“گونئي آذربایجاني ائلچی بئی سينديروموندان قوروياق” يازيسينا اؤتري بير باخيش - خزر گؤنئیلی
بای بک، آذربايجان | باشگؤن, ۲۴-ي قوراپيشيرن , ۱۱۰۰۸ اینجی ایل, چولا ۲۳:۳۸ [آ.خ] | یازی و قوشوق
 |
. | حؤرمتلي سويداشيميز صمد نيکنام يازيسي نين سونوندا “گونئي آذربايجان ميللي آزادليق موباريزه سي ميللي، مدني و قانسيز-قاداسيز بير موباريزه دير. آذربايجانين چاغداش ميللي موباريزه سي مودئرن و مدني کاراکتئر داشييير”، دئيير. بو گؤروشون بوتونلوگو ايله راضيلاشماق اولار. بلي، گونئي آذربايجان ميللي حرکتي مدني کاراکتر داشيماقدادير و بو ايديعاني بير چوخ سندلرله ايثبات ائتمک اولار. بابک قالاسي يورويوشو، موختليف ميللي، مدني ميتينق و اعتيراضلي نوماييشلرين کئچيريلمه سي، خرداد اولايلاري، يوزلرجه کيتاب و درگي نين ياييملانماسي و.س بونا سندديرلر. اوسته ليک بعضي نادير حاللاردا گونئي آذربايجان ميللي حرکتيني اؤز منطيقي گئديشيندن چيخارتما چابالاري دا قيسير قالميشدير! گؤروندويو کيمي گونئي آذربايجان ميللي حرکتي بورادک مودئرن و مدني بيچيمده موجاديله ني باشارميشدير و بوندان سونرا دا بو کاراکترده سوره جگينه امين اولماق اولار. |
سؤز قونوسو ائلچی بئی دئييل!
ياخين زامانلاردا گونئي آذربايجان ميللي حرکتي نين سيمبولو ايله باغلي گونئي آذربايجان ميللي چاليشقانلاري طرفيندن بير موارجيعت ياييلميشدير. موراجيعت ياييلمادان اؤنجه و سونراسيندا نئت سيته سي و قروپلاردا گئنيش صؤحبت و موباحيسه لر باشلانميشدير. بعضي تخريباتچي ايشلردن کئچديکده بوتون موباحيسه لري گونئي آذربايجان ميللي حرکتي نين گليشمه سي ايستيقامتينده ديرلنديرمک اولار.
حؤرمتلي سويداشيميز صمد نيکنام “آذربايجان ميللي حرکتينده بوتؤولوک آنلاييشي و ميللي سيمگه مسئله سي”* يازيسينا تنقيدي باخيشيني يازميشدي. يازي “گونئي آذربايجاني ائلچی بئی سينديروموندان قوروياق”** باشليغي ايله ياييملانميشدي. بو هاقدا نئچه مسئله يه ايشاره ائتمک ايسترديم.
صمد نيکنام جنابلاري اؤز يازيسيندا رحمتليک ائلچي بئی-ين موباريزه فلسفه سينه و بونونلا ايلگيلي بعضي مسئله لره توخونور. يازار قوزئي آذربايجاندا ۲۰ ژانویه، قاراباغ و خوجالي حاقيندا اوز وئرن اولايلاري “فلاکت” اونوانلانديراراق اؤز باخيشينا اساسن بونلاري ايضاح ائتمه يه چاليشير. البتته بو و باشقا مسئله لره هر کس هر هانسي باخيش ايله باخا بيلر و اؤز شخصي گؤروشونو اورتايا قويا بيلر. بو آرادا صمد بئي نيکنام سويداشيميزين دا بو هاقدا طبیعي حاقي وار. بوندان سونرا حؤرمتلي يازار “موختصر آذربايجان تاريخي” کيتابينا توخوناراق بو کيتابين علمي اولماديغيني دئيير. بو هاقدا دا يازارين طبیعي اولاراق حاقي وار. او، و باشقا تاريخچيلر کيتابين مؤهتواسي حاقيندا هر هانسي تنقيدي باخيشلاريني اورتايا قويا بيلرلر. حؤرمتلي يازار تکجه ائلچی بئی، اونون موباريزه فلسفه سي و سؤزو گئدن “موختصر آذربايجان تاريخي” کيتابيني تقيد ائتميشدير.
