بو ميلتين آييني، اولدوزونو قارالتمايين! - چينگيز گؤيتورک
بای بک، آذربايجان | باشگؤن, ۲۴-ي قوراپيشيرن , ۱۱۰۰۸ اینجی ایل, چولا ۱۸:۱۸ [آ.خ] | یازی و قوشوق
 |
. | (ديققت: باي بک آلديغي يازيلار و خبرلرين آذربايجان هرکاتي و گونوموزون قونولارينا توخوندوغونا گؤره يايينلار. بو دوغرولتودا، موخاليف و مووافيق گؤروشلرين يايينلانماسي بيزيم ايکلين قوراللاريميزداندير. باي بک اؤزونه اؤزل سيياستي اولسادا، سيته نين بير اؤزگور مئديا اولدوغونا صاديق قاليب و کيمسه نين سؤزون يا سسين سانسور ائتمز. آنجاق بونو بيلديرمک لازيمدير کي باي بک ميل-قوروپلاريندان آلديغي ماتئرياللاري سيته ده يئرلشديرمز. بونا ندنسه، يازارلار و اثر صاحيبلري نين بيلمه دن يا ايستمه دن بيزيم آدرئسه گؤندرديکلري ماتئريالين ايزينسيز قوللانيلماماسيدير. باي بک هر زامان اينتيقادي، اينجله ين و چوخ سسلي مئديا اولدوغونا فخر ائديب. باي بک) |
(ديققت: باي بک آلديغي يازيلار و خبرلرين آذربايجان هرکاتي و گونوموزون قونولارينا توخوندوغونا گؤره يايينلار. بو دوغرولتودا، موخاليف و مووافيق گؤروشلرين يايينلانماسي بيزيم ايکلين قوراللاريميزداندير. باي بک اؤزونه اؤزل سيياستي اولسادا، سيته نين بير اؤزگور مئديا اولدوغونا صاديق قاليب و کيمسه نين سؤزون يا سسين سانسور ائتمز. آنجاق بونو بيلديرمک لازيمدير کي باي بک ميل-قوروپلاريندان آلديغي ماتئرياللاري سيته ده يئرلشديرمز. بونا ندنسه، يازارلار و اثر صاحيبلري نين بيلمه دن يا ايستمه دن بيزيم آدرئسه گؤندرديکلري ماتئريالين ايزينسيز قوللانيلماماسيدير. باي بک هر زامان اينتيقادي، اينجله ين و چوخ سسلي مئديا اولدوغونا فخر ائديب. باي بک)
“بايراغيميز ايدئيا قايناغيميزدير”
ابولفضل ائلچي بئي
چاغداش آذربايجان ميللي هرکاتي ميللي-مدني فازدا جيدي مووففقيتلر قازانديقدان سونرا ميللي-سياسي موستوييه کئچيش سورجي نين آغريلاريني، سانجيلاريني ياشاسا دا، ايره ليله مکده و آرتيق جيدي بير گئرچکليک کيمي قلوبال دونيا سيياستي نين ديقت مرکزينه چئوريلمکده دير.
قورتولوش موجاديله سي وئرميش و يا وئرمکده اولان ميلتلرين ميللي هرکاتلاري نين تجروبه سينه باخديغيميزدا چاغداش آذربايجان ميللي هرکاتي نين ياشاديغي بو آغريلارين، سانجيلارين سادجه بيزيم هرکاتا مخصوص اولماديغيني، دولاييسي ايله، ياشانماسي و آشيلماسي گرکن نورمال بير سورج اولدوغونو گؤره بيلريک. شوبهه سيز کي، آغريلي، سانجيلي بو سورجين آشيلماسيندا آذربايجان آيديني نين و ميللي هرکات فاللاري نين اوزرينه آغير مسئوليت و وظيفه لر دوشمکده دير.
