يا قارداشيم اول، يا قارشيمدا! - تبريزلي باي بک
بای بک، آذربايجان | اِلگؤن, ۲۹-ي قوراپيشيرن , ۱۱۰۰۸ اینجی ایل, چولا ۰۴:۱۵ [گ.ؤ] | یازی و قوشوق
 |
. | کشکه آذربايجان گئچميشلرده دوغدوؤو کيمين، … يا يوخ، بو سفر گرک اينسانليغدان آد آپارمايام، ندن کي هر نه باشيميزا گليب ائله اوزو يولاليغيميزدان گليب! آرزو ائديرم کي بو سفر آذربايجان آناسي قولدور سيياستچيلر دوغسون، قولدور حربشيلر و زنگين ميللييتچيلر يئتيشديرسين. يوخسا اينسانليق سئوداسييلا وطن قوروماغ اولماز! بو بازاردا، بيزيم ساتديغيميز دوشونجه لره، بير باغ گؤي وئرميرلر! |
چاققاللارين بيرلشمه سي، يارالي نين اؤلومو دئمکدير!
سونوندا آمريکا ایله ايران بير ماسا آرخاسينا اوتوردولار، سونوندا تورکيه ايله ائرمنيستان گيزلنپانج ايشلريندن خبر وئرديلر، سونوندا روسييا قافقازا صاحيب اولور، سونوندا آمريکا اورتا دوغونو آلير، سونوندا آذربايجان ارمنستان-ا سفير گؤندرمگی دوشونور و، سونوندا کيم نه ائديرسه ائتسين، اولانلار بيزيم ماراغيميزدا بيله دئييل!
بيزي ماراخلانديران نه دير؟ گرچکدن بير ميللي فعال اولاراق بو سورونو هئچ اؤزوموزدن سوروشموشوق مي؟
دئييرلر جوجه آناسيندان سؤد گؤرمه يب، يا دئييرلر چوروک ايپه يوک باغلاما! بونلاري کيمه دئمک لازيمدير؟ ميللي فعالا کي هله ده تورکيه دن يارديم اومودوندادير؟ يا او فئدئرالچي سولچولارا کي ايراندا دئوريمه گؤز باغلاييبلار؟ يا بيزه کي اليميزدن هله ليک هئچ نه گلمير؟ يا گؤزو آغلار قالميش قاچقينلاريميزا کي حاکيمييته گؤز تيکيبلر کي ائولرينه گئري قايتاريلسينلار؟ يا، دا آرتيق کيمسه قالمادي کي اونا سوروشا بيلک نه لر اولور، بيزلر نه ائده بيليريک تا ميللي هرکاتيميز ايسته ديگيميز سونوجا وارسين!
آذربايجان ميللي هرکاتي آدلانديرديغيميز اورتامدا، دونيادا اولان بيتنلر اوجور کي گره کي ر اينجلنمير. ايللردير بو سورونا ايشاره ائديب و اونا چاره تاپماغ اوچون دوشونورم. ندن دونيا اولايلاري بيزيم فاللاري ماراخلانديرمير؟ گؤره سن اونلار دوشونور کي دونيا دئديگين ايران آدلانان اولکه ميدير؟ يا بير آز گئنيش دوشونده لرين باخيشينا گؤره، دونيا ياني ايکي تايداکي آذربايجانليلارين دونياسي؟
قوزئيده اولان بيتنلر گونئيه يانسيمير، گونئيده کي لرسه قوزئيين ماراخ موکتاسيندا دييل! دونياداکيلاردا هئچ بيري نين اومروندا دييل!
