گونئي آذربايجان ميللي سيمگه سي!

گونئي آذربايجان ميللي سيمگه سي! - بؤيوک رسولوغلو

بای بک، آذربايجان | یئیگؤن, ۴-ي قويروخدوغان , ۱۱۰۰۸ اینجی ایل, چولا ۲۲:۱۸ [آ.خ] | یازی و قوشوق

بو وسيله ايله، ياخيندان تانيماديغيم آنجاق يازي و فيکيرلريندن هر زامان فايدالانديغيم ديرلي يازاريميز سايين آيدين بي تبريزلي نين سئچگي سورقوسونا موناسيبت بيلديرمک اوچون بيان ائديرم کي، من “قارا آي – اولدوزلو سيمگه يه” سس وئريرم.

ياشاسين آذربايجان – تانري تورکو قوروسون

گونئي آذربايجان ميللي سيمگه سي تکليفي داخيلده فعاليت گؤسترن بير قروپ ميللي گنجلريميزين طرفيندن اورتايا چيخديقدان سونرا چئشيتلي دارتيشما و يازيشمالارا سبب اولموشدور. بؤلونمه دن، اؤزلليکله تورکچو و ميللي تفککورلولرين پارچالانماسيندان ديسکينن بعضي دوستلاريميزين چکينگنليگينه باخميياراق بو موزاکيره لر “آذربايجان تورک ميلتي نين” بؤيوک سياسي اينکيشافيندان خبر وئرمکده دير. اؤز داخيليميزده دئموکراسي سيناوينا چئوريلن بو تکليفي وئرنلئره بيرده اونا گؤره بورجلويوک کي، چاغداش ميللي هرکاتيميزين گئچميشيني، بوگونونو و گله جگي نين سياسي تهليليني دوزگون ترزيده اؤلچه رک ايره ليگه دوغرو بؤيوک بير آدديم آتميشلار.

بو تکليف اطرافيندا موباحيسه لر او قدر دئموکراتيک، تيتيزليک و ميللي منافعميزي قوروياجاق بيچيمده گئتدي کي، هر فورصتدن آرا قاريشديرماق مقصدي ايله سويستيفاده ائتمه يه چاليشان دوشمنين گؤرونموين اللري چاش-باش قالديلار. بير ميللي تشکيلاتيميزين آديني اوغورلوياراق تکليف ائديلن قارا آي- اولدوزلو سيمگه ني او تشکيلاتين بايراق تکليفي کيمي گؤسترمه يه چاليشان بيلديريش و بيرده سيمگه ايله بايراغي قاريشديرماق ايسته ين بير- ايکي ياراماز يازيدان باشقا هئچ بير آخساقليق يارانمادي. دئموکراسي يوخلاماسيندان باشاريلي چيخان ميلتيميزي تبريک ائده رک بير داها وورقولاماق ايسترديم کي “بوتون دردلرين درماني دئموکراسيده دير”.

دئموکراسيدن دانيشارکن بوتون موثبت تنقيدي فيکيرلرين آزاد و اوشنمه دن اورتايا آتيلماسي نين واجيبليگيني و بير بيريميزه حؤرمتله ياناشاراق خطالاريميزين سندللرله اورتايا قويولماسيني اونون بير آياغي کيمي قبول ائتمک گره کي ر. بو آرادا بو موزاکيره لرده کي تنقيدلرين آذربايجانليلارين ادب و نزاکتينه ياخيشار بيچيمده گئتمه سي، باشقالاري نين علئيه اينه شاييه، شانتاژ و قاراياخما چيرکينليگيندن قورتولاجاغيميزين موشدولوقچوسو اولدوغومو وورقولاماق گرکمکده دير.

موباحيسه لردن آنلاشيلديغي کيمي تقريبن هئچ بير شخص ويا قروپ ويا تشکيلات بوگونکو اورتامدا گونئي آذربايجانا ميللي سيمگه، بير داها تيکرار ائديرم “ميللي سيمگه” يارانماسي ايله موخاليف اولماميشدير.

بو دارتيشما و موزاکيره لري بير کوورديناسيون صحيفه سينده يئرلشديريب، اوندان قيزيل خطي چيخاراراق نظر و سس وئرمک هر بير گونئيلي نين حاقي و عئيني حالدا بورجودور.

گونئيده فعاليت گؤسترن ديرلي بير قروپون بير فرديندن آلديغيم شخصي مکتوبدا بو آغير شرايتده آچيق مکتوب يازاماديقلاريندان اوزوله رک آي-اولدوزون تورک رنگي اولان ماوي بويانماسينا موثبت باخديقلاريني وورقولاماق ايسترديم. بو ديرلي شخصييتيميزين تکليفي بئيين يارقانلاريمدا بير قيوريلما ياراتسادا سئچديگيم قيزيل خطين فايادالاريندان واز گئچمه ديم.

اونا گؤره، بوتون عاميل و ائتکنلري نظرده آلاراق گونئي آذربايجان اوچون سيمگه تئکليفيني ايره لي سورن ديرلي جاوانلاريميزين اؤنري و آچيقلامالاريني يئترلي و موثبت ديرلنديره رک اونون فايدالي اولاجاغينا اينانيرام.

ياشاسين آذربايجان – تانري تورکو قوروسون

درين سايقيلاريملا؛
بؤيوک رسولوغلو
۲۵/۰۷/۲۰۰۸