يئکه داش، آتماماغ علامتيدير - تبريزلي باي بک
بای بک، آذربايجان | باشگؤن, ۲۴-ي قوراپيشيرن , ۱۱۰۰۸ اینجی ایل, چولا ۰۴:۴۴ [گ.ؤ] | یازی و قوشوق
 |
. | ايللردير کي گونئي هرکاتيندا بايراغ مسئله سي يارانيب. بايراغين اولماسي آرتيق بير گرک گؤرونور و بو گره کي قارشيلاماغ اوچون آغييلي ايش گؤرونمه ليدير. ايللردير کيمسه بو اؤنملي قونويا يئترينجه گوج و زامان آييرماييب، و حتّی اوتوروب سيميشقا (گونه باخان توخومو) چيتدداييردي! بير اورتاغ سيمگه اؤنريسي اورتاليغا آتيلاندا، سيميشقالاري سانکي زهر اولوب کيمين، ايللردير بير کنارا آتديقلاري قلمي اللرينه آلیب و موصيبت نامه يازيرلار کي، آماندير ميلتي پارچالامايين! کي، آماندير ميلتين آي اولدوزون قارالامايين! ايندي بونلارا سوروشماغ لازيمدير کي، آ قارداش، آ باجي، ايللردير بايراغين سورون ياراتديغين گؤروبده سسسيز قاليبسيز، ندن بيريلري بيرليک آماجييلا اؤنري وئرنده هامينيزين اورگي سانجيلانير؟ يوخ، هئچ اونو بوش وئريبده سوروشاق کي: ياخجي، سيز ديین اولسون، گونئي هرکاتیندا يارانان بايراغ ايسته کي و ساختا بايراغلار سورونونا نه درمانينيز وار؟ |
آتالار دئميشکن: “يئکه داش، آتماماغ علامتيدير”. بو سؤزون آنلامي بودور کي او شخصلر کي اؤز گوجلريندن خاريج، فيزيکي يا دوشونجه گوجوندن خاريج بير سؤز دئييرلر، دئمک اؤزلريده او ايشين ياپيلماسينا اينانميرلار!
دفعه لرجه بو سؤزو تيکرار ائتميشم کي گونئي ايله قوزئي بيرليگي بير فاکت اولسادا، اينديليک اونلارا عئيني يؤندن و عئيني باخيمدان ياناشماغ سهودير. ندن؟ چونکي قوزئيده اولوسلاراراسي رسمي تانينميش بير موستقيل دئولت وار، او دئولتين بايراغي، اؤزونه عايد سيياستي، گليرلري، چيخارلاري، پلانلاري و تانيشلاري واردير. آما، گونئيده هله ليک اؤزگورلوک ساواشي باشلاماقدادير! ائله بو باخيمداندير کي بيزلر اينديدن بو فرقي آنلاييب و اونا گؤره داورانماليييق.
بير سيرا سويداشلارين آغلي تيکانيب، گؤزلري قاراليب و قولاغلاري دويماز اولوب. اونلارين ديلينده ايسه بير سؤز وار: “بيرليگيميزه قارشي اولانلار وار، اونلار بيزيم دوشمانيميزديرلار!”. آما، بو دوغرو ميلتچيليک دئيل، بو دوغرو تورکچولوک دئيل و سؤزون قيسساسي، بو نرومال بير داورانيش دئيل.
دونيا شرطلرينه باخاندا، بير چوخلو اولکه پارچالانيب، بللي دؤنملرده بيرلشيب و گئنه داغيليب! اونلاردان ايکي اؤرنک، قوزئي و گونئي کره و ياخين گئچميشده بيرلشن آلمان-لاردان سؤز ائتمک اولور.
کره-لرين هر بيري نين بايراغي وار. آلمانلاريندا ايکي بايراغلاري واريدي! باخاغ گؤرک آيا بايراغين ايکي اولماسي، حتّی دئولتين ايکي اولماسي بوتؤو آلمانين يارانماسينا مانع اولدومو؟ بيليريک کي اولمادي! ايندي دونيادا بير تک آلمان تانينماقدادير، گئچميشده کي آيريليغي، بايراغلاري و حتّی ايکي تايدا گئدن موجاديله لري کيمسه خاطيرلامير بيله!
