ايري اوتوراغ، دوز دانیشاغ، گونئيده نه لر اولماليدير؟ - تبريزلي باي بک
بای بک، آذربايجان | اُرتاگؤن, ۲۷-ي قوراپيشيرن , ۱۱۰۰۸ اینجی ایل, چولا ۱۸:۵۰ [آ.خ] | یازی و قوشوق
 |
. | آيدين تبريزي* و حتّی ميللي پارتي-دن** گلن بيلديريده ساري رنگ اؤنريليبدير. منده شخص اؤزوم اولاراق، ساري رنگي داها اويقون گؤرورم. دوغرودور کي گونئيده اولان سويداشلار اؤنرديکري سيمگه اوستونده بير چوخلو هزينه ائديبلر، آنجاق، هاميميزين ايسته کي بودور کي تورکچو و غورور وئريجي بير سيمگه ميز اولسون.
آغ ايله قارا هر زامان بيربيرينه قارشي اولوبلار. دوغرودور کي بو ايکي رنگ بيربيرين تاماملايان رنگلرديلر، آما قارا رنگين سيمگه ميزده اولماسي بير آز اوزوجو و اوتانديريجيدير. |
گونئي آدلانديرديغيميز بؤلگه اصلینده آنايوردوموزون ان بؤيوک پارچاسيدير. ائله بونا گؤره ده اؤنرميشديم کي بو بؤلگه نين آدينا گونئي آذربايجان يئرينه، آذربايجانين گونئيي آدين قوللاناغ.
دئديگيم فورمادا، آذربايجان بير بوتؤو آلاراق آلينيب و بللي اولوناجاق کي آذربايجانيني قوزئي، باتي و دوغو پارچالاريدا واردير! ياني کي، گونئي يا قوزئي، هابئله باتي و دوغو اؤز اؤزلرينه بير بؤلگه دييللر، اؤزلرينه اؤزل ميلت و حتّی دئولتلري يوخدور، و بو، آذربايجانين ميللي و دئولتچيليک باخيميندان بير بوتؤو اولدوغونون گؤسترگه سي اولاجاقدير. يوخسا بو گون بيز گونئي آذربايجان دئييب، اونون ميللي هرکاتيندان دانيشيب و اونون ميلتينه اوز توتاراق دانيشساق، دئمک کي اؤز اليميزله آذربايجاني پارچالاميش اولوب و اونو ان آزيندان 4 يئره بؤلموش اولوروق.
يوخاريدا گلن قيسسا آچيقلامادان سونرا، بو پارچالارين، يا اصلینده بو بؤلگله لرين گئچميشي، گونو و گله جگينه نئجه ياناشماغ لازيمدير؟
بلليدير کي تاريخين بير چوخ دؤنمينده بو بؤلگه لر بير بيريندن آيري اولماييبلار. اونلاردا اولان ميللي دوشونجه و دئولتچيلي بير تک سيستئم اولاراق گئچرلي اولوب. ائله محض بونا گؤره دير کي بيزلر چاليشماليييق تا ياخين گئچميشده باش وئرن پارچالانمالاري دوردوروب، يئنيدن گرچک و دوغرو بيرليگيميزين يؤنونده چاليشيب و هير باخيمدان ياراناجاق اولان بيرليگي قوروياغ.
گئچميش يازيمدا آذربايجان سورونون اوچ يئره آييرتتاراق، اونون ” تورک دونياسي ” ، ” بوتؤو آذربايجان ” و ” گونئي هرکاتي ” عادي وئرميشديم. بلليدير کي اوخوجولار بو آييريملارلا راضيلاشمايا بيليب، يادا اونو اؤنملي بيليب و اونا گؤره ايلرله مگي يارارلي بيلسينلر. آنجاق گرچک بودور کي دئديگيم 3 سورون، اؤزلوکلرينده و اؤزلرينه اؤزل دوروملاردا اينجلنمنه ليديرلر.
منيم باخيشيم آچيسيندان، ان دوغرو يول بودور کي، هر شئيدن اؤنجه سورونلارين ماهييتي بللي اولسون. نئجه کي بير دوکتور خسته نين نسي اولدوغونو بيلمه دن اونا ايلاج اويقولاماز، بيزده گرک سورونلاريميزين نه اولدوغون آنلاياراق اونلارا چؤزوم آخداراقغ. ايندي سوروشماليدير کي، گونئي هرکاتي دئديگيميز قالخيش نه دئمکدير؟ بوتؤو آذربايجان ايدياسينا نئجه ياناشماليدير؟ تورک دونياسينا نئجه گيره بيلير؟
گونئي هرکاتيندان دامنيشاندا، آييلميش بير بالاجا توپلومدان سؤز گئدير. ياني کي، ۲۰۰ ايل اؤزلوکلريندن اوزاق ساخلانان اينسانلارين بير نئچه سي، شخصي چابالاري و غورورلارييلا، گرچکلري آخداريب و آيدين بير دوشونجه يه چاتيبلار. اونلارين دوشونجه سينده، آذربايجان تاريخين باشلانقيجيندان بري، بير بوتؤودور، تورکدور و اؤزگوردور! اونلار چوخ ياخجي بيليرلر کي اينديکي آذربايجان بئله دييلدير!
اينديکي آذربايجان پارچالانيب، دوشونجه بيرليگيندن اوزاقلاشيب و حتّی تورک اولدوغون اونوتوب! گرچک بودور کي بو سونوجا وارمادان، گله جک اوچون يارارلي پلانلار چيزمک مومکون دييلدير.
