سورولاردان قاچماياغ! بلليدير کي گونئي هرکاتي اوچون بايراغ گرکليدير- تبريزلي باي بک

بای بک، آذربايجان | آراگؤن, ۳۰-ي قوراپيشيرن , ۱۱۰۰۸ اینجی ایل, چولا ۲۲:۱۵ [آ.خ] | یازی و قوشوق

اگر بو سورولارا “هن” جاوابي وئرسه نيز، او زامان گونئي هرکاتي اوچون باشاري و او باشاريني بير دام (چاتي) آلتينا توپلايا بيله جک بير سيمگه يا بايراغين ياراديلماسيندان ياناسيز.

اگر سورولارا “يوخ” جاوابي وئردينيزسه، او زامان ميللي دوشونجه لرينيزده و سياسي باخيشلارينزدا سورونلارين اولدوغوندان شوبهه لي اولماليسينيز٫ گئنه ده اسکي حامام اسکي تاس!

بيلديگينيز کيمين سون زامانلاردا گونئي هرکاتيندا اولان بايراغ تارتيشماسي يئني بير دؤنم باشلاييب. سونوندا گونئيده کي فعالار اؤزلري بو سورونا چؤزوم تاپماغ اوچون قوللارين سيواييبلار.

آرتيق هامييا آيديندير کي گونئي هرکاتي بايراغسيز قالديغي سورج ايچينده بير چوخلو گوج الدن وئريب. ميللي بايراغ آدينا بير چوخلو بويالي پارچانين مئيدانا چيخماسي، تبيکي گرچک فعالاري اوزمکده دير. بونلارين اؤنون آلماغ، هابئله گله جکده باشقا بنزه اولايلاري اؤنله مک اوچون و اينديکي ايستکلره رئال و ياراديجي جاواب وئرمک اوچون، بايراغ مسئله سينده اولان تارتيشمالاري بير-بير اينجله مه ميز گرکلي اولاجاقدير.

باشلامادان بيلديريم کي، هر زامان اولدوغو کيمين، بو يازي منيم اؤز شخصي فيکيرلريمين ايضاحي اولاجاقدير و اگر کيميسه اونو اؤز دوشونجه لريندن يانا گؤرمزسه، اؤز فيکيرلرين دئمک اوچون هر حالده بير يول تاپماغا جهد گؤستره بيلير.

اون ايللردير کي گونئي هرکاتي اوچون چئشيتلي دونلار تيکيلير! بو دونلارين بير چوخو او قدر انه-شوشدورلر کي اينسان اونلاري تيکنلرين آغيل ساغليقليغينا شوبهه ائتمک مجبورييتينده قالير.

بئله کي، اؤزلرين ضيالي بيلن، بير نئچي ايل ميللي فعال آدييلا چيخيش ائدن، گئچميشده بير سيرا ايشلملر ياپان و حتّی پارتييا باشخاني اولان نئچي سويداشيميز، بايراغ مسئله سينه لازيمي اؤنه مي وئرمک ايستميرلر.

بونلارين داورانيشيندان بئله باشا دوشولور کي گونئي هرکاتينا اؤزگور بير خاراکتئر يارانماسي نين قارشيسيندا دورماغ ايستيرلر. اونلارين بوتؤو آذربايجان ايدئالاري نقه ده رده لازيم گؤرونورسه، گونئيده اولوب بيتنلره او آچيدان باخمالاري بير او قدرده تهلوکه لي اولاجاقدير.

بو يازيمدا بلکي بير سيرا شخص آدلارين يازام. چونکي آرتيق هاميميز بيليريک کي گونئي هرکاتي دييه بير قالخيش وار، اونا دستک وئرن، ايدئا يارادان و اينجله ين سويداشلاريندا اورتادا اولماسي بير فاکت اولاراق قبوللانماليدير.

دونن گئجه ۸ ساعات پالتالک واسيطه سيله بايراغ سورونو تارتيشمايا قويولموشدي. او توپلانتيني قوران سايين بابک آذري، آزادتريبون سيته سي نين باشچيسينا اؤز درين ميننتدارليغيمي بيديره رک، بئله توپلانتيلارين داها اينتئنسيو ياپيلماسين آرزو ائديرم. هابئله اوتاغين معروضه چيسي سايين چينگيز گؤيتورک-ه ده دوشونجه لرين پايلشديقلاري اوچون تشککور ائديرم. آرتيريم کي توپلانتييا بير چوخلو تانينميش ضيالي قاتيلميشلار، آدلاراين تک تک سايماغدان، هاميسينا بيرگه ميننتدارليغيمي بيلديريرم.