کره-لر هله ده آيري، و حتّی بيربيرينه دوشمانديرلار! آيا بئله دوشونورسوز کي اوردا بيرلشمک اوچون ساواش وئرن يوخمودور؟ البتته کي وار. اونلارين دئولتچيليکلري ضيد اولسادا، ميللي بيرليگين يوخ اولماديغينا هامي اعتيراف ائدير. کيم بيلير، بلکي ياخينلاردا بو ايکي بؤلونموش ميلت يئنيدن بيرلشه جک؟
بيزيم آذربايجانا گلينجه، ماراخلي عادتلر، اينانيلماز تپکيلر و اوزمان اولمايان پوليتيکاجيلار اورتاليقدا گزيرلر! بير ميلت گرک بير دئولت و بير بايراغلا تانينسين! بوندان خاريج اولانلارسا ميللي خايينديلر و آخماديلار! او ساده فاناتيکلرين اگر بير آزجاسينا اللرينده ايمکانلاري اولسايدي، “بيرليک سؤزده اولماز” دئيينلري همن دارا چکرلر!
گلين ساده فاکتلاريميزي سيرالاياق:
- تورک ميلتينه عايد اولان آذربايجانليلار پارچالانيب
- آذربايجانليلارين فرقلي دوشونجه لري وار
- آذربايجانليلار فرقلي سؤمورگه چي گوجلره قوربان اولوبلار
- آذربايجانليلارين ياشام و دوشونجه طرزي ده ييشيب
- آذربايجانليلارين باشيندا بير سيرا دئولت آدامي و يا ميللي فعال دايانيب
- دئولت آداملاري ايله ميللي فعاللار بيربيرينه قارشيديلار
- کيمين دئولتي وار کيمين يوخ مسئله سي اؤنملي قونودور
ايندي بونلرين اينجله مه سينه گلک:
تورک ميلتينه عيد اولان آذربايجانليلار پارچالانيب. اصلینده، “تورک دونياسي” اؤزو پارچالانميش دورومدادير. بير چوخلو تورک طايفاسيندان ساده جه آد قاليبدير، بير سيراسي کيمليگين اونوتوب و بير سيراسيدا باشقا ميلتلرين دئولتچيليگينده اسير دوشوب. بو دورومدان چيخماغ اوچون، ايللا کي “تورک دونياسي”ن يئنيدن قورماغ آماجييلا ساواشا گيرمه لييک؟
ائله فاناتيکلر وارديرلار کي “تورک دونياسي” دئييب و باشقا سؤز دئمييرلر! بونلارين اينانجي سايقيلي اولسادا، ايستکلري يئرسيزدير. “تورک دونياسي”ن قورماغ اوچون، اؤنجه اؤزگور تورک ميلتي لازيم اولاجاقدير. تورک ميلتينه عيد اولان طايفالارسا، اؤزگورلوکلرينه قاووشماليديلار. بوردادير کي آذربايجان مسئله سي آچيقلانمالي شکيله دوشور. ياني کي، آذربايجانين پارچالانميش بؤلوملرينه اؤزگورلوک قازانمادان، اونلارين بيرلشمه سيني و داها سونرا “تورک دونياسي”نا قاتيلمالاريني نئجه ايضاح ائتمک اولور؟
بوردا يئکه داشلارين بيرين آتيب و ايکينجيسينه گئچيريک!
آذربايجانا واحيد بير پروبلئم اولاراق باخماغ، آنجاق او پروبلمين ايکي طرفلي اولدوغونا ديقت ائتمک لازيمدير. بيزيم ايکي طرفلي پروسئس اوچون حاضيرلانميش پلانلاريميز اولماليدير. چوخلاري نين، اؤزلليکله ده خاريجده ياشايان سويداشلارين دوشونجه سينه گؤره، بو گون گونئي اؤزگور اولور و صاباح قوزئي ايله بيرله شير! بو گؤزل و دويقوسال بير آرزو اولسادا، رئال دونيادا اويقولانماسي بير او قدرده اولومسوزدور.
