دویغوسال بوتوولوک وسواسی و یالانچی «توهم» لار!

دویغوسال بوتوولوک وسواسی و یالانچی «توهم» لار! - آیدین تبریزلي

بای بک، آذربايجان | باشگؤن, ۳۱-ي قوراپيشيرن , ۱۱۰۰۸ اینجی ایل, چولا ۰۲:۱۴ [گ.ؤ] | یازی و قوشوق

(آيدين تبريزلي-نين سون مقاله سينده سئوينديريجي اولاي باش وئريب. سيمگه يا بايراغ قونوسوندان آيري اولاراق٫ جناب تبريزلي اؤز آدلارين “آيدين تبريزي” يئرينه “آيدين تبريزلي” يازميش اولوبلار. بو سئوينديريجي حرکت ميللي حرکاتيميز دوغرولتوسوندا مثبت آدديم کيمين ده يرلنديريلمه ليدير. آرزو ائيديرک هاميميز اؤز آنا ديليميزده آنلامي اولان آدلارا گئري قاييداق. باي بک)

یئنی بیرلیک سیمگه چاغیریشی ^(۱) آردیندان، چوخلو مباحثه لر و فرقلی فیکیرلر اورتایا قویولور کی منجه بو فیکیر تارتیشمالار بیزیم گیزلی پرابلئم لری میزی اوزه چیخاردا بیلر. بو تارتیشمالار پرابلئمی چوزمک ایچین چوخ گرکلی دیر. نئیه کی اگر بیر خسته لیک تانینماسا، اونا درمان یولو تاپیلا بیلمز. آزاد تریبون سیته سینده یاییلان پالتاکدا گئدن مباحثه لرین یازیلمیش سسینی دینله مکدن سونرا بعضی آذربایجان فعاللاری آراسیندا بیر دویغوسال بوتوولوک وسواسین اولماسینی دوشوندوم. منجه بو افراطی دویغوساللیق بیر بویوک پرابلئم دیر کی گونئی آذربایجان مساله لرینی حدیندن آرتیق قاریشدیریب و پرابلئم لره چوزوم یولو تاپماغا مانع توره دیر.

بیزیم بعضی فعاللار آراسیندا بوتوولوک ایسته یینده بیر هیستریک وسواس واردیر کی هر کیچیک مساله اورتایا چیخاندا تئز دویغولانیب و هیسسیاتا قاریشیب و هارای سالیرلار کی آماندی بونو دئمه یین کی آذربایجان پارچالانار!؟ اونلار «گونئی آذربایجان» آدینی دا بئله چکمک ایسته میرلر و توطئه خیالی اونلارین ذهنینی بئله بوره لییب کی، بیر جغرافیا آدینی دا پارچالاماق توطئه سی کیمی گورورلر! بو مساله نی بیر آز دریندن آچماق لازیمدیر.

من بوندان اونجه فیکیرلشردیم کی قوزئی آذربایجان، ایران دولتینین باسقی سی آلتیندا آدینی «قوزئی آذربایجان جمهوریتی» قویماییبدیر و بیر یانلیش آد یعنی «آذربایجان جمهوریتی» نی اوز اوستونه قویوبدور. آما بو مباحیثه لری ائشیدندن سونرا گوردوم کی همین بوتوولوک وسواسی، بو بویوک یانلیشا سبب اولوب دور. بو کی آذربایجانین بیر کیچیک حیصصه سی اوز آدینی «آذربایجان جمهوریتی» کیمی دونیادا تانیتدیریب، بو آنلاما گلیرکی، یئر کوره سینده او جغرافیادان باشقا، آذربایجان آدلی بیر جغرافیا یوخدور! و آذربایجان آدی اولان بیر میللت و جغرافیا، یالنیز او کیچیک ۸ میلیونلوق اولکه دیر!