آدي گئدن توپلانتيدا، گئني هرکاتينا عايد اولان، گئچميشده تشکيلات اؤيه سي اولان ياخود ميللي هرکاتيميزدا يئني دؤنم يارادان گئنج فعالارين اؤنرديگي سيمگه، اونونلا ياناشي گونئي هرکاتيندا اولان بايراغ سورونو تارتيشيليردي. او تارتيشمالار کسين سونوجا وارماسادا، ان آزيندان بير نئشه دييشيک دوشونجه و باخشيشي آيدينلانماسينا ندن اولدو.

چاليشاجاغام کي اؤنريلن سيمگه نين اؤنونده دايانان سورونلاري، سورون يارادانلاري و همده او سيمگه ني اونايلايانلارا ساري يؤنه لينن اؤنريلره توخونام. آچيق يازماغا جهد ائديب و اوخوجولاردان ايستکده بولوناجاغام کي اؤز فيکيرلرين آجيق اولاراق ديلم گتيرسينلر. چونکي قاتيلديغيم و شاهيد اولدوغوم او توپلانتيدا، سؤز گورشي کيمي چابالار اورتاليغداييدي، و من بئله تارتيشمالارا قارشي اولدوغومي اينديدن ديله گتيرمک زوروندا اولاجاغام.

اؤنريلن سيمگه ۱۹۹۲ ايلينده، ايستانبولدا ياييليب و داها سونرا ” بوتؤو آذربايجان بيرليگي ” تشکيلاتي طرفيندن اونايلاناراق آرشيوه آلينان ” موختصر آذربايجان تاريخي ” کيتابدان آلينيب. آرتيريم کي کيتابين يازاري باب ايله ايليشديسي اولمادان، هئچ کيمه دانيشمادان او کيتابي يازيب. ب.ا.ب ايسه، او کيتابدا اولانلاري اينجله ديکدن سونرا، اونا ب.ا.ب طرفيندن اوناي وئريب. دئييشلره گؤره، ب.ا.ب-اين او زامان کي باشخاني مرحوم ابوالفضل ائلچي بئي جنابلاري شخصن او کيتابي اوخويوب، بير نئچه بؤلومونه ايسه ايضاحات ايسته ديکدن سونرا اونون ب.ا.ب آدينا آلينماسين قبول ائديب.

فيکريمده يوخدور کي بو سؤزلرله او کيتابا اونايلانميش و يا ايستيناد ائديله بيله جک قايناغ کاراکتئري يارادام. سؤزوم بودور کي او کيتابدا اولانلارين اؤنملي اولوب اولماديغي، بيزيم بو گونکو چابالاريميزا کؤلگه سالماغ آماجييلا اورتدادا اولان دوشونجه لرين آلؤتي اولماماليدير. آنجاق، بو فاکتلارادا گؤز يومماغ اولماياجاقدير کي ب.ا.ب تشکيلاتي بير بوتؤوچو ايدئايلا اورتاليغدا اولا اولا، او کيتابين اؤزلليکله گونئي هرکاتي اوچون ياراتديغي بايراغ مثله سينه او زامان ايلگيسيز قاليب!

سؤزو گئدن بايراغدا، قوزئي آذربايجان جمهوريسي آدلانان قوزئي آذربايجان تانينان بؤلگه ميزين رسمي بايراغ سئچديکي، ۱۹۱۸ ايلينده محمد امين رسولزاده و فتحعلي خويلو-نون ياراتديغي، ۳ رنگلي بايراغين آي اولدوزونون رنگي ده ييشه رک گونئي اوچون اؤنريليبدير. ياني کي، گؤي، قيزيل و ياشيل بايراغين اورتاسيندا اولان آغ رنگلي آي اولدوز، اؤنريلن سيمگه ده قارا بويانيب. اونون ندن ايسه، گونئي آذربايجانليلارين ياسدا و اسارتده اولدوغو بيلديريليب و آرتيريليب کي بو بايراغ گئچيجي اولاراق قوللانيلا بيله جکدير، چونکي گونئي موستقيلليگين آلديقدان سونرا، دئمک ميللي بايراغيميز ائله اوردادا دالقالانماقدا اولاجاقدير.