گونئي آذربايجان ايللردير کي فارس شووونيسمي کؤلگه سينده، بئيين يوما سيستئمي آلتيندا و ديلي-الي باغلي اولاراق بيتکيسل ياشام دورومونا سالينيبدير. بو بيتکيسل ياشامدا، بئيين چاليشماز، ديل-ال ايشله مز و چابالارين قازانجي سؤمورگه چي گوجون جئبينه گئدر.
بير آز داها گئنيش باخارساق، اينديکي گونئي آذربايجاندا فارس اولماغ، ياخود فارس اولماغي يانسيلاماغ آرتيق بير گرچک خسته ليگه دونوشوب.
ساده ميثال ووروم، منيم باجيم تحصيل آلديقدان سونرا، ايش آخدارماغا گئدير. اونا ايش وئرنلرين هاميسي فارس شيرکتلري اولماليدير، ندن کي اونون تخصوصونه باغلي اولان دوروما گؤره، تورک تورپاغلاريندا اولان وارليقلارين صاحيبي فارس شووونيسميدير! آذربايجان يئر آلتي مدنلري هاميسي فارس حاکيميييتي نين قوللارينا تاپيشيريليب. ايسفاهان و کيرمان کيمين شهرلردن شيرکتلر گليب و حتّی تبريزين اطرافيندا قازينتيلار ياپاراق يئر آلتي حزينه لري تالاييرلار!
باجيمين شيکايتي بئله اولور کي، من گئتديم بيت شيرکته، اوردا اولان شخص بير تورک مودور ايدي. اونا دانيشديم، منه ايش وئرمه دي، ديپلومالاريم، ايشلريم و چاليشمالاريما باخمادي بيله! آما، او شيرکتين باش مودورونه دانيشاندا، مني سيجاق قارشيلادي، شيرين دانيشيقييلا منيم ديپلومالاريما باخدي، منه تبريک ائتدي کي چوخ باشاريلي ايشلريم اولوب و سونوندا مني گئچيجي اولاراق ايشه آلدي!
باجيم، آچيقجاسينا “تورک پيسدير”، “فارس ياخجيدير” قنايتينه گليبدير! ندن؟
فارس شووونيسمي يوز ايللر بويونجا گئجه گوندوز چاليشيب و سيياست اورتيب. بو سيياستلرين بيري بودور کي تورکلري ايش يئرلرينده ان آشاغي و ان تهلوکه لي يئره آتسين. يوخاريدا گئتيرديگيم ماجرادا گؤروروک کي شيرکتين اورتاسينا بير تورک يئرلشيب. او تورکون قرار وئرمک حاقي يوخدور، او تورک اوردا اوتوروب تا تورک ايشچيلرينه يوخ دئسين، تورک ايشچيلرين نفرتين قازانسين! آما، اولاي بودور کي او نفرت، شخ او تورکه دييل، تورکلوگو حدفه آلير!
ايندي سيزه ده آيدين اولور کي منيم دئديگيم باجي، تورک تورپاغيندا حزينه لري تالانينا دوشونمور، چونکي چوخ ازييتدن سونرا بير گئچيجي ايش تاپيب، منيم باجيم اؤز ميلتينه دوشونمور ندن کي اونا تورک مودور ايش وئرمييب، منيم باجيم اؤز ديليني قوروماغدان، فارس ديلينه اوز گتيرير، ندن کي ايشله ديگي يئرين باش مودوري، کي باجيميزا ايش وئريب فارسدير! اونونلا دوست اولماغ اوچونده اولسا، اونون گؤزونده داها چاليشقان و داها مودئرن گؤرومک اوچونده اولسا، فارس ديلي تورک ديلينه آغيرليق ائتمگه باشلير!
بالاجا بير اولايدير، آنجاق اتکيسي آييله لره داغيلير و آذربايجان تورک توپلومونو زهيرليير.
بو قونودا چوخ دانيشماغ اولار، بو قونودا گيزلي اولان گرچکلري داهادا چوخ آچيقلاماغ اولار، آما، کيم دانيشاجاق؟ کيم آچيقلاياجاق؟
بيلريک کي گونئيده ميلت آجيندا اؤلور، بيليريک کي گئجه-گوندوز فارس اولماغ اوچون چابالير، بيليريک کي بونا هم ايقتيصادي و همده سياسي ندنلر بايس اولور. چونکو آجليقدا ساخلانيلان ميلت ايلري گئتمگي باشارماز. سؤز بير ايکي مهبوسدان گئتمير، سؤز ايران آدلانان اولکه نين ان بؤيوک حيصه سي و او تورپاغلارين صاحيب اولان کوتله دن گئدير. بو کوتله خسته دير. کوتله نين خسته ليگين آنلامادان، اونا ايلاج وئرمک اولماز.
گونئي آدينا بير چوخلو تشکيلات يارانيب، يارانماقدا اولان بير نئچه سيده وار! گؤره سن بونلارين خئيري نه اولوبدور؟
ايسترديم قيسسا اولسادا، بو تشکيلاتلارين ايشلرينه بير گؤز آتام. گؤرم آخي بونلارين يارانماسي گرکلي ايدي؟ يارانماغ قوشوللاريساغلام ايدي؟ يارانديقدان سونرا يارارلي اولوبلار مي؟
ايلک اولاراق، چوخلاري نين قيجيق اولدوغو آد ايله باشلاياق گاموح
گونئي آذربايجان ميللي اويانيش هرکاتي، تبريزده يارانيب. اونو يارادانلارين ايلک باشدا گئدنلري بللي اولماسالاردا، در. ماهموده لي چؤهرقانلي گؤز اؤنونده دير. گاموح يارانيشي گونئيده چوخ بؤيوک بير اولايدير. کيمسه اونو دانا بيلمز کي گاموح ايچريده اولدوغو سؤرجده گونئي هرکاتيندا گوج وئريبدير. حتّی بونو دييه بيلرم کي گاموح واسيطه سيله، گونئي هرکاتي يئني بير دؤنمه باشلادي و او دؤنمين اؤنملي اولدوغو بوردادير کي نئچه ايللر ياتميش اولان هيسلر اويانديريلدي. بونو گاموح-اون و گونئي هرکاتي نين عظمتلي قازانجي آدلانديرماغ اولار.