بونو داها درین دوشونمک ایچین بیر اورنک گتیرمک ایسته ییرم. گونئی ایرلند جمهوریتی عنوانی هر گون دفعه لرله خبرلرده یاییلیر بیر حالدا کی قوزئی ایرلند بیر موستقیل اولکه دئییل و بریتانیا ترکیبینده دیر. بو دقیقا بیزیم استاتوسوموز ایله عینی دیر. «گونئی ایرلند جمهوریتی» آدی بو بویوک معنانی داشییر کی ایرلندلیلر بیر میللت اولاراق یالنیز موستقیل گونئی ایرلند اولکه سینده یاشامیر، بلکی اونون بیر حیصصه سی ده قوزئی ایرلند ده یاشاییرکی بریتانیا ترکیبینده دیر.

بیر آن دوشونک کی اگر بوگون قوزئی آذربایجان پارلمانی بیر قرار قبول ائدیب و اولکه نین آدینی، دونیا سویه سینده «قوزئی آذربایجان جمهوریتی» تانیتدیرسا، گونده میلیونلار اینسان دونیا خبرلرینده بو «قوزئی آذربایجان جمهوریتی» آدینی تکرار تکرار ائشیدیب و دوشونه جکلر و سوروشاجاقلار کی ندن «قوزئی آذربایجان جمهوریتی»؟ مگر باشقا بیر آذربایجان دا واردیر؟ اونون طالعی ندیر؟ اگر بو اولکه قوزئی آذربایجان دیر، پس آیا گونئی آذربایجان دا واردیرمی؟ آیا سیزجه بوندان اونملی پروپاگاندا یاراتماق اولار کی گونئی آذربایجانین پرابلئمی هر گون هر خبر ساعتینده دونیادا یاییلسین؟ سیزجه اگر قوزئی آذربایجان پارلمانی بو یانلیشی دئیشیب و دوزگون «قوزئی آذربایجان جمهوریتی» آدینی قبول ائتسه، ایران دولتینین رئاکسیاسی نه اولاجاق؟ منجه ایران دولتی بیر آغیر رئاکسیا گوستره جک، بلکی بوتون دیپلماتیک رابطه لرین کسه جک. آما منجه قوزئی آذربایجان بیزیم حرکته یاردیم ائتمک ایسته ییرسه بو هزینه نی وئرمه لیدیر. ایرانین سفیری اوردا جاسوسلوق دان باشقا بیر ایش می گورور؟ ایران ائرمنیستانا می یاردیم ائده جک؟ ایندی ائتمیر مگر؟

آما بو بوتوولوک وسواسی دویغوسونا معروض قالان انسانلار، بونو تام ترسینه آنلاتیرلار کی قوزئی آذربایجان و گونئی آذربایجان آدی، بو میللتی پارچالاماق دئمکدیر!؟ بیلمیرم اونلار میللتی صغیر اوشاق می فرض ائدیرلر؟ یا خود بیر سورو داوار فرض ائدیرلر کی چوبانلار اونلاری هر یانا چکه بیلرلر؟ آیا «گونئی آذربایجان» آدینین توکجه دیلینده جغرافیا معنا سی می یوخدور؟ البته کی وار: یعنی بولونموش آذربایجانین گونئی ده کی حیصصه سی. ۲۱ اینجی عصیرده بیر آد ایله میللتی آلداتماق اولار می، کی سیز باشقا بیر میللت سیز؟ اونلار حتی دئییرلر کی دئمه یین گونئی آذربایجان، دئیین آذربایجانین گونئی حیصصه سی؟!! هئچ دوشونورلر کی بو سوز نه آنلامدادیر؟ بو سوز یعنی کی آذربایجان جمهوریتینین گونئی حیصصه سی کی اولور آراز چایی نین قوزئی حیصصه سی!؟ فرض ائدین انگلیس دیلینده یازاق آذربایجانین گونئی حیصصه سینده (Southern part of Azerbaijan) آنا دیلینده تحصیل یاساق دیر. دونیا اجتماعیتی بو خبردن نه آنلایاجاق؟! آیا بو سوز او آنلامدا دئییل کی آراز چایینین قوزئی حیصصه سینده آنا دیلینده اوخوماغا یاساق وار؟!! بونلار نه گولونج سوزلر و نه یانلیش فیکیرلردیر کی آذربایجان حرکتینه داخیل اولوب و اوزونه انحصاری صلاحیت حاققی تانییر و هامیا دا یول گوسترمک ادعاسی وار؟!

