قارا اولدوز ! - صمد نيکنام

بای بک، آذربايجان | یئیگؤن, ۴-ي قويروخدوغان , ۱۱۰۰۸ اینجی ایل, چولا ۱۵:۱۴ [آ.خ] | یازی و قوشوق

دئييرلر ماليني يئميه نين ماليني يئيرلر. تاريخينه يييه دورمايانين دا، تاريخينه و بايراغينا دا يييه دوررالار.

آما، من امينم کي، قارا اولدوز کشف ائدنلردن و اونون موباحيسه سيني آپارانلاردان فرقلي اولاراق، آذربايجان ميلتي اؤز سولاله لرينه، بايراغينا و بوتؤولوکده تاريخينه يييه دوراجاق و يئر اوزوندن ايزسيز، سوراقسيز ايتميه جکدير.

بدبخت همشري نين پايينا اولدوزون دا قاراسي دوشور!

تاريخي وارليقي ايستيقامتلنديرن منليک وارليغيدير. بوتون تاريخي وارليغيميزدان واز کئچمکله، اصلینده منليگيميزدن و کيمليگيميزدن واز کئچميش اولوروق.

اگر، بو دونيادا ايزسيز- سوراقسيز ايتمک ايستميريکسه، تاريخيميزه يييه دورمالي، کيمليگيميز و وارليغيميزي قوروماليييق. اونا گؤره کي، کئچميشينه يييه دورمايانين گله جگي يوخدور. بئله بير سؤز ده وار دئييرلر “کئچميشينه داش آتسان گله جک سني توپا باغلار”.

بعضيلري بوتون تاريخي کئچميشيميزي، او سيرادان سولاله لري، دؤولتلريميزي و تاريخي دؤولت نيشانلاريميزي، ائلجه ده، دؤولتچيليک تاريخيميزي اؤزونده داشييان بايراغيميزي فارسلارا باغيشلاييب، بيزه ايسه ب.ا.ب تلسکوپونون کشف ائتديگي قارا اولدوزلو بايراق سيريماق ايسته ييرلر.

مسئله بوندادير کي، هر شئي گؤرموشدوک آما، اولدوزون قاراسيني گؤرمه ميشديک. بو بؤيوک کشفدير، قارا اولدوز.

بير گون باکي-دا بير هامبال کوچه ايله گئديرميش. هامبال گؤرور سس گلير، بيري دئيير: آ بئي، آ بئي !

هامبال يولونا دوام ائدير. گؤرور يئنه آ بئي، آ بئي دئيه رک کيميسه چاغيريرلار. هامبال فيکيرلشير کي، يقين کي، منيمله اولمازلار و يولونا دوام ائده رک گئدير.

هامبال گؤرور يوخ، يئنه سس گلدي : آ بئي، آ بئي!
هامبال دؤنور دئيير : منيمله سن؟
چاغيران آدام دئيير : سندن باشقا کيم وار کي، البتده سنينله يه م.
هامبال دئيير : نه دئييرسن؟
چاغيران آدام دئيير : ساعات نئچه دير؟
هامبال دئيير : ساعات ۲۵-دي .
آدام دئيير کي، دلي اولموسان ۲۵ ده ساعات اولار؟
هامبال دئيير، بس هامبالدان بئي اولار؟

گؤرونور هله چوخ شئي اولاجاقميش، مثلن قارا اولدوز دا کشف اولاجاقميش.

سيزين باشينيز قارا اولدوزلا مشقول اولسون، گؤرک فارس قارداشلاريميز نه ايشله مشقولدور.

فارس قارداشلاريميزين تشببوسو ايله، فرانسانين مرکزي پاريسدن ياييلان آلمانجا-فارنسيزجا ياييلان “آرته” تئلئويزيا کاناليندا قاجار سولاله سي نين شکيللريني گؤستريرلر و دئييرلر بونلار فارس سولاله ريدير. فارسلار بونونلا تاريخيميزي اؤز خئييرلرينه موصاديره ائتمک ايسته ييرلر. هله ليک بايراغيميزا يييه دورموشلار، نؤوبه سولالريميزه و دؤولتچيليک تاريخيميزه چاتيب. صاباح دا دئيه جکلر کي، سيز گؤبلکسينيز، يئردن چيخميسينيز، نه دؤولتينيز اولوب، نه دؤولت نيشانلارينيز اولوب، نه کئچميشينيز وار، نه ده تاريخينيز.

دئييرلر ماليني يئميه نين ماليني يئيرلر. تاريخينه يييه دورمايانين دا، تاريخينه و بايراغينا دا يييه دوررالار.

۲۵/۰۷/۲۰۰۸