آما، دوشوللار بير بير دييشدي و گاموح آرتيق گاموح ديييلدير. ايران آدلانان اولکه مأمورلاري اونون قورولوشوندا اللرين اولسا بيله، اونو داغيتماغا باشلاديلار و نه يازيق کي گاموح باشچيلاريدا بو داغيليشا يارديم ائتديلر. من هر زامان اوزوله رک دئميشم کي کئشکه گاموح باشخانليغي گرچکلري گؤروب و اونا گؤره ده داورانسايدي.
ايندي گونئيده يارانان سورونلارين چوخون گاموحا و گاموح-دا ايلهام آلان موخاليفتلره باغلاماغ اولار. چوخ آيديندير کي گاموح-اون ياراتديغي آتمويسفئر بير چوخونون خوشونا گئتمه ميش و اونا تپکي وئرمک اوچون ساييسيز حسابسيز اولاي يارانميش.
گاموح يارانديغي دؤنملرده، گونئيده و اؤزلليکله ده تبريز، اردبيل و اورمودا ياواش ياواش بير ميللي ساواش هييجاني ياشانيردي. بو ميللي هيجان اؤزلليکله ده کولتور اوجاقلاريندا باش وئريردي. باخين، بونا گؤره دير کي هر زامان کولتورل ساواشين داها يارارلي و قازانجلي اولدوغون باغيريرام.
شمس تبريز کيمي قوروملاردا و اونا بنزر بير چوخلو بالاجا کولتورل اوجاغلردا گئدن موباهيسه لر گئنيشله نيردي، ميللي کيمليک، تاريخ و ديل مسئله سي ديللرده گزمکدن، يازيلارا داشينميشدي. بير جومله ده دئسم، آذربايجاندا يئني بير دؤنم تمللري قويولماقدايدي.
بير سيرا موخاليفلر بو دؤنمين تمللرين داغلماسينا سبب گاموح-او گؤستريرلر. آنجاق گاموح-اون يارانيشي بير باخشيداندا تام فايدالي اولوبدور. باخين، ايران آدلانان حاکيمييت بير چوخلو ضياليني پلانلي شکيلده اؤلدوروب. ميثال اوچون، دکتر زهتابي-ني آذربايجان هرکاتيندان آلان فارس شووونيستلري نئجه چاليشيرلاردي. گاموح گلدي و گونئي هرکاتينا يئني آد و يئني مؤوقئييت قازانديردي و بو اولاي فارس حاکيمييتين قورخويا سالدي، حتّی بير سيرا ميللي فعال و ضيالييا، جان گوونجه سي قازانديردي.
گونئي هرکاتيندا قويولان تمللردن دانيشاندا، ايستر ايسته مز سول دوشونجه نين اتکيسيندن بحث ائتمک لازيم اولور. سول دوشونجه لي اولان بير چوخلو ميللي فعال هله ده گونئي هرکاتيندا وارديلار. آما، سورو بوردادير کي گونئي هرکاتيندا تمللري قويان ضياليلار، آيا بير ميللي هرکات اوچون چاليشيرميشلار يا کي بير سياسي دوشونجه اوغروندا؟
گؤرونن او دور کي گونئي هرکاتيندا قويولان تمللر يئترينجه گوجلو اولماييبلار و بير بالاجا يوک آلتيندا قاتلانيب، داغيليبلار. خوردا قالخيشي بيزه چوخلو درس وئردي، بيزيم گوجوموزون و زفيميزين هاردا اولدوغون بللي ائتدي. بيزه دئدي کي سؤز ايله عملي آراسيندا چوخلو فاصيله وار. بيزه دئدي کي فانتئزيله گرچکلرين آراسيندا دونيالارجا آرا وار. بيزه دئدي کي گونئي هرکاتي نين تمللري يئتيرينجه گوجلو دييلدير.
بس بو تمللري نئيله مک لازيمدي تا گوجلنسينلير؟ سوروسونادا ايندي مئيداندا اولان ضياليلار جاواب وئرمه ليديرلر.
سيزجه، گونئيده کولتورل ايشلرين ياراري چوخدور يوخسا خاريجده اولان بوش سؤز-صؤحبتلرين؟ طبیعي کي سيزينده جاوابينيز ايچريده کي کولتورل چابالارين يارارلي اولدوغو اولاجاقدير. آرتيق هاميميز گؤروروک کي گونئيده بير درگي قاپاناندا، بير چوخلو اؤيرنجي يوخودان اويانير، بير يئني درگي بوراخيلاندا، مينلرجه يئني اؤيرنجي ميللي هرکاتيميزا قاتيلير.
بونو بيليريکده، آيا بونون گوجلنمه سينه بير ايش گؤرموشوک؟ يوخ، ملسف يوخ و يازيقلار اولسون کي هئچ نه ائتمه ميشيک.