چاغداش آذربايجان ميللي هرئکاتي نين ميللي-مدني فازدان ميللي-سياسي فازا سورعتلي بير بيچيمدکئچميشدير. بو سورعتلي کئچيشي آرخادا بوراخديغي سورجده قازانديغي بؤيوک نايليتلرله ياناشي، هم ده اولوسلاراراسي سياسي شرطلرين اولوملو بير بيچيمده اولوشماسي ايله ايضاح ائتمک هئچ ده يئرسيز اولماز. آنجاق بو سورعتلي کئچيش موثبت يؤنلري ايله بيرليکده، يئني مرحله يه يئترلي حاضيرليغيميزين اولماماسي اوجباتيندان بير سيرا سيخينتيلاري دا برابرينده گتيرميشدير. کئچميش هرکاتلاريميزين دا تجروبه سينه داياناراق، بو سيخينتيلارين دوزگون تسبيتي و اورتادان قالديريلماسي چاغداش هرکاتيميزين اؤز حدفلرينه دوغرو آخسامادان ايره ليله مه سي اوچون اولمازسا-اولماز شرطدير. بهسيني ائتديگيميز بو سيخينتيلار، اؤزلليکله ده نظري-ايدئولوژي و سياسي پلاندا اؤزونو آچيقجا گؤسترمکده دير.
بو گون آذربايجان ميللي هرکاتي بوتون گوجلو طرفلري ايله ياناشي، نظري-ايدئولوژي پلاندا هرکاتين تمل داشي کيمي ميللي ايدئولوگييانين اهمميتي نين لازيمي سويييه ده درک ائديلمه مه سي، وار اولان تئک ميللي ايدئولوگيياميزين-موساواتچيليغين يئترينجه اؤيره نيلمه مه سي، آذربايجان ميللي هرکاتي نين ايدئولوژي آلتياپيسي نين مؤحکملنديريلمه ميش، يول خريته سي نين تاماملانماميش اولماسي، بونلارين اورتادان قالديريلماسي ايستيقامتينده لازيمي نظري فاليتلرين آپاريلماماسي، کئچميشده کي هرکاتلاريميزين، ديگر خالقلارين ميللي هرکاتلاري نين تجروبه لري نين اؤيره نيلمه مه سي و س. کيمي، سياسي پلاندا ايسئ، ميللي تشکيلاتلانمانين يئترلي سويييه ده اولماماسي، ميللي-سياسي کادرلارين يئترسيزليگي و س. کيمي جيدي و بير آن اؤنجه هلل ائديلمه سي گرکن پروبلئملرله اوز-اوزدير. بورادا هرکاتين گوندن-گونه گئنيش ووسعت آلماسيندان قورخويا دوشن فارس شووينيزمي نين ايدئولوژي، سياسي و حتّی فيزيکي آنلامدا باسقيلاري نين گئتديکجه آرتديغيني دا نظره آليرساق، آذربايجان ميللي هرکاتي نين نه درجه ده جيدي و طالعهمميتلي بير دؤنمجدن کئچديگي نين فرقينه وارميش اولاريق.
دوروم بئله ايکن، بو قدر جيدي پروبلئملرله اوز-اوزه ايکن آذربايجان ميللي هرکاتي اطرافيندا يئني-يئني، هم ده سوني پروبلئملرين ياراديلماسي نين ان آزيندان هرکاتيميزا هر هانسي بير يارار ساغلاماياجاغي کسيندير.
سون گونلرده سيخ-سيخ اورتايا آتيلان و گوندميميزي سوني بير شکيلده مشغول ائدن پروبلئملردن بيري ده ” گونئي آذربايجان ميللي بايراغي !!! ” مؤوزوسودور. اصلینده بو مؤوزونو گوندمه گتيرنلرين هاميسيني دا عئيني کاتئقورييادا (بؤلو) گؤسترمک دوغرو دئييلدير. ياخشي نيتلرينه هئچ شوبهه ائتمه ديگيميز، آذربايجان ميللي هرکاتينا تاماميله باغلي فعاللار اولدوقلارينا اينانديغيميز بير قروپ بو گون آذربايجانين گونئيينده جريان ائدن هرکاتين بير سيموولا احتيياجي اولدوغونو، بو سيموولون آذربايجانين بوتون پوتانسييئليني بير آرايا گتيره جگينه اينانديقلاريني ايفاده ائدير و معلوم طرحي آذربايجان فعاللاري نين موزاکيره سينه وئرير. بو قروپون اؤز تکليفلريني ” ميللي بايراق ” اولاراق دئييل، ” ميللي سيموول ” اولاراق تانيملامالاري، ائلجه ده، داها اؤنجه کي ” ميللي بايراق ” تشببوسکارلاريندان فرقلي اولاراق ديکته يولو ايله دئييل، تام کونسئنسوس يولو ايله تصديق ائلتديرمه يه چاليشمالاري تقديره لاييق بير حالدير.
