، چاليشقان اؤيرنجيلر و دانيشان آغساققاللاريدا آرتيرسام اگر و يوخارييا باخيب اونلاري سايسام، ان آزي ۳۹ قوروم و ساييسين بيلمه ديگيم آدليم يازار، روحاني، چاليشقان اؤيرنجي و دانيشان آغساققالل الده اولاجاقدير. ياني کي، داياناجاغ اولان بير ضيالي توپلومو، اينانيلاجاغ اولان بير سس و سؤيکه نيله جک اولان بير داغ واريميزدير کيمي دئمک اولاجاقدير! آما، سيزجه بو دوغرومودور؟

سؤز گونئيدندير…

دئييرم اؤزومه کي، آ جانيم آذربايجان آدينا بير چوخلو قوروم يارانيب، بو قوروملارين آغيز دولدوران آدلاري وار، اونلاري يؤنتن يئکه-يئکه ضياليلار وار، اونلارين ايللرجه سابيقه لري وار و ان اؤنمليسي، اونلارين هر بيري نين اؤزونه اؤزل دوشونجه سي وار!

بونلاري اؤز اؤزومه دئييب سونرا اؤزومدن سوروشورام کي، آ جانيم، بو قوروملار گرچکدن وار ميديرلار؟

آتا آنالاريميز دئميشکن، بير گون واريدي، بير گون يوخيدي! آنجاق من بئله گؤرورم کي بو قوروملار هئچ او بير گونده ده وار اولماييبلار! اونا گؤره ده يازيمين آدين ائله سئچميشم.

بير قيسسا باخيشدا بو قوروملاري گؤرمک اولور:
- گاموح (گونئي آذربايجان اويانيش هرکاتي)
- گايپ (گونئي آذربايجان ايستيقلال پارتيسي)
- داک (دونيا آذربايجانليلاري کونقرئسي)
- دداک (دئموکراتيک دونيا آذربايجانليلاري کونقرئسي)
- گاک (گونئي آذربايجان کونقرئسي)
- آمات (ازربايجان ميللي آزادليق تشکيلاتي)
- آمدت (ازربايجان ميللي ديره نيش تشکيلاتي)
- مپ (ميللي پارتي)
- مش (ميللي شورا)

بونلارا بلکي رسمي اولمايان قوروملر يا سيته لريده آرتيرسام اگر:
- آزاد تريبون
- تريبون
- باي بک
- اويرنجي
- آزوح
- فدرالچي
- يورد
- آچيق
- دورنا
- باتي-آز (باتي آذربايجان مودافيه کوميته سي)
- گوناسکام (گونئي آزئربايجان سوسيو-کولتورئل آراشتيرمالاري)
- قادين (ازربايجان قادينلاري)
- تومروس
- آزقالا
- گوناز تي.وي.
- سولگوناز
- آرمان
- آزبيليتوپ (آزربايجان بيلييوردلار توپلومو)
- آذرآنلاين
- تورک ايران

بونلارا اينسان هاقلاري قورويان قوروملاريدا آرتيرسام اگر:
- دونازهاک (دونيا آذربايجانليلاري نين هاقلاريني مودافيعه کوميته سي)
- آداپپ (Association for the Defense of Azerbaijani Political Prisoners in Iran)
- آسمک (آزئربايجان سياسي مئهبوسلاريني مودافيعه کوميته سي)
- ساوالانسسي (آزربايجانلي مهبوسلارين هاقلارين قوروماغ اوچون يارانان سيته و قوروم)

بونلارا کولتورل و ادبيياتا هسر اولونموش قوروملار يا سيته لري آرتيرسام اگر:
- بايقوش
- ايملر
- يازي
- کيتابلار
- سوزوموز

بو قوروملارين دوشونجه سينه ماييل اولانلارين ساييسينا گلينجه، دئمک هر تور دوشونجه صاحيبي بو قوروملارين بيرينه يئرلشه جکدير. اونلارين ايچينده ميلليتچيدن توت تا سولچويا، دئموکراتدان توت تا ليبئرالا، سوسييالدان توت تا ديکتاتورلوغا قدر گئنيش آلان واردير.

داها اؤنجه کي يازيلاريمدا کي اؤزلليکله يئني تارتيشيلان سيمگه و بايراغ قونونسونا توخونولوب، آچيقجاسينا آد آپارديغيم و آدلارين اونوتدوغوم قوروملاري بيرگه قرار آلماغا چاغيرميشديم. ياني کي، بير ماسا آرخاسيندا اوتوماغا چيخارلاري اولماسادا، ان آزيندا اؤز آدلارينا بالاجا بير بيلديري يايسينلار!