گونئيده اولان ميللي اؤيرنجيلريميزي هئچ باشادا دوشموروک! اونلاري اؤزوموزه ساده بير عسگر گؤروب، اونلارا فرمان وئريب و يؤنلنديرمک ايستييريک! هيرت بئله ساچما دوشونجه لره، هئيري بئله قزلق آخماليقلارا!
اؤيرنجيلريميز اوردا جانلارييلا ميللي هرکاتا جان وئريرلرسه، ان آزيندا اونلارا ماديي دستک اولماغ بيزلرين ميللي بورجو اولماليدير. اونلارين يانيندا، چيگين به چيگين ساواشا بيلميريکسه، اونلارين اولدوغو قوشوللاردان خبريميز يوخدورسا، اونلارين توتولوب ايشکنجه اولاراق اؤلدورولمه لريندن خبريميز بيله اولماديغي حالده، اونلاري آنلاماز عسگر يئرينه قويوب و يؤنتمک ايستمک اينسانليقدان اوزاقدير، منجه.
عباس لئيسانلي زيندانا دوشوب، ايشکنجه اولوب، تهقير اولوب، سورگون ائديليب، آييلجه تهلوکه دهري، ياشاماغ قوشوللاري آغيردير، اوشاقلاري هر آن ايضطيراب ايچينده لر، ياشامداشي گؤز ياشي تؤکور، … من و منيم کيمين خاريجده اولانلارسا، ايسدي يئرده اوتوروب، کامپيوتئر آرخاسيندا ميللي ظفردن دانيشيريق! هئرت بئله آنلاييشسيز عادتلره!
سعيد متينپور زيندانا دوشور، ياشامداشي توتولور، قارداشي توتولور و عئيني چتينليکلر و حياتي تهلوکه لرله اوز به اوز اولور، آما، بيزلرين چوخو سعيد متينپور دييه شخصين آدين اينتئرنئتدن ائشيتميشيک! هئچ بيلميريک کي سعيد ايللردير تورکجه ديل اؤيرتمکده چاليشير، بيلميريک کي او ميللي دوشونجه لي بير آذربايجانليدير، بيلميريک کي او ايللردير تورک ادبياتي، تورک ديلي و تورک تاريخي ايله باغلي قان ترين ايچينده دير! بيزسه اونا و مينلرجه اونون کيمي ايگيدلره، ايميل واسيطه سيله بير گولون عکسيني گؤندرمه گي بيله باجارميريق!
ايچريده اولان اولايلاردا آغير باسانلار کولتورل و فيزيکي دوشونجه لرين مئيداندا اولماسيدير. گاموح خاريجه داشينديقدان سونرا، يئني بير دؤنم باشلادي! اونا باخارا بور چوخلو تشکيلات ياراندي! آما، بو دفعه ايچريده يوخ، خاريجده و کامپيوتئر آرخاسيندا! هر گون بير تشکيلات، هر گوم بير بيلديري! فايداسين سوروشاندادا، سن وطن خايينيسن مارکي اؤرکلره ياپيشديريلير!
اونلاردان بيري گايپ-دير. گونئي آذربايجان ايستيقلال پارتيسي، اونو يارادانلارين کيم اولدوغو، آماجلاري نه اولدوغو و نه ياپديقغ ميلته آيدين اولماسادا، بيزلر بيليريک کي اونو يارادانلار کيملرديرلر، ندن ياراديبلار و نه ائتمک ايستييرلر. ايلک يارانيشدا بير سيرا ميللي فاللاري اومودا گتيردي، آنجاق ايندي!
گايپ-اين باشاريلاريندان بير نئچه اؤرنک:
- هئچ نه!
- يالان اولماسين دييه، خالق موجاهيدلري و عرب ترور دسته لرينه سئغيناراق بير ايکي يئرده گاموح ضيدي اولان گايپ بايراغيندان عکس سالماغ،
- و، ۱۰-۵ نفرليک قوناغليقدان فيلم چکيب اونا قورولتاي آدي وئريب و هيتلئر کيمين سالوت آلماغ!
د.ا.ک، د.د.ا.ک، آ.م.ا.ت، و.س کيمي تشکيلاتلارا توخونماغ لازيم دييل. اونلاردا اولان ستول ساواشي، خييانتلر و آدلداتمالار هامييه بلليدير.
بو ايشلره باخاندا اينسان اؤزونه اوتانير، آخي دانيشاندا ۴۵-۴۰ ميليون اينساندان، ۱۰ مين ايل تاريخ و مين ايللرجه دئولتچيليکدن دانيشيريق!
بونونلا ياناشي، بير سيرا خاريجده يارانان درنه کي ن ايشي يارارلي اولدوغونا گؤز يومموغ اولماز. ميثال اوچون، سياسي مهبوسلارا يارديم آماجييلا يارانان دونازهاک، آسمک، آداپپ و يا بير سيرا ادبي اوجاغين يارانماسي بيزلرين قازانجي ساييلماقدالار. اونلارين چابالاري سونوجو بير چوخلو خاريجي تشکيلاتلار آز دا بيزيم وار اولدوغوموزو اولسا بيلديلر.
آما، اونلارين چابالارينا آرخادان پيچاغ وورماغ اوچون، اونپو آدلانان درنکه باش وورون، پول وئريب و اؤيه اولان گاموح، بيزي گونئي ميلتي، و سانکي تاريخده هئچ دئولتچيليگيميز اولماييب، يئني بير آزينليغ تانيتديردي! بونون آدينا خييانت دئمک اولماسادا، ميللي هرکاتين اؤرگينه آغير يارا وورماق دئمک يالان اولماياجاقدير.