آنجاق، بو ديرلي فعاللاريميزين ديقتيني بير نئجه نؤقته يه جلب ائتمگي ايسه اؤزومه بورج حساب ائديرم:
۱. بير حرکتي، اؤزلليکله ده اولوسلاراراسي آرئنادا ساده جه سيمووللار تمسيل ائده بيلمز. هر هانسي بير حرکت ايدئولوژي آلتياپيسي نين مؤحکمليگي، ايدئاللارري نين، حدفلري نين عاليليگي، پوتانسييئلي نين گئنيشليگي، پروسئسلره تاثير ايمکانلاري نين بؤيوکلوگو، رهبريتي نين گوجلولوگو، سياسي کادرلاري نين يوکسک سويييه سي و …، ائلجه ده سيمووللاري ايله بيرليکده تمسيل اولوندوقدا داها گوجلو گؤرونر. دئمک کي، هلل ائديلمه سي گرکن سيموولدان داها اؤنجه ليکلي پروبلئملره يؤنلمه ميزده يارار واردير.
۲. سيمووللار ميللي ايدئاللاري، آماللاري عکس ائتديرديگينده، ميللي وارليغيميزلا بوتونلشديگينده ميللي اولار. ميللي ايدئولوگيياني تمسيل ائدن بايراغين چيزگيلريني اَييب-بوزمکله، اونو قارالاماقلا ميللي سيموول ياراديلماز.
۳. سيمووللارين ايللا دا بايراق اولماسي گرکمز، آنجاق ميللي هرکاتا ايللا دا بايراق فورماسيندا بير سيموول گرکلي ايسه، بو سيموول-بايراغين طرحيني هانسيسا بير تئرراهين فانتازييالاريندان دئييل، قهرمانليقلارلا دولو تاريخيميزدن گؤتورمک داها منطيقلي اولمازمي؟ مثلا اولو بابک-ين بايراغي. عربين قارا رنگيندن بابک-ين قيرميزي رئنگلي بايراغي داها يئي دئييلمي؟ ( ديقت: بو بير بايراق و يا سيموول اؤنريسي دئييل، فيکريميزي تاماملاماق اوچون وئريلن بير اؤرنکدير).بای بک
۴. ديالوق اوچون بئله ساغلام بير موحيطين فورمالاشماديغي، گرگينليکلر و ضيديتلرله دولو بير دؤنمده اؤنريلن بو و يا باشقا هر هانسي بير سيموولون آذربايجان ميللي هرکاتي سيرالاريندا يئني ضيديتلر و گرگينليکلرين قايناغي اولماياجاغيندان امينسينيزمي؟
۵. آذربايجان ميللي هرکاتي نين دوامي و ايره ليله مه سي اوچون اونو ايدئولوگيياسي ايله، ستراتئژي حدفلري ايله، تاکتيکلر مجموعه سي ايله، داخيلده کي و خاريجده کي پوتانسييئلي ايله، ايجتيماعي و سياسي تشکيلاتلاري ايله و س. بوتؤو بير سيستئم حالينا گتيرمک، ترکيب حيصه لري نين بير-بيري ايله آهنگدار وحدتيني ساگلاماق گونوموزون اؤنملي ضرورتيدير. دابان-دابانا ضيد اولان وئ بير آرادا اولمالاري مومکون اولمايان اونسورلري ايسه عئيني سيستئمين ايچريسينه يئرلشديرمک سيستئمين اؤز ايچيندن چؤکوشونو ساغلاماقدان باشقا بير ايشه ياراماز. اؤرنگين، بير-بيريني اينکار ائدن ” بوتؤو آذربايجان ميلتي ” آنلاييشي ايله ” قوزئي آذربايجان ميلتي ” و ياخود ” گونئي آذربايجان ميلتي ” آنلاييسلاري نين عئيني دوشونجه سيستئمي نين ايچينده يئر آلماسي مومکون دئييلدير.