ائله دونه نيدي کي حزب الله آدلانان هؤرگوت، ايللردير سيلاهلي ساواشان، اؤز ميللي و ديني وارليقلارين قورويان، هردن راديکال اولوب، هردن ايرقچي اولوب، هردنده اولوسال اولان بو هؤرگوت، اسرائیل آدلانان دئولتي ماسا آرخاسينا چکدي! خاطيرلاديم کي اسرائیل سيياستينده، ترورچولارلا دانيشيق آپارماز ياساقدير! حزب الله-سا اسرائیل باخيميندان بير ترور هؤرگوتودور! بس نه اولوب کي بو دئولت او هؤرگوتون ايستکلرين يئرينه يئتيرير؟
ائله دونن ايدي کي دئييلدي آ.ب.ش نوماينده سي، همده خاريجي ايشلر نازيرليگي نين اوچونجو شخصي ايران نوماينده سيله گؤروشمک اوچون ژنو-ه گؤندريليب! ايران آدلانان اولکه آ.ب.ش سيياسيتينده تروچو و حتّی ترور اورتن رئژيم الينده دير، آ.ب.ش سيياستينده تئرروريستلرله دانيشيق آپارماغ ياساقسير! آما، نجه اولار کي آبش اؤز مووقئييندن گئري چکيلسين، ” ايراندا اوران زگينلشديرمک دايانديريلماسا دانيشيغ اولماياجاق ” سؤيلميندن واز گئچسين و ايران گون به گون آتوم بومباسينا ياخينلاشا ياخينلاشا، آبش کيمي سوپئر گوجو ماسا آرخاسينا چکير!
ائله دونن ایدي کي تورکيه ائرمنيستانلا ايليشکي قورماغا باشلاييب سؤزلري ايفشا اولدو! اونلاري تکزيب ائدن تورکيه يئتکيليلري، بو گون ائرمنيستانلا گيزلي دانيشيق آپارديغيني ائلان ائدير! داها اؤنجه دن بيليرديک کي تورکيه ائرمنيستانا داها ياخينلاشماغ ايستيير، توريستليک آدينا بير چوخلو سياسي يئتکيلي يئروانا گئديب و يا آنکارايا چاغيريليب، بيليرديک کي روسييادا چوخلو توپلانتيدا بيرگه ايشتيراکلاري اولوب، و بيليريک کي تورکيه دئولتي هر زامان آذربايجانا داياغ دوروبدور! ميثال اوچون، ائرمنيلر قاراباغي ايشغال ائدرکن، تورکيه قولاغلارين توتوب گؤزلرين يومدي! يا گونئيده سويداشلار فارس گولله سيله اؤلدورولنده، تورکيه دئولتي اعتيراض ائتمه دي! يه … آما، بونلارا باخماياراق، گئنه تورکيه بيزيم قارداشيميزدير دئينلر وار! نئن ميش کي بو آجيق داورانيشلاري گؤرمه يه نلر، ميللي هرکاتين دوشونجه سيستئمين زهيرلييرلر؟
ايکي طرفلي اوينايان سيياستچيلرين ايشينه نه دنک لازيمدير؟ اونلار کي کوردلرين ايشقالچيليغين ايفشا ائديب، آنجاق آمريکانين کوردلره زمين ياراتديغين تکزيب ائديب و گيزلي توتانلارلا نئجه ايشبيرليگي آپارماغ اولار؟ کوردلردن يانا، آذربايجان علئيه اينه چاليشان، کوردلري سيلاهلانديران، کوردلري بارينديران، کوردلرين ساختا خريته سين يارادانلار، کوردلرين ساختا خريته سينه لئجيميت کيمليک قازانديرانلار، آذربايجاندا اولان بيتنلري سانسور ائدنلر و ان يوموشاق شکلينده، آذربايجانليلارين هاقلارين تاپدالايانلارا نئجه دوست دئمک اولور؟
ائرمنيلردن يانا، آذربايجان علئيه اينه چاليشان، ائرمنيلري سيلاهلانديران، ائرمنيلري بارينديران، ائرمنيلرين ساختا خريته سين يارادانلار، ائرمنيلرين ساختا خريته سينه لئجيميت کيمليک قازانديرانلار، آذربايجاندا اولان بيتنلري سانسور ائدنلر و ان يوموشاق شکلينده، آذربايجانليلارين هاقلارين تاپدالايانلارا نئجه دوست دئمک اولور؟