آدي گئدن سيمگه ايللر اؤنجه سونولسادا، سون گونلرده گونئيده فعاليت ائدن بير سيرا فعال طرفيندن يئنيدن اؤنريليب. اونون آرخاسيندا اولان تاريخ و شخصييتلره سؤيکنن بو اؤنري، بير چوخلو سويداشين تپکيسين قازانماقدادير، بير سيرا موخاليف و بير سيرادا مووافيق.

موخاليفلرين گؤروشونه گؤر، گونئي اوچون بايراغ لازيم دئييلدير. اونلار دئييرلر کي گونئي ايله قوزئيده فرقلي بايراغ دالقالانيرسا، اوزامان آذربايجان ميلتين اؤز اليميزله بؤلموش اولاجاييق. بو دوشونجه صاحيبلري بوتؤو آذربايجا ايدئاسينا داياناراق اؤنريلن سيمگه نين بايراغ شکلينه چئويريلمه سينه کسين قارشيديلار، آنجاق اونون سيمگه اولاراق قوللانماسينا موخاليف اولماسالاردا، اونو اونايلاماغ و حتّی تارتيشماغ بيله ايستميرلر.

بو باخيشدا اولان آنا دوشونجه هامه مزن اينانديغي و يولوندا موباريزه آپارديغيميز بوتؤو آذربايجان ايدئاسيدير. بو ايدئا بيز آذربايجانليلارين قانيندا وار، آنجاق اونو يئنيدن جانلانديرماغ، گوجلنديرمک و رئاللاشديرماغ اوچون اوزون پروسئسدن گئچمه ميز اينکار ائديلمزدير.

يوخاريدا آچيقلانان دوشونجه ني داشييانلارين هاميسي صداقتلي، ايللرجه شووونيسم يا روس ائمپئريياسي دوستاغلاريندا ايشکنجه ائديلن و حتّی ب.ا.ب باشخاني ايله ياخين ايليشکيده اولان سويداشلاديلار. آنجاق، اونلارين موخاليفت ائتديگي قونولارين اينديکي دوروملا نقدر علاقه لي اولدوغو اؤنمليدير. ائله بو باخيشداندير کي اونلارين اؤز آنا اينانجلارينا، يعني بوتؤو آذربايجان ايدئاسينا قاييتماغ لازيم اولاجاقدير.

ب.ا.ب و دونن گئجه چيخيش ائدن معروضه چي سايين چينگيز گؤيتورک باشخان اولدوغو آ.م.ا.ت (آزربايجانين ميللي آزادليغ تشکيلاتي) تشکيلاتي نين مرامنامه لرينده، آچيقجاسينا گؤره بيليريک کي اوردا قوزئي بؤلگه سينه موستقيل ستاتوس قازانماغ بير باشاري اولاراق، گونئي اوچون موستقيلليک قازانماغ واجيب و گرکلي بير ايشلم تانيتيليب. ياني کي، ايندي دئديگيميز “آذربايجان جمهوريسي” اصلینده “بوتؤو آذربايجان”اين بالاجا بؤلمه سي نين اؤزگور پارچاسي دئمکدير. بؤيوک پارچانين اؤزگورلوگه قاووشدورماسي ايسه، بو ايدئادا ايلک پروسئس اولاراق بللي ائديلير. بو باره ده اينانيرام کي آخداران يئترينجه بيلگي الده ائده بيله جکدير. بونودا آرتيريم کي دئييش لره گؤره، “قاراباغي تبريز آزاد ائده جک” سؤزو، ب.ا.ب باشخاني ائلچي بئي-ين سؤيله مي اولوبدور!

ايندي سورو بودور کي، بوتؤو آذربايجان ايدئاسييلا يولا چيخان سويداشلار، اؤز اينانديقلاري ايدئانين ايلک قورالينا ندن اويماغ ايستميرلر؟ گونئي هرکاتينا اؤزگورلوک قازانماغ اوچون، اونون اؤزگور کاراکتئر داشيماسينا ندن مانعا ياراديرلار؟

بلکي دونن گوجه وورقولاديغيم کيمين، اونلارين هيسسيياتلاري سيياستلريندن داها گوجلودور! چونکي بئلنچي آچيق گرچکي گؤرمه مزليکدن گلمک، نه عاغيلا گلن و نه منطيقه سيغاندير!