۶. من سيزلرين داها اؤنجه کي ” ميللي بايراق تشببوسکارلاري ” نين ياراتديغي اولومسوز اورتاملا باغلي قايغيلارينيزي تاماميله باشا دوشور و سايگي ايله قارشيلاييرام. آنجاق، آتالار دئميشکن، قاني قانلا يوماق اولماز. يانليشي عئيني مئتودلا دوزلتمه يه چاليشماق، نينکي يانليشي اورتادان قالديرماز، حتّی آذربايجان ميللي هرکاتيندا يانليشلار زينجيري نين اولوشماسينا زمين يارادار.
۷. و سون اولاراق، ياخشي نيتله موزاکيره يه چيخارديغينيز ” ميللي سيموول ” اؤنريسي نين آذربايجان ميللي هرکاتي نين هدفلرينه و منفعتلرينه قارشي چيخماقدان چکينمه يه ن کسيملر طرفيندن درهال ” گونئي آذربايجان ميللي بايراغي!!! ” تانيملاماسي ايله لانسه ائديلمه سي سيزلره بير شئيلر ايفاده ائديرمي؟
مسئله ني ” ميللي سيموول ” اولاراق دئييل، ” گونئي آذربايجان ميللي بايراغي ” شکلينده تانيملايان بير قروپ ايسه، اصلینده موختليف نيتلرله مؤوزويا ياناشسالار دا، بيز شرطي اولاراق، هاميسيني عئيني کاتئقورييادا اله آلير، هاميسي نين ياخشي نيتينه اينانماق ايسته ديگيميزي بري باشدان ايفاده ائديريک. آنجاق نيتين ياخشي اولماسينا اينانجيميزين ماهيتين دوغرو اولدوغو آنلامينا دا گلمه ديگي هر کسين معلومودور.
ماهيتي اينجله مه يه کئچمه دن اؤنجه بايراق چئشيدلرينه و بونلارين بير-بيري ايله اولان فرقينه اؤتريده اولسا، توخونماقدا يارار واردير. گونوموزده، اساسن اوچ بايراق چئشيدي ايله سيخ-سيخ راستلاشيريق: ۱. دؤولت بايراغي، ۲. ميللي بايراق، ۳. تئشکيلات بايراغي.
دؤولت بايراغي: دؤولتلرين حاکيميتيني، سووئرئنليگيني (حاکمیت) تمسيل ائدر. دؤولت بايراغي ميللي بايراق اولمايا دا بيلر. اؤرنگين، کوزوو اؤز موستقيلليگيني الده ائتديکدن سونرا دؤولتين سينيرلاري ايچريسينده ياشايان ديگر ائتنيک قروپلارين دا وارليغيني نظره آلاراق، پارلامئنت ميللي بايراغي دئييل، يئني بير بايراغي دؤولت بايراغي اولاراق قبول ائتدي.
ميللي بايراق: بير ميلتين ايدئاللاريني، آماللاريني تمسيل ائدر. بير بايراق، اگر آرخاسيندا ميلتين ميللي ايدئولوگيياسي، ميللي تفککور سيستئمي دورموشسا، ميللي بايراقدير. ميللي بايراق دؤولت بايراغي اولمايا دا بيلر. مثلا، سووئتلر بيرليگي دؤنمينده آذربايجان رئسپوبليکاسي نين آيريجا دؤولت بايراغي واردي، لاکين بو بايراق کسينليکله آذربايجان ميللي بايراغي دئييلدي. بو گون ايسه، ۱۹۱۸-دن بري وار اولان ميللي بايراغيميز آذربايجانين قوزئيينده هم ده موستقيل آذربايجان دؤولتي نين بايراغيدير.بای بک
تشکيلات بايراغي: موختليف ايقتيصادي، ايجتيماعي، سياسي و ب. قوروم و قورولوشلاري تمسيل ائدر.
بو قيسا موقدديمه دن سونرا، داها اؤنجه کي تشببوسکارلارا سوروب جاوابيني آلا بيلمه ديگيميز بير نئچه سوالي يئني ” گونئي آذربايجان ميللي بايراغي!!! ” تشببوسکارلارينا يؤنلتمه ميزده يارار واردير.