هئچ اونلار بیلیرلر کی شوونیست لر نه قدر بو «گونئی آذربایجان» تئرمیندن قورخورلار؟ شوونیست لر بیزه دئییرلر سیز دئمه یین گونئی آذربایجان دئیین آذربایجان! اونلار بیزه بیرلیک می ایسته ییرلر؟ یوخ! اونلار بیلیرلر کی ایکی اولکه بیر آددا اولا بیلمز. اونلار بیزی آذربایجان و قوزئی آذربایجانی، «آران» تانیتدیرماق ایسته ییر لر! بو دویغوسال وسواس دقیقا شوونیست لرین ایسته دیگی سوزه یول آچیر. بو دوستلار اوز یوخولاریندا آذربایجانی بیرلشدیریبلر و اونون گرچک دونیادا ایکیه بولونمه سینی قبول ائتمک ایسته میرلر و هر کس بو بولونمک حقیقتینی اورتایا قویماق ایسته ییرسه، و بولونموش میللتین پارچالارینی دونیایا پارچالانمیش کیمی تانیتدیرماق ایسته ییرسه، اونا فرقلی بایراق و نشان لازم اولدوغونو وورغولاییرسا، بیر میللتی ایکی یه بولمه یه اتهام لاییرلار!

بو دوستلاری اویاتماق لازیمدیر کی آقارداش، آییلین! بیز یوز ایللردیر بولونموشوک، بویوک حیصصه میز گونئی ده بیر ایالت دولتی شکلینده ده میللی حاکمیتی یوخدور. اوندان علاوه، اوز آنا دیلینده بئله یازیب اوخوماغا دا حاققی یوخدور! اویانین بو شیرین یوخودان! بیزی یالاندان بولونمه میشیک دئیه آلداتمایین. بیزه بو بولوندوغوموزو گیزلتمک تکلیفی وئرمه یین! تام ترسینه بیز گرک بوتون دنیادا اوجا سسله بولوندوغوموزو هارایلا سسلندیرک. بیز دیپلماتیک ساحه ده «قوزئی آذربایجان جمهوریتی» آدینی رسمی شکیلده تانیتدیرماق ایله و «گونئی آذربایجانین» میللی آزادلیق حرکاتینی تثبیت ائتمک ایله، بولونموش بیر میللت اولدوغوموزو هر کیمسه یه اوجا سس ایله دئمه لییک. نئجه کی گونئی و قوزئی ایرلند یا گونئی و قوزئی کوره تئرملری هرگون یوزلرله خبرده تکرار تکرار یایینلانیر. گونئی آذربایجان و قوزئی آذربایجان عنوانلاری، آذربایجانی پارچالاماق یوخ، بیزیم پاچالانمیش بیر میللت اولماق استاتوسوموزو دونیا ایجتیماعیاتیندا تثبیت ائتمک دئمک دیر. بیز بو عنوانلاردان نه کی قاچمامالییق، تام ترسینه، بلکی بو عنوان لاری دونیا مئدیالاریندا قوزئی و گونئی ایرلند کیمی تثبیت ائتمه لییک.