من داها دوشونمک بيله ايستميرم کي ندن بئلنچي اؤنم داشييان قونودا هامي سوسوب و زامان اؤلدورمه يه مشغولدور!

دئميشديم کي اگر بو دفعه ده ميللي فعاللار سوسوب و گيزلنسه لر، يئني اؤنريلن سيمگه اؤز يولوندان جايديريليب و يئني ايختيلاف قايناغينا چئوريله جکدير. دئميشديم کي سيمگه ني اؤنرنلرين نييتي هر نه قدرده ساغلام اولسا، اونا سالديران چيرکين ايفتيراچيلارين قارشيسيندا اؤز اؤزگورلوگون الدن وئره جکدير. دئميشديم کي بو قونودا بير داها سهوه يول وئرمه مه ليگيک! آما من دئديم و ائله منده ائشيتديم.

باخين اينديکي دوروما!

سؤز صاحيبلري نين سوسماسي سونوجوندا، اؤز باشينا بايراغ تهميل ائديب و ميللي حرکتين بوغازيندا تيکانان ديکتاتور دوشونجه لي شخصلرين سالديريسي باشلادي! سون گونلرده شاهيد اولوروق کي کؤکو بللي اولمايان ايتتيهاملار بيانات آدينا يازيلماقداديرلار!

بو اولاي نه يي سابيت ائدير؟ آيا اونو گؤسترمير کي باشيميزا هر نه گليب قورخاغ اولدوغوموزدان اولوب؟ اونو گؤسترمير کي بير دليکدن مين دفعه سانجيلان ميلتيک؟ بونو گؤسترمير کي بيز گرک اؤزوموزو آرادان آپاراق، يوخسا گوزگونو سينديرماغلا گؤرونتو دوزگون اولان دئييل؟

من آچيقجاسينا اؤنرميشديم کي بو گون تارتيشما گونودور. بو گون آييلماغ گونودور و ائله بو گوندور کي بيزلرين ۱۰۰ ايللرجه اسارتميميزين بيتمه سينه گئدن يولون آيدينلاتا بيلر. بير سيمگه ني تارتيشاراق سئچمک گوجونه بيله صاحيب اولمايان توپلوم اؤز موقددراتين مي الده ائده جک؟ خايالدير، و يالانجيل بير ياشام.

دئمک ايستيرم کي، هامي دانيشاندا گونئيده کي آغير باسقيدان دئيير، دئيير کي اوردا سس چيخارتماغ قولاي دئييل، دئيير کي اوردا تشکيلاتلاشماغ قولاي دئييل، دئيير کي اوردا بئله دير و اوردا ائله دير! آنجاق، يئري گلنده، هامي پارلامئنت و دئولتچيليکدن دانيشاراق اؤز دئديکلرينه آفتافا گؤتورور (بو سؤز تربييه سيز کيمي گؤرونسه ده، آنلامي يوخاري توپورمک کيمين آلينماليدير).

اگر دئييرسيز کي ميللي بايراغ سئچمک پارلامئنت ايشيدير، پس بو پارلامئنتي قورماغ اوچون نه ائديرسيز؟ اگر ميللي موقددراتي اله آلماغ ايستيرسيز، هانچي ميللي بيرليگي ياراديبسيز؟

يالان و تاولايان سؤزلردن آچيغيم گه لر، داها دوغروسو، ائله آداملاردان زهلم گئدير! اؤزلرين نه سانيرلار؟ هاردا اوتوردوقلارينا هئچ دوشونورلر مي؟ ميلتيميزي قانديرماغا مي چاليشيرلار؟ يوخسا بير گيزلي-ساخلي اولاي واردير کي يازنليز اؤزلري بيليرلر؟

ميللي موجاديله آدينا مئيدانا گليب آنجاق ميللي هرکاتيميزا مانع تؤره دن فعاللارين گرچک اوزون نئجه گيزلي توتماغ اولار آخي؟ بو خييانت دئييل مي دير؟

ميللي موجاديله ميزي ميللي دوشونجه ايله باشلاماغ، ميللي بيرليکله دوام ائديب و ميللي وارليقلا قازانماغ اولا بيلير. گونوموزده ميللي بيرليک ياراتماغ اوچون، بير سيمگه نين اولماسي واز گئچيله بيله جک بير قونو دئييلدير. بو سيمگه اولماليدير، هر نه اولورسا اولسون، هر نه طرح و بويادا اولورسا اولسون، يئتر کي اولسون و هاميميز اونون دالقاسي آلتيندا توپلاناغ.