۱. بيلديگيميز کيمي، ” ميللي ” سؤزو ” ميلت ” کؤک سؤزوندن يارانان، ” ميلته مخصوص ” ، ” ميلته عايد ” آنلاميني ايفاده ائدن بير سؤزدور. ” گونئي آذربايجان ميللي بايراغي ” ايفاده سي ايسه، آذربايجان تورکجه سي قراماتيکاسينا گؤره ايکينجي نؤو تعييني سؤز بيرلشمه سي اولوب گونئي آذربايجان ميلتين(؟) عايد بايراق آنلامينا گلمکده دير. ظنيميزجه ايشين بورايا قدريني دوزگون بير بيچيمده چؤزه بيلديک. چؤزه بيلمه ديگيميز مقام ايسه بو يئني اورتايا چيخان ” گونئي آذربايجان ميلتي ” ايفاده سيدير. بو يئني ميلتين تانيمي ندير؟ اؤزلليکلري ندن عيبارتدير؟ اونو گونئيلي-قوزئيلي آذربايجان تورک ميلتيندن فرقلنديرن مقاملار هانسيلاردير؟
۲. ايره لي سوردويونوز بو ” گونئي آذربايجان ميلتي ” آنلاييشيني فارس شووينيزمي و روس ايمپئريياسي نين ساده جه سياسي-اينزيباتي معنادا پارچالايا بيلديگي، آنجاق ديلي ايله، مدنيتي ايله، معنوياتي ايله، آماللاري و ايدئاللاري ايله بوتؤو اولان بير ميلتي معنوي و ايدئولوژي باخيمدان پارچالاماغا، دولاييسي ايله فارسين و روسون باشلاتديغي، آنجاق تاماملايا بيلمه ديگي بير ايشي تاماملاماغا خيدمت ائدن بير آنلاييش اولاراق گؤرمورسونوزمو؟ سيزجه، بو آنلاييش، روس ايمپئريياسي و فارس شووينيزمي نين اورتاق ايراده سي قارشيسيندا قئيدسيز-شرطسيز تسليمچيليک، چاره سيزجه بئيت پسيخولوگيياسي نين تام ايفاده سي دئييلديرمي؟ آذربايجانين قوزئيي نين و گونئيي نين آيري-آيري سياسي اوتوريته لرين آلتيندا اولماسي قوزئيده ياشايانلارلا گونئيده ياشايانلارين آيري-آيري ميلتلر اولماسي آنلامينا گله بيلرمي؟ بيزجه گلمز. نئجه کي ويتنام-ليلار گلمه دي، نئجه کي آلمان-لار گلمه دي. سيزجه؟
۳. يوخاريدا قئيد ائتديگيميز کيمي، ميللي بايراق ميلتين ميللي تفککور سيستئميني عکس ائتديرر. آذربايجان ميللي ايدئولوژیسي نين سيمگه سي اولان اوچرنگلي، پارلايان آي-اولدوزلو ميللي بايراغيميزدان فرقلي بير ” گونئي آذربايجان ميللي بايراغي ” اورتايا چيخاريليرسا، آيري بير فيکير سيستئميني، آيري بير ميللي ايدئولوژیني تسيل ائدير دئمکدير. ” گونئي آذربايجان ميللي بايراغي ” نين آرخاسيندا دوران ايدئولوگييانين عصاسلاري ندن عيبارتدير؟
۴. ميللي بايراغيميزين، هم ده آذربايجان جمهوریسی نين دؤولت بايراغي اولماسي اولوسلاراراسي پلاتفورمادا هر هانسي بير سورون قايناغي دئييلدير. هوقوقون عاليليگيني هر زامان اؤن پلاندا توتان دؤولتلرين سينيرلاري ايچريسينده گونئيدن اولان سويداشلاريميزين اوچرنگلي، پارلايان آي-اولدوزلو ميللي بايراغيميز ائشليگينده کئچيرديگي سايسيز آکسييالارين هئچ بيرينده هئچ کيمسه اونلارا ” بو بير هوقوق پوزونتوسودور ” دئيه موراجيعت ائتمه ميشدير. فنلاند کيمي بير هوقوق ديولتي سينيرلاري ايچريسينده ياشايان سوئد کؤکنليلر (توپلام اهالي نين ۱۰%-ايني تشکيل ائدير.) مخصوص گونلرده سوئد دؤولت بايراغيني قالديرارلار. هله بو گونه قدر کيمسه اونلاري اولوسلاراراسي هوقوقو پوزماقدا ايتتيهام ائده رک بو هاقلاريندان ايمتيناع ائتمه يه دعوت ائتمه ميشدير. گؤره سن، اولوسلاراراسي هوقوقو اساس گتيره رک (اساسسيزدير)، گوندمه گتيرديگينيز ” گونئي آذربايجان ميللي بايراغي ” دارتيشمالاري وار اولان ميللي بايراغيميزي و اونون تمسيل ائتديگي ايدئيالاري آذربايجانين گونئيينده جريان ائدن هرکاتيميزين يادداشيندان سيلمه يه يؤنه ليک جهدلرين ترکيب حيصه سي اولا بيلرمي؟ ” گونئي آذربايجان ميللي بايراغي جانفشانليغي نين سون گونلرده م. ه. رسولزاده و اونون ايدئيالارينا قارشي داها اينتئنسيو بير شکيلده آپاريلان مقصدلي فعاليتلرله عئيني زاماندا اورتايا چيخماسي سادجه بير تسادوفدن عيبارت اولا بيلرمي؟بای بک
۵. ماکئدونيا (مقدونیه) اؤز موستقيلليگيني الده ائتديکدن سونرا ميللي بايراغيني دؤولت بايراغي اولاراق قبول ائتدي. اؤلکه سينيرلاري ايچريسينده ياشايان ماکئدون وطنداشلاري نين بو بايراقدان تاثيرلنه جگيني دوشونن يونانيستان بو مؤوزودان دويدوغو راحاتسيزليغي اولوسلاراراسي آرئنايا داشيدي. بونون نتيجه سينده بايراغيني دييشديرمزسه، موستقيلليگي نين تانينماياجاغي تهديدلرينه قدر واران باسقيلارا باخماياراق، موستقيلليگي نين تانينماماسي باهاسينا اولسا بئله، ماکئدونييا اؤز بايراغيني دييشديرمه دي. چونکي بايراق آسان ياراديلمير(بايراقلاري بايراق ياپان اوستونده کي قاندير). چونکي بايراق بيزده سانيلديغي قدر اوجوز دئييلدير. هر کس الينه بير نئچه رنگلي قلم آليب بو ميلته ميللي بايراق ياراتماغا چاليشيرسا، بايراق قاوراميميز سودان بئله اوجوزا دوشمزمي؟
۶. کوردلر آيري-آيري جوغرافييالاردا، آيري-آيري سياسي حاکيميتلر آلتيندا ياشامالارينا، ديللري نين بير-بيريني آنلاماياجاق درجه ده فرقلي اولمالارينا و س. باخماياراق، هر واسيطه دن ايستيفاده ائده رک (او جومله دن بايراقدان) اؤزلريني واحيد بير ميلت کيمي دونيايا تقديم ائتميشلر. ۱۹۲۰-اینجي ايلده بو گونکو تورکييه کوردلري ايچريسيندن چيخديغي ايديعا ائديلن بايراغي ۱۹۴۶-۱۹۴۵-دا ايران کوردلري نين قوردوغو ” مهاباد دؤولتي ” رسمي دؤولت بايراغي اولاراق قبول ائتدي. همين بايراق بو گون عراق-ين قوزئيينده ياراديلان موختار کورد دؤولتي نين بايراغي اولماقلا بيرليکده، هم ده بوتون کوردلرين ميللي بايراغي اولاراق تقديم ائديلمکده دير. کوردلرده وضعيت بئله ايکن، بيزيم سيرالاريميزدا بعضيلري نين بوتون واسيطه لردن ايستيفاده ائده رک، آذربايجانين گونئيي ايله قوزئيي آراسيندا سوني فرقليليکلر ياراتما جهدلري نه آنلاما گلير؟ بو ذهنيت کيمه خيدمت ائدير؟
يازينين بو بؤلومونده اؤزومو ده يرلي اوخوجوما توتوب اونلارا سسلنمک ايسته ييرم:
حؤرمتلي اوخوجو!