UNPO آدلانان درنک بير بالاجا درنکدير کي دئولتسيز آزينليغلارين بيلگيلرين توپلور. اولسون کي گئچميشده ائمنيستان يا اوکراينا اوردا اؤيه اولموش و سونرا اؤزگورلوک قازانميشلار! اؤنملي اولان بودور کي او آزينليغلار روس ميلتينه گؤره او درنگه گيره بيليب و اؤيه اولا بيليرلردير. آنجاق آذربايجاني ايکي فرقلي ميلت تانيتماغ اوچون، آذربايجان تورپاغيندان کوردوستان و يا تاليشيستان ياراتماغ ايسته ين يالانچي آزينليغلارلا بير آرايا گلمک، دئولتچيليگيميز يوخموش کيمي قاپيلارا سورونمک و سورون يارادان ساختا بايراغي ميللي بايراغ کيمي سونماغ! اينانيلماز بير اولايدير.
گاموح ايچريدن چيخديقدان سونرا، اونا باغلي اولان بير سيرا اؤز باشينا گئنج اولايلي حاديثه لره ندن اولدولار. آييله لره توخونماغ، فاللارا قارا ياخما و حتّی دؤيمک! و بير چوخلو سسي چيخاريلمايان باشقا اولايلار. او اؤز باشينا گاموح-چولار چاليشديلار کي گاموح-اون ايچ قولو آدي آلتيندا گونئي هرکاتين کونترولا آلسينلار! آما، آيدين اولدوغو کيمين، گونئي هرکاتي گاموح دئييلدير تا گاموح-چولار طرفيندن کونترول اولونسون.
مع الاسف گاموح ايداره چيلري بؤيوک بير رؤيايا داليبلار و هله ده اؤزلرين آذربايجانين قورتاريجيسي کيمي بيليرلر. دانيشيغلار، چيخيشلار و داورانيشلار هاميسي آنورمال اولان دورومدان خبر وئرير.
سانکي گونئي هرکاتيندان و اصلینده گونئيده کيمسه گاموح-دان باشقا بير تشکيلاتدا اؤيه دييلميش کيمي، سؤزلريندا اولوسال اؤندر، اولوسال ايستک و اولوسال بايراغدان دانيشيرلار! اؤزلري نين عيبادت ائتديکلري شخصين سؤزونه بير ذرهجه دير وئرميه رک، اونون دئديگي تچکيلات بايراغينا، اولوسال بايراغ اولاراق دوغوم گونو توتورلار!
سانکي ميللي قورولتاي و باي بک يوروشلرينده ياراتديقلاري سيخينتي و انگللر يئتمزميش کيمين، اينديده گونئيدن گلن سسلري سايمامازليقدان گليرلر! عئيني سؤيکنديکلري ويلايت-اي فقيه اينانجي کيمين، اونلارين گؤرمک ايستمه ديکلري، يوخدور دئمکدير!
ولايت فقيه تئرميني ايران آدلانان اولکه نين آنا ياساسينا يئرلشيب. اوندا بئله تعريف اولونور کي بير نفر روحاني، ايندي سيد علي خامنه اي، ميلتين باشي اوستونده دير و هامي نين خيري-شرري اوندان سورولور! بونون عامييانه تعريفي بئله دير کي ميلت قويوندور و ولي فقيه چوبان! جناب چؤهرقانليدا اله محض بونا ايناناراق، و اصلینده او فاناتيک ايسلامي دوشونجه سيله مئيدانا چيخميشدير.
دئييلديگي کيمين، گونئيده يارانان ميللي دوشونجنين پارتلاماسي و آجيقلانماسينا ندن اولان گاموح، دورومون يئتيشميش اولدوغوندان يارارلاناراق گاموح اولوب. يوخسا اونون کيمي آنيدن اورتاليغا چيخيب و يوکسلن بير تشکيلات، ندن ايللردي اؤز ايچينه قاپانيب و اسکيسي کيمين فعاليت ائتمير، يا حتّی، ندن ميللي دوشونجه ني بوراخيبدا، موخاليف دوشونجه لري قيجيقلانديرماغا اؤزن گؤسترير؟
ايللردير کي گاموح-چو اولمايان ميللي فعاللار (موخاليف تشکيلاتلاردان سؤز گئتمير) بايراغ مسئله سين ميللي بير مسئله بيله رک گاموح-دان ايستييرلر کي اونو گئري آلسين، ياخود گتيرسين عومومي بير توپلانتيدا سونسون و سس توپلاسين! ندن گاموح بو ايستکدن قاشچير و اونا قارشي تخريبات آپارير؟
ايللردير کي چاليشيرام او بايراغ فاناتيکلرينه آنلاتام کي آ دوستوم، تشکيلاتين بايراغ اولماز. سيزين تشکيلاتين آمبلئم، لوگو، سيمبول، سيمگه و اونا بنزر مارکاسي وار. او بوياديغينيز فيليستينه بنزر بايراغ دا نه دير؟ باخين، اله بو سورويا جاواب وئرمييب و اؤز باشيناليغلارينا داعوام وئرن گاموح-چولارين سهوي سونوجو، گايپ-دا بايراغ بويادي! بئله دوشونورم کي، ائله منده بير بايراغ ياراديم و صاباح اونون دوغوم گونونو ائلان ائديم!