قاپالي بير دوشونجه ني بئينيميزه سوخماغلا، او دوشونجه نين تارتيشيلماغا چيخماسيندان قورماغلا و بيزيمله موخاليف دوشونجه ده اولان، آما عئيني زامان ميلتچي اولان سويداشلارا هر تورلو ايتتيهام وورماغلا، منجه بوتؤو آذربايجان ايدئاسي هئچ زامان گرچکلشه بيلميه جک.

سؤز بودور کي، ندن گؤنئيده موستقيل بير ميللي هرکاتين جرياندا اولماسينا اينانماغ، بير سيرا سويداش طرفيندن آذربايجاني پارچالاماغلا بير گؤرونور؟ آيا قوزئيده گئدن آزادليغ پروسئسينده، اوندان سونرا اوردا موستقيل دئولت ياراناندا، او دئولت آذربايجان آدين سئچنده، بير حالده کي آذربايجانين بؤيوک پارچاسي اسارتده ايدي، و او دئولت ميللي بايراغيميزي يئني ياراديلان موستقيل اولکه نين ميللي بايراغي اولاراق اولوسلاراراسي قوروملارا سوناندا، آيا گونئيده کي سويداشلارين گؤروشو آليندي مي؟ آلينمادي!

دئمک ايسته ديگيم بودور کي، اگر بيز بير ميلتيک، و اگر گونئيده موستقيل حرکات و بايراغ اولورسا ميللي بيرليگيميز داغيلاجاقدير، ندن قوزئيده دئولتچيليگيميزي يارادان، ايللر بويو بوتؤو آذربايجان ايدئاسييلا چابا گؤسترن ضياليلار، گونئيده کي سويداشلارينا سايقيسيزليق ائده رک، ائله آزربايجان آدين اؤزلرينه سئچديلر! ندن قوزئي آذربايجان جمهوريسي اولماديلار؟ مگر بيز ايکييه بؤلونموش بير ميلت دئييلمييک؟ بس ندن دؤنيادا بير آذربايجان واردير و اودا آذربايجان جمهوريسيدير آنلامييلا چيخيش ائتديلر؟

اگر اينانيريق کي بير ميلتيک، کي هاميميز اونا اينانيريق، گرک ائله بو سورونلارين هاميسينا بير چاره تاپيلسين. يوخسا بيز دانيشماياق کي ميلت پارچالانار! او زامان اوتوزاندا بيزلر اولاجاييق.

آما، بوردا باشقا بير سورونادا چؤزوم بولماغيميز گره که جک. سويداشلارين چوخو دانيشاندا تورک دونياسي و تورک ميلتيندن دانشير. همان شخصلر آذربايجان ميلتي سؤيلمينيده ايشه آلير! آيا بو کاشباشليغا نئجه جاواب وئره بيله جکلر؟ اگر ميلت بير اولار، دئمک تورک ميلتي واردير و آذربايجاندا اونا آييد اولان بير جوغرافييا آديدير! يوخکي اگر تورک ميلتي نين ايچينده آذربايجان ميلتيده وار! ندن گونئي آذربايجان ميلتي سؤيله مي اونلاري ناراحات ائدير؟

گونئيدن اؤنريلن سيمگه ايله موخاليف اولانلار دئيير کي، ميللي بايراغيميز وار! آما، گله جکده گونئيده بير موستقيل دئولت قورولدوقدان سونرا، او دئولته نزارت ائدن اوارلامئنت ميللي سيمگه و ياخود ميللي بايراغ باره سينده قرار وئره جکدير. اونلار بئله ديير کي، ايندي بير نئچه ميللي فعال و حتّی تشکيلاتين بايراغ ياراتماغ حاقي يوخدور! بايراغ اوچون ميلت و يا ميلتين سئچديگي پارلامئنت قرار وئره بيلر!

بو سويداشلارا بير سورو ايلتيرم، دؤنن گئجه ده دئديم آما مع السف جاواب آلا بيلمه ديگيم! بيلديگينيز کيمين، ميللي بايراغ دئديگيميز ۳ رنگلي آي اولدوزلو بايراغ ۱۹۱۸ ايلينده محمد امين رسولزاده و فتحعلي خويلو (و سيلاحداشلاري) طرفيندن ياراديليب و ميللي بايراغ اولاراق سئچيليب. او بايراغ ۲۸ مي ۱۹۱۸-ده يالنيز آذربايجانين قوزئي طرفينده قالديريليبدير، آنجاق اونا بوتؤو آذربايجان ميللي بايراغي ستاتوسو وئريليب. دئمه لي، ان آزيندان او دؤنمده گونئيده کي لرين سؤزو آلينمادي، اونلارين سسي توپلانمادي، آنجاق او بايراغ ايندي بير ميللي بايراغ اولاراق هامي نين اؤرگينده تاخت قورماليدير! سيزجه بوردا بو ايشين بير آياغي آخساميرمي؟