قوزئي آذربايجاندا بير دئولت وار. اولور، دئسينلر کي او دئولت بيزيم بوتؤو آذربايجان دئولتچيليگيندن قالان بير پارچادير، دئسينلر کي او دئولت بيز آذربايجانليلارين هاقلارين قوروياجاق و بيزيم تهلوکه سيزليگيميزي ساغلاياجاق! آيا بو دئييشلر دوغرومودورلار؟ البتته کي يوخ. بو سؤزلر قولاغا خوش گلسه لرده، اصلینده اينامسيزليق و قورخودان تؤرنن سؤزلرديرلر.
گرچکلره گلينجه، قوزئيده اولان دئولت هئچده گونئی دردينه يانمايير، يانمازدا! دئولتچيليگي قورانلاردان چالانلار، او دئولتچيليگين ميللي کيمليگين سيلنلر و او دئولتچيليگي گئنيش تيجارته چئويرنلرين اينانجي بام باشقادير! او دئولت باشيندا دورانلار، گونئي هرکاتينا پوتانسيئل بير تهلوکه اولاراق باخيرلار! دئمه يين ائله دئيل، بيليرسيز کي ائله دير.
قوزئيده اولان هاکيمييتين ايلک قورخوسو گونئي هرکاتي نين ميللي کيمليگه صاحيب اولماسينداندير. گونئيده ميللي دوشونجه دن باشقا هئچ بير دوشونجه نين اوستونلوگو يوخدور. ميللي دوشونجه لي بير پارچا ايله بيرلشمک نئجه قوزئيده کي توتاليتئر دئولتي سئوينديره بيلري؟ سيزجه اؤز اؤزوموزو تاولاميريک؟
ايلک باخيشدا گؤرمک اولور کي قوزئي هاکمييتي صاحيب اولدوغو مقام و زنگين سوفرادان اوزاق دورماماغ اوچون، حتّی قوزئيده ياشايان سويداشلاري قتل عام ائدير! سيزجه بو حاکيمييت قوزئي اوچون بير گؤز ياشي تؤکر مي؟ بو گونه قدر، قوزئي موستقيل اولدوغوندان سونرا، اوردا اولان هاکميمييتدن ايينه اوجو يارديم گؤرونوب مو دور؟ ائلچي بئي دؤنمينده اولان معنوي دستکدن سوواي، گونئي هرکاتينا گرچک يارديم اولوبمودور؟ سؤز ميللي کيمليک و تاريخدن خبرلري اولان سويداشلاردان گئتمير، سؤز حاکيمييتده اولان و سؤز صاحيبي اولان ضياليلاردان گئدير!
هله قوياخ کي گونئي موستقيل اولدو و ائله بو گون بيرله شيريک! آيا ايکي تايدا ياشايان سويداشلار بو بيرليگه راضيميديرلار؟ ايلک سورو: باشکند هارا اولماليدير؟ ايللردير دئولت اولاراق باشکندلري اولان قوزئي دئولتچيليگي، نئجه ياناشماليدير؟ گونئيده اولان تاريخي باشکنديميزي! نئجه برپا ائتمک مومکون اولار؟ ايقتيصاد، گئچميشده اولان قازانجلار، دييشيک کولتورل عادتلر و الده اولونان وارليقلار نئجه يئنيدن ايکي تايدا تعريف اولونا بيلرلر؟ يازيليم، ياشام و گله جک نئجه بيرلشه جک؟ (البته من آنکارا و استانبول نسخه سین باش کند مسئله سینه یازمیشام!)