سانکي بير دفعه بايبک قالاسينا يوروشده، آيلارجا قاباغدان تورپاغ آلتيندا ساخلانيلان بايراغين چيخاريلماسي آذربايجان ميلتي نين اونايي دئمکدير! کوتلوي بير گؤستريده بو اولايلارين گئچيجي اتکيسي اولا بيلر، آنجاق اونو ميلتين اونايلاماسي ايله قاريشديرماماغ لازيمدير. گاموح-چو دوستلارا سوروشاغ کي او يوروشه قاتيلانلارين نئچه نفري گاموح اؤيسيديلر؟ نئه نفري بيليردي کي او گون او ساختا بايراغ چيخاجاق؟ نئچه سي اوندان سونرا او بايراغا اينانديلار؟ بير نئچه فاناتيک گئنجدن باشقا، کي اورا-بورا بايراغ ياپيشديريب اکس سالماغا مشغولدولار، داها کيم او بايراغي ميللي بايراغ قبول ائديب؟
من دکتر چؤهرقانليدان سوروشدوم کي جناب، سيز ايللردي ميللي هرکات آدينا چاليشيرسيز، بو گونه اودر هانسي کيتاب و درگيني ايچريده، شهرلرده و کندلرده داغيتيبسيز؟ سورونون جاوابين وئره بيلمه دي، چونکو جاوابي يوخيدي. اونلارين ايشي سادجه اؤز آدلارين ديري ساخلاماغ اولوب. آدين ديري قالماسي نين قوشوللاريندان بيله خبرلري اولمايان بو تشکيلات اؤيه لري، زامان و بزن ماددي ايمکاناتي يانليش يئرلرده صرف ائتمگه مشغولدولار.
آدين قالماسي اوچون لاييقي ايشلر گؤرونمه ليدير. ميثال اوچون، ۱۰ ايللردير اليئو حاکيمييتي دئولت گوجون قوللاناراق، مممد امين رسولزادنين آدين آذربايجان تاريخيندن سيلمک ايستيير، سيزجه باشاريلي اولوبمودور؟ اولماييب، و حتّی مممد امين رسولزادنين داها دا چوخ يوکسلمه سينه ندن اولوب.
سؤز گونئي هرکاتيندان گئدير، بو هرکاتين بير اوجو آذربايجانين قوزئيينده، بير اوجوسا تورک دونياسيندادير. آما، بو اوچلوگو بير بيرينه يئتيشديرمک اوچون، زمين و ايمکان ياراتماميز لازيمدير.
داها اؤنجه کي يازيمدا بيلديرميشديم کي گونئي بو گون فارس هاکمييتيندن قورتولورسا، قوزئي ايله بيرلشمک اوچون حاضير اولماياجاقدير. بو گون بونو سيزه دئييرم کي اگر گونئي موستقيلليگين آليرسا، ايلک قوزئي حاکيمييتي اولاجاقدير کي سينيرلاري قاپاتاجاق و او تايا گئدنلري يا بو تايا گلنلري گولوله ايله اؤلدوره جک.
بيرلشمک دئييشيله گرچک قوشوللاري اينجله مک لازيمدير.
من بو ندنلره گؤره اينانيرام کي گونئي هرکاتي و اونا باغلي چابالار بوتؤو آذربايجانا باغلي اولدوغو صورتده، بير او قدر ده موستقيلليگي اولماليدير. بو موستقيلليکلردن، صاباح اؤز تورپاغيني قوروماغ گوجونه ماليک اولماغ، صاباح اؤز دئولتچيليگيني گئچيجي اولسادا قورماغ ايمکانينا ماليک اولماغ و ان اؤنمليسي، ميللي دوشونجه ني ياراديب و گوجلنديرمک.
من بيليرم کي بيزيم خاريجده ياشايان سويداشلاريميزين ايسته کي ميللي کاراکتئرليدير، آنجاق اونلارين ايسته کي له گونئي گرچکلري يئردن گؤيه قدر فرقليدير. گونئي موستقيلليگي اوچون بير چوخلو اولوسلاراراسي انگلدن آشماميز لازيمدير.
ميللي فعال آدينا خاريجده چاليشانلار هاميسي گئجه لر ديل آچيرلار. او دا کامپيوتئر آرخاسيندا! اوتوروب خبر اوخورلار، هردن يازي يازيرلار و بيرده کي گئديب پالتالک اوتاغلاريندا فارس و کورد ايله قوناغباجي اويناييرلار. من بو چابالارا يارارلي ايش عادي وئرمرم. يارارلي ايش اودور کي کوردلر و فارسلا گؤرور.
فارس هر گون يئني بير هيله ايله باشيميزي توولور. کورد هر گون بير آدديم داها تبريزه ياخينلاشير! بيز آما، آديميزا اينسان قويوب و گئجه ياتمادان اؤنجه بير بارداغ سوت ايچيريک!
کوردلرين اينتئرنئتده اولان فعاللاري بيله هاميسي داغا گئديب، داغدان گليب و يا داغا گئدنلرديلر. هاميسي نين دانيشيغلاريندان بلليدير کي کالاشينکوفو قوجاغيندا اوتوروب کامپيوتئر آرخاسينا! فارسدا اونا بنزر دير، ميلتلرين سروتينه جايناغ آتيب و گون به گون گوجله نير!
آي ساده فعالاريميز، گلين بير آزدا اولسا گرچکچي اولاغ.