ميللي بايراغي شوبهه آلتينا آلماغ آماجيم يوخدور. يالنيز ايستيرم اولايلار ائله کي باش وئريبلر اينجه لنسين. او زامان ايله اينديکي زامانيميزين چوخلو فرقلري واردير. ايللر آرادان گئچيب، دونيا دوزه ني ده ييشيب، قوزئي آذربايجان تانينان اولکه يئنيدن شوروي بيرليگي طرفيندن ايشقال اولوب، ايللر سونرا گئنه موستقيلليگين الينه آليب، و، گئنه گونئيدن ايجازه آلان اولماييب!

بو اثبات ائتمير مي هر بؤلگه نين موستقيلليگي اوغوروندا وئرديگي ساواش ائله او بؤلگه يه اؤزلدير؟ بو ايثبات ائتمير کي قوزئي و گونئي آذربايجان تانينان بؤلگه لر، هر نقدر ده ييشيک قوشوللاردا اولاسالاردا، فرقلي سيستئمده ياشاسالاردا، هله ده اؤزلرين آذربايجانلي بيليرلر؟ دئمک بايراغ، ميللي بايراغ و يا ميللي هرکاتيميزين آنا دوشونجه سي بوتؤولوک اولسادا، اونا رئالليق و گوج وئرن اونون اؤزگور اولدوغوندادير.

آماندير محمد امين رسولزاده-ني تنقيد ائتمه يين، آماندير ائلچي بئي آدين آغزينيزا آلمايين، آماندير سيزين حاقينيز يوخ بيزيم دئديگيميزدن فرقلي دوشونه سيز، آماندير بئله اولماز، آماندير ائله اولماز! سيزجه بيز ائله بو ديکتاتور دوشونجه لر ايله ساواشميريق مي؟ سيزجه بيزيم اؤزگورلوگوموزو اسارتينه آلان فارس شوونيسيتلرينينده ايستکلري بونا بنزر دئييلميدير؟

بو اولان ايش و قبول اولوناجاغ اولاي دييلدير. ايللردير گونئي هرکاتي اؤنونده بير داغ کيمي دايانان، کؤهنه فيکيرلي، سيياستدن آنلامايان و گؤزو قورخموش بير سيرا آغساققال بيزيم جانيميزدان نه ايسته يير؟ اگر سؤز قونوسو بوتؤو آذربايجانديرسا، گونئي موستقيل اولمادان بو ايستکه نئجه وارماغ اولار؟

دونن توپلانتيدا بير دوشونجه اورتايا سورولدي٫ همده تهلؤکه لي و قورخو وئريجي بير دؤشونجه! سويداشيميز دئيير کي، بايراغ مسئله سي هئچ گوندمده اولماديغي شيکيلده، ندن اونو گوندمه چيخاراق کي؟ او سويداش دئدي کي، بيزيم مينبير دنه داها اؤنملي سورونوموز وار، زامانيميزي اؤنمسيز مسئله لره خرجله مه ميز لازيم دئيل!

او سويداشا سورو وئريرم کي، اگر بايراغ و يا سيمگه مسئله سي اؤنملي ديئيلدير، و اگر بو مسئله گوندمده دييلدير، بس ندن ۱۹۹۲ ايليندن هله باشلاساغ، گونئي اوچون بايراغ اؤنريسي وئريليب، داها سونرا هر ايل بير تشکيلات بايراغ ياراتيب، ان آزيندان ۲ ايلدير کي گوناز تي.وي-ده هفته ده بير دفعه بايراغ مسله سي بير طرفدن يانا اولا اولا تارتيشيلير! ايللردير بايراغ مسئله سيندن باشلايان آيريليقلار نه تئز ياديميزدان چيخدي؟ ايللردير خاريجده اولان گؤستريله ده بايراغ مسئله سينه گؤره گئتمه يه ن سويداشلارين هرکاتيميزدان ديشلانماغلاري نه تئز اونوتولور؟

من بو سويداشين دوشونجه سينه کؤهنه و تهلوکه لي آدي وئرمکدن چکينمه يه جگم. بئله کي گؤرونور، بايراغ مسئله سي نين داغيتيجي يؤنلري هله اؤزلرينه ميللي فعالي آدي قويانلارين طرفيندن هيسس اولونمايير.