بو ساده سورونلاري چؤزمه دن، کيميسه يئريندن دوروب و بوتؤو آذربايجان سؤيلميندن دانيشاندا، آتالارين دئديگي سؤز عاغيلا گلير کي: “يئکه داش، آتماماغ علامتيدير”. من هئچده بيرليگه قارشي دئيلم، ترسينه، تام بيرليک ياراتماغ اوچون گئجه گوندوز دوشونورم. نه يه دوشونورم؟ بوش بئيينله، بوش ال ایله و گوجلو دوشمانلار قارشيسيندا نه ائتمک اولور، اونا دوشونورم! ميللي هرکات آدلانديراندا، ميللي بيرليکدن دانيشاندا، ميللي گله جکدن دانيشاندا کيمسه نين قيسينتيسي يوخدور. موفته سؤزدور، نه قدر ايسته سه لر دانيشيب و يازا بيلرلر! آما گرچک بودور کي، گونئيده و قوزئيده ياشايان آذربايجانليلار نه قدر بو قونودان خبرداردیلار؟
منيم گؤردوگوم، ۱۰-۵ نفر بو تايدان، ۱۰-۵ نفرسه او تايدان اوتوروبلار، هردن بير پارتييا ياراديرلار، هردن بير کيتاب آرخالارينا قويوب دانيشيغ آپاريرلار، هردنده گئديب بير اروپالي ايکينجي سينيف دئپوتاتلا دانيشيرلار، اونودا هله تاپسالار! بو سؤزله سياسي فعاللاريميزين هاقلارين قوروماغدا گئجه گوندوز چاليشان فعاللاريميزين امکلرينه کؤلگه سالماغ ايسته ميرم. اونلارين ياپديغي ايشلرين فايداسي او دئديگيم ليدئرلرين عؤمورلرينده ياپديقلاريندان بيله داها چوخدور. سؤزوم او بوش بئيين، بوش ال ايله يئکه داش توتانلارادير!
بونلاريدا بير کنارا بوراخيب، گونئيده گونئي اؤزگورلوک هرکاتي و قوزئيده قوزئي دئموکراتيکلشمک قونوسونا گئچيرم.
ايلک باشدان دئييم کي قوزئيده اولان حاکيمييت ميللي دوشونجه لي بير دئولتچيليک اولماديغي سؤره جه، اوردا دئموکراتيکلشمک ايمکاني اولماياجاق. اينديکي دئولتي بير اويونجاغ کيمين گؤروب و اونو ميللي دوشمان اولاراق ديرلنديريب هله ليک بير کنارا بوراخيرام. آخي او هانچي هوکومت اولار کي ميلتين ميللي وارليغين ساتيب و ميلتي اؤلددورمک اوچون قوللانسين؟ او هانچي دئولتدير کي اؤز اولکه سينده وطنداشلارين اؤزگورلوگو و تهلوکه سيزليگيني قوروماغدان، اروپانين ائنئرژيسي نين تهلوکه سيزليگي نين ايت کيمي قوروماسينا فخر ائتسين؟ او …
يئکه داشلارين بيرينده آتيب و اينديکي گرچکلرين بيرينه گلک!
گونئي اؤزگور اولماليدير. بونا آرتيق بير چوخوموز اينانيريق. آما، اؤزگورلوک نئجه الده اولونا بيلير؟
ميللي دوشونجه نين ياييلماسي نين قارشيسي ندن آلينير؟ چونکو اؤزگوروگون بير تک يولو وار و اودا ميللي دوشونجه نين ميلتده اويانماسيدير. سيزجه گونئيده سويداشلارين يوزده نئچه سي ميللي دوشونجه يه صاحيبديرلر؟
دوشونجه نين يايينلاماغيندا نه لر ائتميشيک؟ اصلینه باخاندا هئچ نه ائتمه ميشيک! ائله بونا گؤره دير کي سون گونلرده ده توخوندوغوم ميللي فعاللاردا دوشونجه بيرليگي نين يارانماسينا گلمه لي اولورام.
هر زامان بونو دئييرم کي ميللي دوشونجه ساده جه ميللي دوشونجه اولماليدير. ميللي دوشونجه نين چئشيتلي اولماسي ساده جه گونئي آزربايجان هرکاتيندا اورتايا چيخيب! ميلت بير اولورسا، دئمک ميللي دوشونجه ده بير اولماليدير! ياني کي، ميللي دوشونجه اؤزگور اولماغ ايسته ييرسه، هر بير اينسان اونا باش اَيمه ليدير. آما مع السف گؤرونور کي گونئي آذربايجان ميللي هرکاتيندا، ميللي دوشونجه آدينا مينلرجه شخصي دوشونجه ايش باشيندادير!
گولونج اولان نوکتا بورادير کي هئچ بيريده او بيريسيني قبول ائتمير، و مسئله ني چؤزمک اوچون موخاليفي ايله دانيشمير بيله! ائله بوردادير کي دئديگيم بيرليک دوشونجه سي نين يارانماسي بير داها اؤنمين بللي ائدير.