بو سون سؤزومدور کي او ساختا فعاللار دئييرم. توپارلانين و ميلتيميزين گله جگيله اوينامايين. سؤزونوز، گوجونوز و ايسته کي نيز يوخدورسا، يولدان چکيلين و مئيداني ارلره تاپيشيرين. بلليدير کي اون ايللر بويو اؤز باشينيزا ياراناراق بير قازانج الده ائتمه ييبسيز، ان آزيندان اوتوزماغا ندن اولمايين.

دئميشديم کي ميللي هرکاتيميزين ايلرله مه سي و اينکيشافي بو يالانجيل شخصلر و قوروملارا باغلي دييلدير. ايچريده ياشايان و بير گون حبسده قالانلارين گوجودور کي اون ايل بيزيم ميللي هرکاتي اؤنه سالير. عباس لئيسانلي-لار، عظيمي قديم-لر و ليلا حيدري-لردير کي ميللي هرکاتا گوج وئريب و اينکيشافينا ندن اولورلار.

دونيادا اولان ايلريله مه، فارسلارين تزييقي ندنيله گونئيدن اوزاق توتولورسادا، گونئي اؤز ايچيندن ايلرله مگي باشاريب، اينديکي ايلرله ميش هرکات منيم يا ساختا ليدئرلرين گوجويله الده اولماييب. بو گونش دوغاجاق، خوروز بانلاسا يا بانلاماسا!

اورتادا ميللي بير سورون وار، اؤنريلن بير نئچه چؤزوم. اونلارين ايچيندن بيرين سئچه رک بو سورونو بير دفعه ليک چؤزمک هم منطيق و هم سيياسته اويان بير آدديمدير.

سيمگه نين اؤنريلمه سي و لازيمليگين فارس يا اطلاعاتا باغلايانلارا دئييم کي، گؤزونوزو آچين و بو اولايدان درس آلين. اگر سيمگه ني اطلاعات اؤنريبديرسه، واي سيزلره کي فارس گوجلري سيزين ليدئرليک ائتديگينيز حرکتي يؤنلنديرمک گوجونه ماليکدير! واي سيزلره کي گرچکلردن قاچماغ اوچون اؤز چيرکين ايشلرينيزي سورو آلتينا ساليرسايز! سيزي کيم صلاحييتلي تانئييب کي اؤنرديگينيز سيمگه ني ميللي بايراغ آدلانديريرسيز؟ سيمگه اؤنريسي لازيم اولان دئييلديرسه، سيزين اؤنرديگينيز سيمگه پس ندن قوتسال اولماليدير؟ آييلين و گؤزلرينيزي دورد آچين. دوشمن يانينيزدا دئييل، دوشمان قارشينيزدا دير!

بير اولايلا سؤزومه سون قويماغ ايسترديم. ايران آدلانان اولکه ده ايسلام دئوريمي يارانديقدان سونرا، او رئژيمي ييخماغ اوچون چئشيتلي ايشلر ياپيلدي. سؤزوم سوپئر گوجلردن گئدير. او يوللاردان بيريسه ايقتيصادي چؤکدورمه کي دي. بونا گؤره، ساختا پوللار چاپ ائله ديلر و ايران آدلانان قلکه نين بازارينا تؤکدولر. گونئيده اولانلار هر حالده بيليرله ندن سؤز ائديرم. او ۱۰۰ تومنليکلر کي مسجد القصي-سي يازيلماميشدي!

هر هانچي بير دئولت اولسايدي، بلکي بو ساختا پوللارا گؤره ده اولسايدي ايقتيصادي اوچوروما دوشموشدي! آما موللالار نه ائتديلر؟ اينانماديغينيز شکيلده، او ساختا پوللاري قانوني ائلان ائتديلر!

نئچه ميليون دولارا مال اولان ساختا پوللار، ايران آدلانان اولکه نين رسمي پولو اولدو! و او پوللاري چاپ ائدن گوجلرسه آغير شکيلده يئنيلديلر!