دئمک ايسته ديگيم بودور کي، گئچميشده ياشايان سيياستچيلرله بيز هارا گئده بيلريک؟ او سيياستچيلري کي بو گونده باش وئرنلري آنلامادان، گلجگه پلان حاضيرلاييرلار بيزيم حرکتدن نه ايستييرلر؟ اؤز آرامزدا قالسين، هئچ بو گونه جان گؤروبسونوز کي بو سيياستچيلرين بيري، اوتورسون، ديقت ايله، فاکتلار ايله و دوزگون شکيلده دونيادا اولان اؤنملي دييشيملر باره سينده يازي يازسين؟
اوتوروب بوش بوشونا دانيشاندا، هامي هر شئييي بيلير، توم بيليملرين عاليميدير و هئچ کيمين ساوادي اونلارين ساوادينا چاتماز! آما سؤزه گلنده، دانيشماغا سؤز تاپا بيلمير! سوروشاندا، ادن ليواندا فرانسادان سؤز گئدير، ندن اوردا بير اولاي اولاندا فرانسا يئتکيليلري اورا سفربر اولور، جاوابلاري يوخدور! سوروشاندا کي سومالييادا و سوداندا ايللردير اؤلوم چمبره سي ميلتلري يوخ ائدير، ندن هامي بو گون آييليب و سودان باشچيلارينا توتولما قراري چيخاردير! جاوابلاري يوخدور! سوروشاندا کي، تورکيه ندن کورد تئرروچولارين تورکيه دن آذربايجانا گئچيشينه يارديم ائدير، جاوابلاري يوخدور! سوروشاندا کي ندن خوراسان تورکلري ندن کوردلرين آخيني قارشيسيندا يالنيز قاليبلار، جاوابلاري يوخدور! سوروشاندا کي ندن سؤنگور يا قوروه کيمي شهرله ده کورد مسئله سي ماراخ جلب ائتمير، جاوابلاري يوخدور!
بو خريته يه بير آز ديقتله باخماغ بلکي سورونلارين نه اولدوغون آيدين ائتسين. اونسوزدا آيديندير آما، بلکي بير نئچه سيياستچيميزين خاصييتي بئله اولسون کي: ” گؤرمه سه م اينانمارام! ” .
دوشونمکده مي چتيندير؟بير ايش گؤردوگوموز يوخ، ان آزيندان دوشونوب و ان آزيندان ميللي باخيمدان بو سورونلارا باخاق.
کوردلري يارادانلارين آماجي بودور کي دونيانين اؤرگينده اولان زنگين بؤلگه لري اؤز اللرينه گئچيردسينلر. سيزه سؤز وئريريم، او گون کي کوردلرين الي کورکوک و آذربايجانين باتي بؤلگه لرينه چايدي، ائله اوندان دير کي کوردوستان اولکه سي ياراناجاق. يوخسا ايندي ايش باشيندا اولان ياراديجيلار مندن چوخ ياخجي بيليرلر کي نئفت و يولدان يوخسول اولان کوردوستا، ائرمنيستان کيمين زحمت قايناغي اولاجاقدير! تورکيه دن آيريليريق! يول تبريزدن گئچير، نئفت ايسه کرکوکده وار! خوراسان کوردلرينه روسييا صاحيب چيخاندادا، تورکمه نيستاندان آيريليريق! هله، فارس شووونيست حاکيمييتي نين باسقيلاريندا بو گله جکده باشيميزا گيله جک اولانلاري آرتيرساق، دئمک چوخ آغير يوخوداييق اگر اولايلاردان خبريميز اولماميش کيمي داورانساق.
ايندي بو تورکچو فاناتيکلره سوروشوم کي، آ بالا بس نئجه اولدو سيزين تورک دونياسينا ليدئرليک ائدن تورکيينيز؟ آمريکا يالاخچيلارينا سوروشوم کي،، نئجه اولدو دستک آدلانديرديغينيز آمريکا؟ سولچولارا سوروشوم کي، نئجه اولدو سول دوشونجه لي کورد يولداشلارينيزين صداقتي؟ ميلتيميزه ده سوروشوم کي، ندير بو باشيميزا گلنلر؟
دئميرم سيلاه آليب اليميزه و آمريکا ايله ساواشاق، دئميرم فارس حاکيمييتين خاريجي گوجلرين سالديريسي موقابيلينده قوروياق، دئميرم تورکيه ايله موخاليفت ائدک، دئميرم قوزئيده اولان حاکيمييتي تختيندن سالاغ، يوخ، دئمک ايسته ديگيم بودور کي، پلانلار اورتادا، ايشلملر گؤرولور، سينيرلار چيزيلير و بيزلر هله اينانميريق!