او سويداشا بيرده سوروشماغ لازيم اولاجاقدير کي، سايين سياستمدار، سيزين باخيشينيزدا بايراغ مسئله سي اؤنمسيزدير و گوندمده دئييل! سيز دئييرسيز کي بيزيم مين بير دنه اؤنملي ايشيميز و سورونوموز وار! تمام، سيز دئين اولسون. لوطفا او مين بير دنه اؤنملي سوروندان بير نئچه سيني بيزه آچيقلايا بيليرسيز مي؟ هابئله، او دييه جک اولاجاغينيز سورونلاري چؤزمک اوچون آتديغينيز آدديملاردان بيلگي وئره بيلرسيز مي؟

موخاليف اولان سويداشلارين بير سيراسي ايسه سيمگه ده ميللي بايراغيميزين ده ييشديريلمه سي قبول اولونولماز کيمي تعريف اولونور. بو تنقيد گرچک بير تنقيد اولا بيلير، ندن کي سيمگه لرين بير بيرينه سايقيسيزليق ائتمه سي بلکي دوشونجه لرده اولسون.

بو تنقيده منطيقي ياناشاراق، اونلاردان سوروشماغ لازيمدير کي، اولسون، سيزين دئديگينيز هاقدير، ميللي بايراغيميزين طرحي توخونولماز اولماليدير، آما، گونئي هرکاتي اوچون بير سيمگه نين اؤنرمه سي اوچون سيزين نه يينيز وار؟ بو گونه قدر نه ائديبسيز تا بايراغ مسئله سي چؤزولسون؟

چينگيز گؤيتورک دانيشيقلاريندا سيمگه ايله موخاليف اولماديغيني، حتّی بير يا حتّی نئچه سيمگه نين يارانماسينادا قارشي اولماديغين ديله گتيردي. بلليدير کي جناب گؤيتورک سيمگه ايله بايراغ آراسيندا کي فرق، و ياراديلاجاق اولان سيمگه ني گله جکده ميللي بايراغ اولاراق بيزيم اصيل ميللي بايراغيميزا بير آلتئرناتيوه چئويريلمه سيندن نيگاراندير. بو گرچکدنده آنلاشيلان بير اولايدير.

چينگيز گؤيتورک سيمگه سئچيمي اوچون، ميللي بايراغيميزا سايقيسيليغ ائتمه دن، بير چوخلو ميللي سيمگه نين وار اولدوغون وورقولادي. اؤرنه يين، باي بک-ين قالديرديغي قيزيل بايراغ. اولدوقجا عاغيللي، ميللي روحييه لي و منطيقي بير اؤنريدير. من شخصن بئله بير سيمگه نين اؤنريلمه سيندن يانا اولدوغومي بيلديرمکدن چکينميرم. آما، بو آرادا باشقا سورونلاردا وار.

بلکي سويداشلارين نئچه سي، گوندمده اولمايان سورون کيمي بيلن او سويداش کيمي دوشونسونلر، آما من ائله دوشونمورم، حتّی بئله دوشونورم کي گونئي هرکاري اوچون بير بايراغ سئچمکده گئج بيله قالميشيق.

چينگيز گؤيتورک-ه بئله سورو وئرمک اولور کي، بس ندن ايندييه قدر بئلنچي بير سيمگه اؤنريلمه ييبدير؟ اؤزلري نين ده دئديکلري کيمين، ان آزيندان ۶ ايلدير کي بو سورونلا ايلگيله نيرلر! منيم آنلاديغيما گؤره، حتّی بير نئچه تشکيلاتلادا بو قونودا دانيشيغلار آپاريبلار. بس ندن هله ليک کسين بير جاواب الده يوخدور؟ اگر او دانيشيغا چاغيريلان تشکيلاتلار بو مسئله ايله ايلگيلنمه ييبلر، بس ندن ايللردير سيمگه يارانيشينا اؤزن گؤسترمه يه ن او تشکيلاتلار، ايندي اؤنريلن سيمگه قارشيسيندا دايانماغي اؤزلرينه بير ميللي بورج بيليرلر؟

ايندي هرکس دئسه کي گونئي هرکاتي اوچون بايراغ و يا سيمگه لازيم دئييل، گرک اونون عاغيل ساغليغينا شوبهه ايله ياناشاق. ايللردير بو سورونلاري و بايراغسيليغ آخساقليقلاري گؤروبده گؤز يومماغ، دئمک ساغلام دوشونجه دن قايناغلانمير.