گونده ميميزي مشغول ائدن معلوم مؤوزونون تشببوسکارلاري (هم سيمگه اولاراق تکليف ايره لي سورنلر، هم ده بونو بايراق اولاراق تانيملايانلار) بيله رکدن و يا بيلميه رکدن گؤزوموزون اؤنونده جريان ائتميش جوخ ياخين تاريخيميزي تهريف ائده رک، ميللي اؤندريميز ه. ائلچي بئين آديندان ايستيفاده ائده رک تشببوس-تکليفلريني قبول ائتديرمه يه چاليشيرلار. نه دئييرلر؟ دئييرلر کي، ” ا. ائلچي بئي بوتؤو آذربايجان بيرليگي طرفيندن چاپ اولونان ” مختصر آذربايجان تاريخي ” کيتابيندا يئر آلان طرحي گؤردويونه گؤره و باب کيتابخاناسي سئريياسيندان وئريلديگينه گؤره، دئمک کي، اونو قبول ائتميشدير ” . بير قروپ ايسه داها دا ايره لي گئده رک ايديعا ائدير کي، ا. ائلچي بئي کيتابدا اولان بو طرحي آذربايجانين گونئيي اوچون بعضيلرينجه ” گونئي آذربايجان ميللي هرکاتي نين سيموولو، بعضيلرينجه ايسه ” گونئي آذربايجان ميللي بايراغي ” اولاراق تکليف ائتميشدير.
تهريفه يول وئريلمه مه سي و حاقيقتين اورتايا چيخماسي نامينه، هم بوتؤو آذربايجان بيرليگي سدري نين- ا. ائلچي بئين بيرينجي موعاويني اولاراق، هم ده ايللرله ائلچي بئيله بير يئرده ياشايان و اونون، اؤزلليکله ده گونئيله باغلي دوشونجه لري ايله چوخ ياخيندان تانيش اولما فورصتيني ياخالاميش سيراوي بير آذربايجان تورکو کيمي مؤوزو ايله ايلگيلي بير سيرا مقاملارا آيدينليق گتيرمگي اؤزومه اؤزومه بورج بيليرم:
۱.يوخاريدا آدي کئچن کيتاب، کسينليکله ب.ا.ب طرفيندن چاپ اولونماميشدير. ساده جه اولاراق، کيتابين مؤليفي ب.ا.ب سدري نين ايدئولوژي مسئله لر اوزره موعاويني عاريف رهيموغلونا (اللاه اوزون عؤمور وئرسين. ياشايير و ايسته ين موراجيعت ائديب سوروشا بيلر) موراجيعت ائده رک کيتابين بوتؤو آذربايجان بيرليگي کيتابخاناسي سئريياسيندان گئتمه سينده بير ساخينجا (مانع) اولوب اولماديغيني سوروشموشدور. عاريف بئي همين کيتابي ائلچي بئيه گؤتوره رک مؤليفين ريجاسيني اونا چاتديرميشدير. ائلچي بئي کيتابي اينجله ديکدن سونرا مؤهتواني بينديگيني، کيتابين بوتؤو آذربايجان بيرليگي کيتابخاناسي سئريياسيندان گئتمه سينده بير ساخينجا اولماديغيني ايفاده ائتميشدير. معلوم طرحده آي-اولدوزون ندن قارا رنگده اولدوغونو سوردوغوندا ايسه، عاريف بئي ” بو گون گونئي اسارتده دير. گونئي ايستيقلاليني قازانديغيندا من ده آي-اولدوزو آغارداجاغام ” دئيه مؤليفين فيکريني بئيه چاتديرميشدير. ائلچي بئي ” بو دا بير فيکيردير ” دئييب مسئله نين اوستوندن کئچميشدير. ديقت ائدرسنيز، بو ديالوقدا سيموولدان و يا بايراقدان کسينليکله صؤحبت گئتمير. ساده جه اولاراق، ائلچي بئي گونئيين ايستيقلالي آرزوسو ايله باغلي مولليفين خيال گوجونه حؤرمتله ياناشاراق، ” بو دا بير فيکيردير ” دئميشدير.بای بک
۲. کيتابين کيمين طرفيندن سپونسورلوق ائديلديگي، کيملر طرفيندن چاپ و نشر اولوندوغو، ائلجه ده مؤليفي نين گئرچک کيمليگي بيزه تاماميله معلومدور. لاکين سياسي ائتيکا گرگي، اؤزلري ايستمه ديگي مودتجه بو بيزده ساخلي قالاجاقدير.