بو بوتوولوک وسواسینا دوشن دوستلار هئچ فیکیرلشیبلر کی ایکی آذربایجان بیرلشمه دن اونجه، گونئی آذربایجانین موستقیل اولماغی گرکلی دیر. ایندی بو مستقیل اولکه یه بایراق ایسته مه دیک! اونا بیر «آد» می لازیمدیر یا یوخ؟ اولابیلر کی بیزده آدیمیزی قویاق آذربایجان جمهوریتی؟! یا سیز دئمیشکن قویاق آذربایجانین گونئی حیصصه سینین جمهوریتی!؟ (Republic of Southern part of Azerbaijan!) سیزجه بو بیر گولونج آد دئییل؟! سیزجه ایکی آذربایجانی بیر بیریندن آییران، ساده جه بیر «آد»می دیر یوخسا گونئی آذربایجانین میللی حاکمیتی اولماماسی؟! بو نه وسواسدیر کی اونولا قورخو سالیب سینیز کی آماندی بیزی بولدونوز! سیز بو بوتوولوک وسواسی ایله، گونئی آذربایجانین بئله آدینی محو ائتمک ایسته ییرسینیز. گونئی آذربایجانین مستقیل بیر اولکه اولماق یولونو کسیرسنیز. ندن؟ قورخورسونوز کی گونئی آذربایجان مستقل اولاندان سونرا، اوزونو مستقل بیر میللت کیمی تانییا و قوزئی ایله بیرلشمک ایسته مه یه! سیز بو یالان قورخونو نئیه بو میللتین جانینا سالیرسینیز؟ کیم بو فیکیر دالیسیندادیر؟ هله گلین گونئی آذربایجانین استقلالین آلین گورخ نه جور آلاجاییق. بیرلشمه یی هله بوش وئرین!

بو دونیا دا استقلال آلماق بو راحاتلیغادیر می؟ عراقین قوزئینده غیر رسمی رئفراندومدا کوردلر یوزده ۹۸ فاییز ایستقلالا سس وئردیلر، آیا اونلارا استقلال می وئردیلر؟! هئچ بو مساله لری دوشونورموسونوز؟ گرچکلری گورمک ایسته ییرسک، بیزیمده یاخین گله جکده ان یوخاری باشاریمز، فئدرال ایراندا بیر میللی حاکمیت اولاجاقدیر. بو او آنلامدا دئییل کی بیز استقلال ایسته مه یک. بیزده گرک هر رئفراندومدا یوزده یوز ایستیقلالا سس وئرک، آما ایستیقلال ایسته مک بیر سوزدور، اونون دونیا گوجلری طرفیندن تایید اولونماسی باشقا بیر سوزدور. کوزوونون ایستیقلالینین نه قدر چتین اولدوغونو هئچ آراشدیریب میسینیز؟ بیزیم ایستقلال ایسته مه ییمیز همان قدر چتین اولاجاق.

بو پالتاک موباحیثه لرینده اونری لرین یاخشی پیس اولدوغو باره ده هئچ بیر سوز گئتمه ییب و مباحیثه بوردا گیر ائله ییب کی عجبا بیر سیمگه لازیم دیر یا یوخ؟ چنگیز بی گویتورک، اوتاغین حورمتلی چیخیشجی سی، هر بیر سیمگه کی قوزئی آذربایجانین بایراغینین دئیشیلمه سیندن دوزلمیش اولسا تمامیله رد ائدیب بو دلیل ایله کی بو بایراق آذربایجان بایراغینا آلتئرناتيو اولا بیلر! آما بو ساده سوالا جاواب وئرمه ییب کی گونئی آذربایجان موستقیل اولاندان سونرا، هر حالدا بیر فرقلی بایراغی اولاجاقدیر، آیا او بایراق دا آذربایجان بایراغینا آلتئرناتيو اولابیلرمی یا یوخ؟! و اگر اولا بیلر، جیناب گویتورک، گونئی آذربایجانین ایستیقلالینا می قارشی چیخاجاقدیر کی اگر موستقیل اولورسانیز و فرقلی بایراغینیز اولورسا، شیطان سیزی توولایاجاق و بو فرقلی بایراق، آذربایجان بایراغینا آلتئرناتيو اولاجاق؟!! بیلمیرم ندن بو یالانچی قورخولاری و توطئه توهم لاری بو یازیق میللتین جانینا سالیرلار!؟ میللتین عاغلی و شعورو مو یوخدور و بیر سورو داوارمی دیر کی بایراغی قوزئی ایله فرقلی اولسا، داها دئیه من باشقا بیر میللتم چون بایراغیم فرق ائله ییر؟! بو گولونج سوزلر نه دیر؟ بو دویغوسال وسواس، ندن آذربایجان حرکتینین ال آیاغینی باغلاماغا چالیشیر؟!