بيرليک ياراتماغ اوچون اؤنجه اؤز آغليميزا سوروشماليييق کي: بيز نه اوچون ساواشيريق؟ کيمينله ساواشيريق؟ نئجه ساواشيريق؟ بو 3 سورونون جاوابين ميللي دوشونجه يه سؤيکنه رک آلديقدان سونرا، بيرليک اؤز اؤزونه ياراناجاقدير! سيزجه، ميللي فعال تانيديغيميز شخصلر، اؤز اينانجلاريندان مودافعه ائديب و يانليش بيلديکلري دوشونجه لري تانيتماغ اوچون، او يوکسک مقاملاريندان آشاغييا يئنيب و ميلتيميزله دانيشماغا حاضير مي ديلار؟ منجه يوخ، چونکو بونلارين دئمک اوچون سؤزلري يوخدور! بير بالاجا تنقيد ايله يئنيدن اؤز مقاملارينا قاپاناجاق و اورتاليقدان چيخاجاقلار!
ايللردير کي گونئي هرکاتيندا بايراغ مسئله سي يارانيب. بايراغين اولماسي آرتيق بير گرک گؤرونور و بو گره کي قارشيلاماغ اوچون آغييلي ايش گؤرونمه ليدير. ايللردير کيمسه بو اؤنملي قونويا يئترينجه گوج و زامان آييرماييب، و حتّی اوتوروب سيميشقا (گونه باخان توخومو) چيتدداييردي! بير اورتاغ سيمگه اؤنريسي اورتاليغا آتيلاندا، سيميشقالاري سانکي زهر اولوب کيمين، ايللردير بير کنارا آتديقلاري قلمي اللرينه آلیب و موصيبت نامه يازيرلار کي، آماندير ميلتي پارچالامايين! کي، آماندير ميلتين آي اولدوزون قارالامايين! ايندي بونلارا سوروشماغ لازيمدير کي، آ قارداش، آ باجي، ايللردير بايراغين سورون ياراتديغين گؤروبده سسسيز قاليبسيز، ندن بيريلري بيرليک آماجييلا اؤنري وئرنده هامينيزين اورگي سانجيلانير؟ يوخ، هئچ اونو بوش وئريبده سوروشاق کي: ياخجي، سيز ديین اولسون، گونئي هرکاتیندا يارانان بايراغ ايسته کي و ساختا بايراغلار سورونونا نه درمانينيز وار؟
بيري دئيير ۱۹۱۸-ده بايراغيميز يارانيب، ائله او هامينيدير! بيري دئيير او بايراغ قوزئي دئولتينيندير و بيزيم قالديرماميز سياسي باخيمدان سوچدور! بيري دئيير ائلچي بئي گونئي اوچون بايراغ طرحي وئريب! او بيري دئيير ائلچي بئي منيم يانيمدا دئييب کي گونئيه بايراغ لازيم اولورسا اينديکي ميللي بايراغيميز گئده جک! هره بير سؤز دئيير آنجاق گونئي هرکاتيندا يارانان سورونلارين چؤزولمه سي اوچون بير آددير بيله آتيلمير!
اؤنري وئريلدي، بير چوخلو سويداشدا اؤز گؤروشون آچيقلادي، آما، گئنه هامي سسسيز اوتيرمالي مي اولاجاق؟ ياني، سورون بللي اولوبدا، چؤزوم اوچون کيمسه آدديم آتماياجاق مي؟ دوروم اونو گؤسترير کي هميشه کي کيمين اوتوروب سورونلارين بؤيومه سين و چؤزولمز حاله گلمه سين گؤزله يه جه ييک!
آي اؤرکلري قارا گؤرؤنده داريخان ميللي فعاللار، آي سياسي پارتييالارين آللاهلاري، آي تک باشينا تورک بيرليگي يارادانلار، آي يئکه داش گؤتورنلر، بير دفعه ده اولسا بيله، گلين بو داشلاري اته کينيزدن تؤکون!