۳. يوخاريدا نؤقته سينه، وئرگولونه قدر وئرديگيميز ديالوقدا، ائلجه ده آدي چکيلن کيتابدا بايراق و يا سيموول دئيه تک بير سؤزون بئله کئچمه ديگي حالدا، ساده جه ب.ا.ب کيتابخاناسي سئريياسيندان گئدن بير کيتابدا يئر آلديغينا گؤره هر هانسي بير رسم اثري و يا طرحين ائلچي بئيين گونئيه بايراق و يا سيموول اؤنريسي کيمي تقديم ائديلمه سيني تشببوسون ايدئيا باباسي و يا ايدئيا بابالاري نين منطيق ضعيفليگي ايله ايضاح ائتمک ساده لؤوهلوک اولار دئيه دوشونوروک.
۴. ” ديل تفککورون يانسيماسيدير. بيز ” گونئي آذربايجان ” و يا ” قوزئي آذربايجان ” دئديگيميزده تفککوروموزده آذربايجانين پارچالانميشليغيني قبول ائتميش، روس ايمپئريياسي و فارس شووينيزمي نين ايراده سينه بويون اَيميش کيمي گؤرونوروک ” دئيه بيزلري بو سؤزلرين يئرينه ” آذربايجانين گونئيي ” ، ” آذربايجانين قوزئيي ” کيمي ايفاده لري ايشلتمه يه چاغيران ائلچيبي آذربايجانين گونئيي اوچون ميللي بايراغيميزدان فرقلي بير ” ميللي بايراق ” تکليف ائدرمي؟ آيري-آيري ميلتلرين آيري-آيري ميللي بايراقلاري اولا بيله جگيني، عئيني ميلتين ايسه سادجه بير ميللي بايراغي اولا بيله جگيني بيزلره اؤيرتديگي حالدا، آذربايجانين گونئيينه آيريجا بير ميللي بايراق تکليف ائتمه سي ائلچي بئيين اؤزو-اؤزونو اينکار ائتمه سي آنلامينا گلمزمي؟ ائلچي بئيين اؤزو اؤزونو اينکار ائدن بير ليدئر اولدوغونا اينانيرسينيزمي؟
۵. ائلچي بئي ايرسيني آراشديريب اؤيرننلر بيليرلر کي، ائلچي بئيين بايراق مؤوزوسو ايله باغلي تفسيره احتيياجي اولمايان کونکرئت فيکيرلري واردير.
بونلاردان بعضيلري:
*…آزربايجانين گونئيينده يئني بايراق يارانماياجاق. اورايا بو بايراق گئده جک. (ائلچي دوشونجه لري، صحيفه : ۱۱۵)
* من دئميشم کي، بو بايراق تبريزده دالغالاناجاق. اونو مرندلي ده، تبريزلي ده، گنجه لي ده، برده لي ده سانجا بيلر. اونو سانجان آدامي من باغريما باساجاغام و او منيم قارداشيم اولاجاق. آنجاق، اونو من سانجسام، بو منيم بؤيوک خوشبختليگيمدير، ان بؤيوک شرفيمدير. (بوتؤو آذربايجان يولوندا، صحيفه : ۲۸۰)
* من امينم کي، ياخين واختلاردا اوچرنگلي بايراغيميز آذربايجانين گونئيينده ده دالغالاناجاق. آذربايجانين گونئيينده، اصلینده اونو گيزلي اولسا، داشيييرلار. (بوتؤو آذربايجان يولوندا، صحيفه : ۳۲۷)
سون سؤز:
گلين ميلتيميزين قان باهاسينا، جان باهاسينا الده ائتديگي ديرلري بيرليکده قوروياق. بو ميلتين آييني، اولدوزونو قارالتمايين، ايشيق-ايدئيا قايناقلاريني قوروتماغا چاليشمايين. جيزدير، يانارسينيز!
سايگيلاريملا؛
چينگيز گؤيتورک
۱۳/۰۷/۲۰۰۸
٫بير ميللتين سسي
پایلاش | پرینت
بورا باغلي يازيلار:
http://www.baybak.com
بای بک سایتیندان پرینت اولوب
http://www.11008.baybak.com/il_11008_say_477.azr
یازینین اینترنت آدرسی
گوروش کاپانیبدی