بو يازيدا هئچ ده دئييلن قونولارا گيرمک ايسته ميرم. منيم توخوناجاغيم بير شئي وار. بوگون ميللي حرکت چاليشقانلاري آراسيندا جيدي اولاراق ميللي سيمبول يا ميللي سيمگه موباحيسه سي گئدير. رحمتليک ائلچي بئی-ين موباريزه فلسفه سي، دوشونجه و فيکير سيستئمي و باشقا جهتلري هر زامان تارتيشيلا بيلر. يقين کي، بوتون اينسانلارين ياشاميندا و ائلجه ده ميللي اينسانلاريميزين موباريزه حياتلاريندا موثبت و منفي جهتلر اولا بيلر. ائلچی بئی دوشونجه سي حاقيندا ايندييه ده ک چوخ يازيلميش و بوندان سونرا دا يازيلاجاقدير. بوگون سؤز قونوسو اولان ميللي حرکتين سيمگه سيدير، ائلچی بئی دئييل! بعضي يازيلاردا ائلچی بئی و اونون گونئي آذربايجان بايراغي ايله موناسيبتينه توخونولموشدور. بو يازيلارين ياييلماسي و هر هانسي باخيشين اورتاليغا چيخماسي اولدوقجا طبیعي حالدير.
گونئي آذربايجان ميللي حرکتي سيمگه سي حاقيندا ياييلان موراجيعتده اؤنريلن طرحين “ب.ا.ب” (بؤتؤو آذربایجان بیرلیگی) تشکيلاتي نين يايينلاديغي “موختصر آذربايجان تاريخي” کيتابيندا گلديگي دئييلير. ميللي چاليشقانلار طرفيندن ياييلان سندده بوندان باشقا هئچ بير سؤز يوخ! موراجيعت بير چوخ نئت دوشرگه لرينده يايينلانميش و هم ده اؤزل وئب صحيفه ده يئرلشديريلميشدير.
اورادا ائلچي بئی-ين آدي گئتمير. ائلچي بئی-ين سؤزو گئدن طرحين قبوللوغوندان دا سؤز گئتمه ميشدير. طبیعي کي ياييلان رسمي سند يعني موراجيعت هر هانسي يازيدان داها آرتيق جيدييه آلينماليدير. ياييلان سندده يالنيز اؤنريلن سيمگه طرحي نين (يعني هيلال و اولدوزو قارا بويادا اولان طرح) “ب.ا.ب” تشکيلاتي طرفيندن ياييملانان “موختصر آذربايجان تاريخي” کيتابيندا درج اولونماسي دئييلير. بو ايسه دانيلمازدير.
موراجيعتي حاضيرلايانلارين فيکرينه گؤره سؤزو گئدن طرح اؤزل شخص، قروپ و تشکيلاتا باغلانماديغي اوچون موناقيشه قايناغينا چئوريلمز و چوخلاريني بيرلشديره بيلر. بو فيکير ايسه بو سبوتون منطيقي گؤرولمکده دير. اصلینده بو ايشين هر هانسي سببه گؤره قارشيسينا چيخماق ايسته ينلر و بو منطيقي و لازيمي گؤرولن چاباني انگلله مک نيتي ايله اورتايا گلن کسيملر يانليشجاسينا و يارامازجاسينا ائلچي بئی-ين آدي و شخصيتيني قوللانماق ايسته ييرلر. بونلار رحمتليک ائلچي بئی-ين بو سؤزونو تکرارلاياراق، دئييرلر کي، ائلچی بئی گونئي آذربايجانا بايراق تعيين ائتمکله موخاليف اولوب و واختييله قوزئي آذربايجان بايراغي نين گونئي آذربايجانا گئده جگيني دئميشدير. دوغرودور، ائلچی بئی بونو دئميشدير، آما چوخ اؤنملي اولان بير مسئله واردير.
ائلچی بئی بو سؤزلري “موختصر آذربايجان تاريخي” کيتابي نين “ب.ا.ب” طرفيندن ياييلماسيندان چوخ اؤنجه دئميشدير. “موختصر آذربايجان تاريخي” کيتابي ۱۹۹۹-دا “ب.ا.ب” طرفيندن ياييلميشدير. بو تاريخده ائلچی بئی ديري اييدي و “ب.ا.ب” تشکيلاتي نين سدري ايدي. عاغيل و منطيقه اساسن او، بو مسئله دن خبرسيز اولا بيلمزدي. بو اولدوقجا آيديندير. ائلچي بئی-ين کيتابدا گلن طرح ايله موخاليفتينه دايير هر هانسي سند وارسا، ايديعا ائدنلر اورتايا قويماليديرلار! وئريله جک سنه دين تاريخي ۱۹۹۹ ايليندن و “موختصر آذربايجان تاريخي” کيتابي نين نشري تاريخيندن سونراسيندا اولماليدير. کيتابدا گلن طرح قوزئي آذربايجان ميللي بايراغي طرحي ايله بيرگه دير، هيلال و ۸ بوجاقلي اولدوزون قارا بويادا اولماسي اؤتريدير. بو ايسه ائلچيبگين اؤنجه کي سؤزلرينه ترس دئييل.