آنجاق بو موباحیثه لرده جیناب گویتورک بیر یاخشی اونری ده اورتایا آتدیلار کی منجه بلکی بو مساله نین حللینه سبب اولسون. اودا بودور کی هله لیک دولت بایراغی هئچ اورتادا اولماسین و یالنیز بیر سیمبول آذربایجان حرکاتینا سئچیلسین. گونئی آذربایجانین دولت بایراغی، قانونی دولت و پارلمان طرفیندن سئچیلسین. بو سیمبول تمام سیته لرده، تشکیلاتلاردا و تمام آذربایجان میتینگلرینده میللتین الینده اولسون. بو سیمبول «بابکین قیرمیزی بایراغی» اونریلدی نئیه کی بابک آذربایجانین اشغال آلتیندا اولماسینا قارشی بویوک بیر ساواش آپاریب و آیری طرفدن گونئی آذربایجان حرکاتی نین باشلانقیجی و یوکسلمه سی، بابک قالاسیندان باشلانیبدیر.

جیناب گویتورکون بو فیکری کی دولت بایراغی، قانونی دولت طرفیندن سئچیلسین و ایندی یالنیز بیر سیمبول حرکاتا سئچیلسین و بو سیمبول بابکین قیرمیزی بایراغی اولسون چوخ یاخشی اونری دیر. آما بو شرط ایله کی جیناب گویتورک بو اونری نین دالین توتوب و اونو گرچکلشدیرمک اوچون چاغیریش یاییب و بوتون تشکیلاتلاری راضی لاشدیرسینلار کی میللی دولت و پارلمان قورولانا قدر، بوتون اونری بایراقلارینی ییغیشدیریب و یالنیز بو یئنی سیمگه نی تمام سیته لرده و میتینگلرده دالغالاندیرسین لار. بوردا لازیمدیر کی تمام اینترنت صحیفه لریندن بایراقلار سیلینسین و یئرینه بابکین قیرمیزی بایراغی قویولسون. آما بو مساله نین گرچکلشمه سی اوچون بو اونریه صاحیب چیخماق و اونون دالیسینی توتماق لازیمدیر و یالنیز بیر سوز اورتایا آتیب، بیر قیراغا چکیلمک ایله بو ایش قاباغا گئتمز.

جیناب گویتورک نه قدر بو وئردیگی اونری ده جیددی اولسالار، منجه گوستره جک کی نه قدر مساله نین حللینه حقیقتا اونم وئریرلر و دئدیگی سوزلرده صادیقدیلر. آما اگر یالنیز بیر سوز اورتایا آتیب و بو چاغیریشی یایانلارین ال آیاغینی سویوتماقدان سونرا اوزلری ده وئردیگی اونری نی انودوب و بیر کناردا اوتورسالار، تاسوفله دئمه لییم کی بو مساله اونلارین صداقتینی سئوال آلتینا آپارا بیلر. منجه اونرینین نه اولدوغو چوخ دا اونملی دئییل اونون بوتون فعاللار طرفیندن قبول اولماسی اونملی دیر و اگر جیناب گویتورک بو اونری ده حقیقتا جیددی اولسالار و باشارا بیلسه لر کی میللی فعاللاری بیر سیمبول آلتیندا مثلا «بابکین قیرمیزی بایراغی» آلتیندا بیر یئره ییغسینلار، منده بیر کیچیک فعال اولاراق قطعیا او اونریه دستک وئریرم.

آیدین تبریزلي
۳۱/۰۴/۱۳۸۷

(۱): [1] www.11008.bayb…