يانليشي ياريسيندا بوراخماق، قازانماغ دئمکدير. ايللردير يانليشلاري داعوام وئرديريريک، سيزجه بس دييلميدير؟ ايلک دفعه اولسون بيله، بير آرايا گليب آيدين اينسانلار کيمين دانيشيغلارا گيرمه ميز اويقون دييلميدير؟
گونئي هرکاتينا گوج وئرمک اوچون، ايلک آدديم اونا سابيت بير گؤرونوش قازانديرماغدير. بو گؤرونوشون ايلک آشاماسي، سيمگه دير. سيمگه دئييرم آما، من اينانيرام کي ايندي سئچيله جک اولان سيمگه، گله جکده گئچيجي اولسادا، گونئي هرکاتي نين موستقيلليک بايراغي اولاجاقدير.
لازيم گؤرونن سيمگه ني سئچمک اوچون، کيمي اؤنري وئرمک ايستيير، کيمي دانيشماغ ايستيير و کيمي سس وئرمک ايستيير قولون سيواماليدير. بو گون داها اوتورماغ بيزيم ياراريميزا اولماياجاقدير.
گونلردي کي گونئيدن اؤنريلن، ايللر اؤنجه بير کيتابدا يئر آلان سيمگه سونولماقدادير. او سيمگه ني تعريف ائدنلر و تهريف ائدنلرين سؤزون بوش وئرمک لازيمدير. تعريف ائدنلر اگر اونا ميللي گئچميش قازانديرماغ نييتينده لر، تهريف ائدنلردم اگر هرکاتي ساپديرماغ و يا ساختا بايراغلارين قوروماغا چاليشيرلار، هاميسي بوشونا زحمت ائديرلر.
سيمگه و اورتادا اولان اؤنريلره بيرگه قرار وئريلمه ليدير. بو نوکتادير کي گئچميشده اولان ساختا سئچيملرين قبول اولونامامازليقلاريني و يئني سئچيله جک اولان سيمگه نين لئجيميت اولدوغون آچيقلايير.
اؤنريلن سيمگه ني ايسته ين و ايستمه يهنلرين سؤزلري دينله نيلمه ليدير. بو سؤزلر منطيقي اولورسا، اونلاري اينجلمکدن سونرا، هانچيسي داها چوخ يارارلي اولاجاق دييه سئچيلير. بونا دئييلير دئموکراتيک سئچيم. آما، گونيئ ايله باغلانتيدا اولمايانن بير توپلانتي نئجه دئموکراتيک اولا بيلير کي؟ ائله بونا گؤره دير کي اينديکي دوروملاري گؤاه آلاراق، ياپيلاجاق اولان توپلانتيلاردا يازي و سس يازيلمالي و اينتئرنئت واسيطه سيله گونئيده کي سورداشلارا چاتديريلماليدير. بو وسيله ايله، گونئيده ياشايانلاردا يانا يا قارشي دانيشيقلاري دينلييب، اؤز سؤزلرين چئشيتلي يوللار ايله خاريجده کي سويداشلارا چاتديرا بيلرلر.
بير داها آچيقلامام لازيمدير کي سئچيله جک اولان سيمگه، گونئي هرکاتي آدينا چاليشان تشکيلاتلار و شخصلر اوچون گئچرلي اولاجاقدير. بيليريک کي گونئيلي سويداشلاريميزين دانيشماغا و ايستمگه نه بيلگيلري يئترليدير و نه ايمکانلاري وار تا سزلري دئسينلر.
سئچيله جک اولان سيمگه، يالنيز ميللي فالاري بير يؤنه گتيرمک اوچون، گله جک گؤستريلرده ايتتيهاد و بيرليک گؤسترگه سي اولماغ اوچون و بالا بالا اولوسلاراراسي قوروملارا داشينماقدا اولان ميللي موجاديله ميزين تانيتيمي اوچون گرکليدير. ميلتيميزين بايراغي بوتؤو آذربايجاندا سئچيله جکدير. اونسوزدا ميللي بايراغيميز هله ليک آذربايجانين قوزئي بؤلومونده دالقالانماقدادير.
گونئي هرکاتي اوچون بيرگه سيمگه سئچمک اوچون، اونريلن سيمگه ده اولان آي و اولدوزون قارا اولماسي بير سيرا سويداشلارين ناراحات اولماسينا ندن اولوب. بو بير اؤنري اولاراق، تبيدير کي تام دوزگون بير سيمگه اولماياجاقدير.
گئچنلرده وئريلن يئني اؤنريلر دوغرولتوسوندا، بلکي قارا يئرينه ساري قوللانيليرسا داها اويقون اولسون.
آيدين تبريزي* و حتّی ميللي پارتي-دن** گلن بيلديريده ساري رنگ اؤنريليبدير. منده شخص اؤزوم اولاراق، ساري رنگي داها اويقون گؤرورم. دوغرودور کي گونئيده اولان سويداشلار اؤنرديکري سيمگه اوستونده بير چوخلو هزينه ائديبلر، آنجاق، هاميميزين ايسته کي بودور کي تورکچو و غورور وئريجي بير سيمگه ميز اولسون.
آغ ايله قارا هر زامان بيربيرينه قارشي اولوبلار. دوغرودور کي بو ايکي رنگ بيربيرين تاماملايان رنگلرديلر، آما قارا رنگين سيمگه ميزده اولماسي بير آز اوزوجو و اوتانديريجيدير. شخصن اينانيرام کي ساري رنگ بيزيم قوزئيده دالقالانان ميللي بايراغا داها ياخين اولاجاق، حتّی اونلارين بير گؤرونوشونه بيله سبب اولاجاق. ياني کي، گونئي و قوزئي بير بيريندن او قدر ده آيري اولماياجاقلار. و بيرده، شافاق ايله گونش کيمين آنلاملارا ياخينلاماق اولاجاقدير. اووزئيده ايستيقلالييتيميزين شافاغي آچيليب، گونئيده ايسه گونش آچيلاجاق. ياني گونئي موستقيل اولورسا، آذربايجان گونشي سمالارا چيخاجاق. البتته کي بو بير اؤنريدير و لازيم اولدوغو قدر اوندان مودافيه ائدجگم. آما، توپلانتيلاردا و ميللي فالارين بيرگه قرارينا اينديدن اوياجاغيما سؤز وئريرم.