حؤرمتلي سويداشيميز صمد نيکنام يازيسي نين سونوندا “گونئي آذربايجان ميللي آزادليق موباريزه سي ميللي، مدني و قانسيز-قاداسيز بير موباريزه دير. آذربايجانين چاغداش ميللي موباريزه سي مودئرن و مدني کاراکتئر داشييير”، دئيير. بو گؤروشون بوتونلوگو ايله راضيلاشماق اولار. بلي، گونئي آذربايجان ميللي حرکتي مدني کاراکتر داشيماقدادير و بو ايديعاني بير چوخ سندلرله ايثبات ائتمک اولار. بابک قالاسي يورويوشو، موختليف ميللي، مدني ميتينق و اعتيراضلي نوماييشلرين کئچيريلمه سي، خرداد اولايلاري، يوزلرجه کيتاب و درگي نين ياييملانماسي و.س بونا سندديرلر. اوسته ليک بعضي نادير حاللاردا گونئي آذربايجان ميللي حرکتيني اؤز منطيقي گئديشيندن چيخارتما چابالاري دا قيسير قالميشدير! گؤروندويو کيمي گونئي آذربايجان ميللي حرکتي بورادک مودئرن و مدني بيچيمده موجاديله ني باشارميشدير و بوندان سونرا دا بو کاراکترده سوره جگينه امين اولماق اولار.
خزر گؤنئیلی
۱۴/۰۷/۲۰۰۸
* [1] www.11008.bayb…
** [2] www.11008.bayb…
٫بير ميللتين سسي_ _ _ _ _ _ _
مربوط اُلان یازیلار
- ===> گونئي آذربايجاني ائلچي بئي سيندروموندان قوروياق - صمد نيکنام
- ===> آذربايجان ميللي حرکتينده "بوتؤولوک" آنلاييشي و ميللي سيمگه مسئله سي - کورشات مرندلي
پایلاش | پرینت
بورا باغلي يازيلار:
- فيکير موباحيثه سي و شخصيت ترورو - عليرضا اردبيلي (باي بک آچيقلاماسي ايله بيرليکده ياييليب)
- شرفدن دانيشانلار، شرفسيزليکدن اوزاق دورارلار! تحميل ائديلن بايراغ بيزي پارچالاياجاق مي؟ - تبريزلي باي بک
- “آزاد تريبون” سيته سي نين مسئولو ايديعا ائتديگي ژورناليسمين ائتيکاسنا صاديق قالا بيلمه دي!
- گلین بو داشی اته یینیزدن تؤکون! “میللی سیمگه اونریسی یا میللی سیمگه ***” یازیسینا تنقید - آیتان ار اوغلو
- گونئي آذربايجاني “لاتينلشديرمه”نين ايکينجي پرده سي! تبريزلي باي بک
- عليرضا بئي اردبيلي, تنقید ائتدیینیز یازی مستقیل فعاللار طرفیندن ياییملانان موراجیعت-له علاقه سی یوخدور - ا. اورمولو
- میللی کیملیک” مقوله سی و “موطلق آد” یوخسا “دئییم تانیما” (ترمینولوژی) چتینلیگی - ایشیق سؤنمز
- حمید تبریزلی ایمضاسی ایله “گفتمان هویت طلبی در آذربایجان – ۱” آدلی یازیلمیش مقاله یه باخیش - ایشیق سؤنمز
- ايري اوتوراغ، دوز دانیشاغ، گونئيده نه لر اولماليدير؟ - تبريزلي باي بک
- گونئی آذربایجان و بایراق مسئله سی - ايشيق سؤنمز
http://www.baybak.com
بای بک سایتیندان پرینت اولوب
http://www.11008.baybak.com/il_11008_say_481.azr
یازینین اینترنت آدرسی
یازیده ایشه آلینان اینترنت آدرسلری
[1] www.11008.bayb…: http://www.11008.baybak.com/il_11008_say_431.azr
[2] www.11008.bayb…: http://www.11008.baybak.com/il_11008_say_448.azr
گوروش کاپانیبدی