ايندي حتّی اگر اينانساق کي بو سيمگه ني ايران ااطلاعاتي اؤنريب، و اونون اتکيسينه اينانساق، ياني کي بير سيمگه نين گرکلي اولدوغون اطلاعات بيزدن داها تئز آنلاياراق اوندان سو استيفاده ائتمگه قالخيبديرسا، ائله قوي او سيمگه ني منيمسه يک! يا ان آزيندان باشقا سيمگه سئچه رک اطلاعاتين ايللرجه پول و عاغيل خرجله ديگي پلاني داغيتاق! يوخسا اگر گئنه ده سيمگه سيز قالساق، دئمک اطلاعات ايلده بير دفعه اؤنري وئره جک و آدين قوياجاق گاموح ميللي بايراغي يا گايپ ميللي بايراغي و يا ايران ميللي بايراغي!

آدي گئدن قوروملار، سيته لر و آدي آپاريلمايان ضياليلار، روحانيلر و يازارلار، هامينيزين ميللي بورجونوزدور کي کسکين مؤوقئييتينيزي بيلديريب و سيمگه سورونونون بير دفعه ليک چؤزولمه سينه يارديم ائدسيز. سسسيز قالمانيزين يالنيز بير آنلامي اولاجاقدير، ميللي هرکاتين ايلرله مه سين و بيرلشمه سينه قارشي دورورسوز! آيا بو سوچلا سوچلانماغا راضي اولاجاقميسينيز؟

اؤنريلن سيمگه بير يانا، گونوموزه قدر ميللي بايراغ مقامينا چيخاريلماغ اوچون تهميل اولونان پارچالار بير يانا، آيا بير سيمگه، بير بايراغ کي ميللي بيرليگيميزي ساغلايا بيليب و گله جک آيريليقلارا يول وئرمه يه و بير سيمبول کي آنلي آچيقجاسينا اولوسلاراراسي تانيتيما ده يه بيلجگين سئچيمينه راضي مي سيز؟

آچيقجاسينا يا هن دئيين و يا يوخ. اوندادير کي ميلتيميزده اونون آدينا يارانان قوروملاري و بولانليق سودان باليق توتانلاري تانيياجاق و اونا گؤره آدديم آتاجاق.

اؤز بايراغين قوروماغ اوچون ميللي سيمگه ني قارالاماغا چاليشان گئري قالميش (سياسي باخيمدان) شخصلرين داش آتماسينا نئجه انگل اولا بيليريک؟ اونلاري ميللي هرکاتا داخيل ائتمک اوچون نه لر ائتمه ليگيک؟ بير دفعه ده اولسا بونلارا دوشونمک يارارلي اولاجاقدير.

چوخ آز شخص و قوروم سيمگه قونوسونا توخوناراق دوشونجه لرين بيلديرينلر. آما سؤز بوندادير کي بو دوشونجه لرله سونوجا وارماق اولماز. من دئييرم کي ساده اولاراق بئله بير بيانات يايينلاسينلار کي، سيمگه ني يا قبول ائديريک، يا ده ييشمه سين ايسته ييريک و يا باشقا اؤنريميز واردير کي تارتيشمايا چيخماسين ايسته ييريک. اوندادير کي هاميليقجا اوتوروب و اؤنريلردن بيرينه سس وئريريک. سئچيلنسه، گئچيجي اولاراق دئولتسيز، پارلامئنتسيز و باسقي آلتيندا اولان بير حرکتين بير تک تانيتيمي اولاجاقدير.

قوروملارين چوخ اولماسي، دوشونجه لرين چئشيتلي اولماسي و سسلرين دئموکراتيک يوللا آلينماسي بونو ايثبات ائده جکدير کي ميلتيميزين چئشيتلي دوشونجه لرينده اولان کوتله لريندن بير نوماينده سس وئرمه ده ايشتيراک ائديبدير. ياني کي، سئچيلن سيمگه ميلتيميزين ايسته کي و دوشونجه سينه بير آزدا اولسا ياخين اولاجاقدير!

توپلومو بير آرايا گتيرمک اوچون بير سيمگه لازيمدير، حتّی ديني توپلوملارين بيله سيمگه لري وار! بيزيم ميللي توپلومون ندن اولماسين؟

بيرليک و اينکيشاف اوچون بيرگه سيمگه ميزين اولماسي گرکليدير

تبريزلي باي بک
۳۱/۰۷/۲۰۰۸
کرويدون