خاريجده بارماغ ساييسي اؤيه سي اولمايان تشکيلاتلار نئجه بو قدر اؤنملي مسئله ني قولاغ آردينا سالا بيليرلر؟ اؤز آرالاريندا ساواشاراق، تئز تئز تاشکيلات ياراتماغا زامانلاري و پوللاري وار، آنجاق ميللي هرکاتيميزا ضربه يئنديرن سورونلاري چؤزمک اوچون اورتاليغدا يوخدولار! گئنه وورقولامالييام کي ميللي هرکاتيميز ايچريده جريانداندير، ديشاريدا دئييل! و ائله بونا گؤره دير کي هاميميزين آماجي گونئيده کي هرکاتي گوجلنديرمک اولماليدير. سياسي، ايقتيصادي و معنوي باخيمدان، بيز اونلارا يارديمجي اولماليييق. يوخسا اوتوروب کامپيوتئر يا تلويزيون آرخاسيندا دئمک کي “آ ميلت تؤکولون خيياوانلارادا، بس سيزين هئچ غئيرتينيز يوخ مو دور فارسلار سيزي اسارته آليب؟!” چوخ قولاي ايشدير.

بيلديگيم قدر٫ موخاليفلرين گؤروشونه و اؤز شخصي جاوابلاريما توخوندوم. آما، مووافيقلر اوچونده بير نئچه سؤز يازماق لازيم گؤرونور.

اؤنريلن سيمگه گونئيدن گلير، ياني کي، بير سيرا ميللي فعالا ايچريده اؤز آرالاريندا قرارا گليبلر، خاريجده اولان شخصي بايراغلارين يارانيشي و تهميل اولونماسينا قارشي دورماغ اوچون فيکيرلرين بيرلشديريبلر، اؤنريلن سيمگه ني گؤستريلرده و حتّی شهرلرده آسيلديغينا پلانلار حاضيرلاييبلار و بو دوغرولتودا بير چوخلو موزاکيره لر آپاريبلار.

بلکي سوروشاسيز کي اگر بو قدر ايش گؤرولوب و سيمگه سئچيليبديرسه، اونا اؤنري دئمک اولار مي؟ من دئييرم اولار. آما، اونا باشقا يؤندن باخماغي اؤز دوشونجه مه داها اويقون گؤرورم.

من بو اؤنري اوچون، کي سئوينه رک دييه بيلرم کي گونئيدن قايناغلانان ۳-اونجو گئنيش حرکتدير، بيلريک آچيسيندان باخيرام. بئله کي، اؤنريلن سيمگه ايچريده و خاريجه اولان سويداشلارين بيرگه قرار وئرمه سي اوچون ده يرلي بير فورصت يارادير. بيرليکدن دانيشيريک آما بيرليک اوچون آدديم بيله آتميريق. من بو اولايدان ميللي فعالار، چئشيتلي تشکيلاتلار و قوروملارين بير يئرده توپلانمالارين (فيزيکي اولماسادا اولار) پلانلاماغ ايسته ييرم.

اگر سؤز قونوسو گونئيده گئدن ميللي هرکاتدان گئدير، دئمک ميللي فعالا آدلانان هرکس بو قونويلا ايلگيلنمه سي گرکه جکدير. بونا اؤنمسمه مزليکدن گلمکله، بيلريک سؤزونون ايچي بوش اولدوغونا، ايچريده کي ميللي فعالارين يالنيز اولدقلارينا و بوتؤو آذربايجان شوعاري نين يالان اولدوغون آچيقلاميش اولاجاييق.