ميللي موجاديله ميزين باشقا يؤنلريده وار. ان اؤنمليسي، گونئي ايستيقلالييتي و اولوسلارارسي ايليشکيلردير. بونا وارماغ اوچون، ميللي فاللاريميزين ايچينده بيرليک يارانماليدير تا گوج بيرليگي الده اولسون. ايچري و خاريجده کي گوجلرين پارالئل چابالاري سونوجو، گونئي اؤزگورلوکدن بير آدديم اوزاقدادير.
چاليشاق کي بير داها سهوه يول وئرمه يه يک. گونوموز بونو ايستيير کي بير و يالنيز بير سيمگه آلتيندا توپلانان. سونولان سيمگه نين تورکچو، ايسلامچي و اؤزگورلوک کيمي گؤسترگه لري وار، آذربايجاندا ايسه بو ۳ بؤلومون يانليلاري اولدوغونو بيليريک، دئمک کي، سونولان سيمگه هامي نين کؤنلون خوش ائده بيله جکدير.
سون اولاراق بيلديريم کي، ايندي سونولان سيمگ ايله موخاليف اولانلارا جاواب اوچون، و گله جکده يئنيدن بايراغ ساواشلارينا دالماماغ اوچون، بير داها قارا يئرينه ساري اولماسين اويقون گؤرورم. بو دفعه ، آرزو ائديريم کي، آرتيق کيمسه سيمگه ني منيمسه يه بيلميه جک.
بيرليگه گئدن يول، بير دوشونجه دن و بير يولدان گئچر!
تبريزلي باي بک
۱۶/۰۷/۲۰۰۸
کرويدون
* [1] www.11008.bayb…
[2] www.11008.bayb…
** [3] www.11008.bayb…
٫بير ميللتين سسي
پایلاش | پرینت
بورا باغلي يازيلار:
- وقتي شوونيستها قات ميزنند! اشتباه فجيع فارسهاي دو آتشه در خصوص دو تشکل آذربايجاني و تلاش آنها براي سؤ استفاده - تبريزلي باي بک
- فيکير موباحيثه سي و شخصيت ترورو - عليرضا اردبيلي (باي بک آچيقلاماسي ايله بيرليکده ياييليب)
- شرفدن دانيشانلار، شرفسيزليکدن اوزاق دورارلار! تحميل ائديلن بايراغ بيزي پارچالاياجاق مي؟ - تبريزلي باي بک
- “آزاد تريبون” سيته سي نين مسئولو ايديعا ائتديگي ژورناليسمين ائتيکاسنا صاديق قالا بيلمه دي!
- گلین بو داشی اته یینیزدن تؤکون! “میللی سیمگه اونریسی یا میللی سیمگه ***” یازیسینا تنقید - آیتان ار اوغلو
- گونئي آذربايجاني “لاتينلشديرمه”نين ايکينجي پرده سي! تبريزلي باي بک
- عليرضا بئي اردبيلي, تنقید ائتدیینیز یازی مستقیل فعاللار طرفیندن ياییملانان موراجیعت-له علاقه سی یوخدور - ا. اورمولو
- میللی کیملیک” مقوله سی و “موطلق آد” یوخسا “دئییم تانیما” (ترمینولوژی) چتینلیگی - ایشیق سؤنمز
- حمید تبریزلی ایمضاسی ایله “گفتمان هویت طلبی در آذربایجان – ۱” آدلی یازیلمیش مقاله یه باخیش - ایشیق سؤنمز
- گونئی آذربایجان و بایراق مسئله سی - ايشيق سؤنمز
گوروش ۲
http://www.baybak.com
بای بک سایتیندان پرینت اولوب
http://www.11008.baybak.com/il_11008_say_509.azr
یازینین اینترنت آدرسی
یازیده ایشه آلینان اینترنت آدرسلری
[1] www.11008.bayb…: http://www.11008.baybak.com/il_11008_say_508.azr
[2] www.11008.bayb…: http://www.11008.baybak.com/il_11008_say_473.azr
[3] www.11008.bayb…: http://www.11008.baybak.com/il_11008_say_502.azr
: “تبریزلی بای بک” ایمضاسی ایله آذربایجان میللی مسئله سی اوزره یازیلمیش دوشونجه لره باخیش - ایشیق سؤنمز سویلییر
اُرتاگؤن ۲۷ قوراپيشيرن ۱۱۰۰۸ @ ۸:۵۰ آ.خ
[…] ۱ تبریزلی بای بک، ايري اوتوراغ، دوز دانیشاغ، گونئيده نه لر اولماليدير؟: [۱] http://www.۱۱۰۰۸.bayb… […]
: گونئی آذربایجان و بایراق مسئله سی - ايشيق سؤنمز سویلییر
اُرتاگؤن ۲۷ قوراپيشيرن ۱۱۰۰۸ @ ۱۱:۱۵ آ.خ
[…] اوتوراغ، دوز دانیشاغ، گونئيده نه لر اولماليدير؟: [۲] http://www.۱۱۰۰۸.bayb… ۴- Çingiz Göytürk, Azәrbaycan Milli Azadlıiq Tәşkilatının Sözcüsünün çıxışi vә […]