بيزي بير سورو کورد و اروپا قاپيسيندا يولچولوغ آماجينا قوربان وئرن تورکيه دن نه اوما بيليريک؟ بيزي اؤز باشيميزا بوراخان قوسئيه نه دييه بيليريک؟ بيزيم اؤرگيميزه ساپلانان کورد تئررورونا نئجه دؤزه بيليريک؟ بيزي هر زامان آرخادان ووران، تورک دوشماني اولان آمريکايا نجه گؤونه بيليريک؟ هله بونلاريدا بير کنارا بوراخساغ، اؤز باشيميزين چاره سينه نئجه باخا بيليريک؟
بير مثل دئييم و سؤزومو بيتيريم. دئييرلر کي يونجاليقدا بير ائششک يئم يئييردي. سس ائشيديب اوزاقلارا باخير، گؤرور کي بير سوري قورد ياخينلاشير! اؤزونه بئله دئيير: ” اينشاللاه کي ايتديلر! ” . گئنه باشين سالير و يئمله مگه داعوام ائدير. سسلر ياخينلاشير، بيرده باشين قالديريب باخير! گؤرور کي قوردلار تام ياخينلاشيرلار و هئچده دوست کيمي حالتلري يوخدور! اؤز اؤزونه دئيتير کي: ” اينشاللاه کي ايتديلر! ” . يئمله مگه باشلار باشلاماز قوردلار اونا سالديريب و بودارلاماغا باشلاييرلار، ائششک باغيرا باغيرا دئيير: ” اينشاللاه کي ايتديلر! ”
کشکه آذربايجان گئچميشلرده دوغدوؤو کيمين، … يا يوخ، بو سفر گرک اينسانليغدان آد آپارمايام، ندن کي هر نه باشيميزا گليب ائله اوزو يولاليغيميزدان گليب! آرزو ائديرم کي بو سفر آذربايجان آناسي قولدور سيياستچيلر دوغسون، قولدور حربشيلر و زنگين ميللييتچيلر يئتيشديرسين. يوخسا اينسانليق سئوداسييلا وطن قوروماغ اولماز! بو بازاردا، بيزيم ساتديغيميز دوشونجه لره، بير باغ گؤي وئرميرلر!
گرچکچي اول، غدار اول آنجاق چوخ ظولم ائتمه!
تبريزلي باي بک
۱۸/۰۷/۲۰۰۸
کرويدون
٫بير ميللتين سسي
پایلاش | پرینت
بورا باغلي يازيلار:
- وقتي شوونيستها قات ميزنند! اشتباه فجيع فارسهاي دو آتشه در خصوص دو تشکل آذربايجاني و تلاش آنها براي سؤ استفاده - تبريزلي باي بک
- شرفدن دانيشانلار، شرفسيزليکدن اوزاق دورارلار! تحميل ائديلن بايراغ بيزي پارچالاياجاق مي؟ - تبريزلي باي بک
- چگونه ميتوان مانع پشيمان شدن مردم از شروع و دفاع از مبارزات ملي شد؟ - تبريزلي باي بک
- يئکه داش، آتماماغ علامتيدير - تبريزلي باي بک
- سورولاردان قاچماياغ! بلليدير کي گونئي هرکاتي اوچون بايراغ گرکليدير- تبريزلي باي بک
- آذربايجان و اونا عايد اولان بؤلگه لرده چئشيتلي سورونلارين اولوشومو - تبريزلي باي بک
- عراق-دا گئدن پروسئسلرده تورکمنلره تيکيلن بؤرک! - تبريزلي باي بک
- عدم احساس مسئوليت و دروغگوئي در حال تبديل “سمبل پيشنهادي” به “بايراغ تحميلي” است - تبريزلي باي بک
- مشروطه يا کشمکش دموکراسي بين تورکها و پادشاهشان چه ربطي به فارسها دارد؟ - تبريزلي باي بک
- “هزاره ها” يا تورکهاي فراموش شده خون میگریند، دریابیمشان! – تبريزلي باي بک
http://www.baybak.com
بای بک سایتیندان پرینت اولوب
http://www.11008.baybak.com/il_11008_say_522.azr
یازینین اینترنت آدرسی
گوروش کاپانیبدی