بو اؤنري، اونون طرحي و حتّی اؤنرنلرين بير کنارا بوراخيبدا، يئني بير سيمگه، يئني بير طرح و يئني بير دؤنم يارانيشي اوچون حاضير ميييق؟

بوردادير کي گرچکلر مئيدانا چيخير. چوخو شوبهه ايله ياناشسادا، بو سورونلار و اولايلار بير گرچکدير و بير آن اول اونلارلا ايلگيلنمک لازيمدير. گئنه باشي سويوغلوغ ائتمکله، زمين يئني بايراغلار و يئني پارچالانماغلارا حاضيرلانميش اولاجاقدير. سيزجه بوتؤو آذربايجان، واحيد ميلت و بيرليکدن دانيشانلاري بو واسيطه ايله سيناغا چکميش اولموروق مي؟ اگر اونلار گئنه ده اؤزلرين گيزلي توتوب و تارتيشمالارا قاتيلماسالار، ندني هر نه اولورسا اولسون، اؤزلرين اوستون بيليب و آشاغي گؤردوکلري ايله دانيشماغا اؤزن وئرمه يه نلر داخيل، بو سورون بير چوخلو گرچه کي آچيقلاياجاق، گونئيده کي فعالار يئني بير باخشيا واراجاقلار و گونئي هرکاتي آدلانديرديغيميز يئني بير دؤنمه گيره جک.

آما من آرزو ائدرديم کي بو اولايدان گرچک بيرليک اوچون يارارلاناق. اؤنري وئريليب، آنجاق داها منطيقي و داها گوجلو اؤنريلرينيز وارسا، ندن سوسورسونوز؟ بويورون، ميللي حرکت ميلتيميزيندير، سيزده ميلتين بير پارچاسي، ندن اؤزونوزو کنارا چکيرسينيز؟

سون سؤز اولاراق، سؤز گؤرشديرمکدن اوزاق دوران ميللي فعالارا سزله نيب و اونلارين نئت شکيلده جاواب وئرمه لرين آرزو ائديرم. اوتوروب مين صحيفه ناغيل دئمک يئرينه، بير دفعه ليک سون يارپاغي آچاق. تبريزده بير سؤز وار کي دئيير، “موس-موس دئمک يئرينه، بير دفعه دئه موستافا!” .

سيزجه:
- گونئيده موستقيل اولماغ اوچون گئدن موباريزه يه اينانيرميسينيز؟
- گونئي ايله قوزئيدئه گئدن پروسئسلرين فرقلي اولدوغون بيليرميسينيز؟
- گونئي هرکاتينا اؤزگور کاراکتئر تانيماليييق مي؟
- گونئيين موستقيلليگي اوچون، اونا اؤزل سيياست يارانماليدير مي؟
- ميللي بيلريگيميز اوچون شخصي و تشکيلاتي اينانجلاردان واز گئچمک يارارليمي دير؟
- گونوموز و گله جگيميزين سورونلارينا رئال اولاراق ياناشماليييق مي؟
- بوتؤو آذربايجان ميلتينه وارماغ اوچون، هامي نين اؤزگور اولماسي گرکليميدير؟
- قوزئي دئولتچيليگيله يان يانا، گونئيده ده گئچيجي دئولت ياراناجاغينا اينانيرميسينيز؟
- ياراناجاق دئولتچيليکلرين آنلامي نين ميللي پارچالانما اولماديغين آنلايا بيليرميسينيز؟
- اولوسلاراراسي نورمالار و قوشوللارين اتکيسين گونئي هرکاتيندا گؤزه آلماغ ايستيرميسينيز؟

آرتيريم کي، گونئيدن اؤنريلن بايراغدا ياراديلاجاغ اولان سورونلار، جان تهلوکه سي و گله جک تارتيشمالاري اوزاق توتماغ اوچون، داها اؤنجه اؤنرديگيم، ساري آي اولدوزلو بايراغي اؤنري اولاراق اورتايا سورورم. بلليدير کي هله ليک نه دئولتيميز وار، نه ميلتيميزين سئچديگي پارلامئنت، نه اؤزگورلوک ساواشي بوتؤو آذربايجان تورپاغلاري نين هاميسيندا گئدير و نه او سياسي دورومداييق کي رئفئراندوم قوياغ. آما، ائله محمد امين رسولزاده ايله سيلاهداشلاري نين اؤنرديگي کيمين، گونئي هرکاتي اوچون بير سيمگه ياراتماغ ميللي فعالارين بوينونا دوشور. بو ميللي وظيفه دن بويون قاچيرانلارا “اوزاغ دورون بو هرکاتدان” باشقا بير سز دئمک اولماياجاق.

ميللي دوشونجه ديکتاتورلوق و منم منم دئمکله گوجلنميه جک

تبريزلي باي بک
۲۰/۰۷/۲۰۰۸
کرويدون