من بئله اينانيرام کي گونئي هرکاتي قوزئيدن معنوي يارديم آلاراق، پروسئسلرين بيلديريلري و اتکيلري ايکي تايدا ياييلاراق، هر ايکي طرف اؤز يئرينده و اؤز آماجينا دوغرو چاليشماليدير. ياني کي، قوزئيده کي سويداشلار گونئيده کي سويداشلاريندان خبردار اولاراق، قوزئيين اينکيشافينا چاليشمالي، و، گونئيده کی سويداشلار قوزئيده کي سويداشلارينا سؤيکنه رک اؤزگورلوک ساواشينا هيز و گوج وئرمه ليديلر.
اولسون کي ياخين گله جکده، مثلن چوخلاري نين اينانديغي، يا قازانديغي يول ايله، آمريکا يا اسرائيلين سالديريسي نتيجه سينده، گونئي اؤزگور اولدو! پخيللرين گؤزو چيخسين اگر بو قولايليقدا اؤزگورلوک ايسته ميرلر! ياخجي، ائله او دقيقه قوزئي ايله بيرلشمک ايمکاني اولاجاق مي؟ طبیعيدير کي اولماياجاق. دئمک کي، ايندي سيمبولدان دانيشيريقسا، گله جگين گئچيجي بايراغيندان دانيشيريق. بير هرکاتين سيمبولونا اينديدن قرار وئره بيلميريکسه، دئمک آمريکا يا اسرائيل ۱۰۰ مين دفعه ده سالديرسالار، گونئي آذربايجان ايران آدلانان اولکه نين ترکيب حيصه سيندن چيخا بيلميه جک! ندن؟ چونکو ميللي فعال آدلانديرديغيميز شخصلر، اؤزلرينه اينانمادان يئکه داش اللرينه آليبلار. خاريجده ايسدي يئرده اوتوروب، ياشاديقلاري اولکه نين وئرگيسيندن آليب يئييب، گيزلي چاليشيب و پول توپلاييب، آنجاق قوزئي گونئي دئييب باشقالارين چاشديريب و فيرساتلاري يانديريرلار!
ميللي سيمگه اولاراق سونولان سيمبول ائلچي بئی-ين تام ايسته ديگي يا تام قارشي اولدوغو بير سيمبول اولسادا، ۲۰ ايل يا ۲ گون بوندان اؤنجه چيزيلسه ده، ب.ا.ب يا آ.م.د.ت طرفيندن يارانسادا، قارا اولسادا، گوزل يا چيرکين اولسادا، گونوموزده ان دئموکراتيک بير اولايدير. بو دئموکراتيک اولايدان يارارلانماغسا، ميللي فعاللارا قاليب. کيمسه نين سسين جبر ايله آلان يوخدور، آنجاق، سس وئرنلر و يا موخاليف اولانلار گرکدير کي بير آلتئرناتيو تانيتسينلار. يوخسا من اونو ايسته ميرم و يئرينه ده بير شئي قويمورام دئييلسه، گئنه ده گوني هرکاتي باشسيز قالاجاق. خرداد قالخيشيندا بير بايراغ آلتينا توپلانامايان گونئيليلر، گله جک خرداد قالخيشلاريندادا گوجسوز و داياناجاقسيز قالاجاقلار.
اوغوز خان دئميشکن: “اي تورک، تيتره، اؤزونه دؤن! سن اؤزونه دؤننده بؤيوک اولورسان!”
تبريزلي باي بک
۱۳/۰۷/۲۰۰۸
کرويدون
٫بير ميللتين سسي
پایلاش | پرینت
بورا باغلي يازيلار:
- وقتي شوونيستها قات ميزنند! اشتباه فجيع فارسهاي دو آتشه در خصوص دو تشکل آذربايجاني و تلاش آنها براي سؤ استفاده - تبريزلي باي بک
- شرفدن دانيشانلار، شرفسيزليکدن اوزاق دورارلار! تحميل ائديلن بايراغ بيزي پارچالاياجاق مي؟ - تبريزلي باي بک
- چگونه ميتوان مانع پشيمان شدن مردم از شروع و دفاع از مبارزات ملي شد؟ - تبريزلي باي بک
- يا قارداشيم اول، يا قارشيمدا! - تبريزلي باي بک
- سورولاردان قاچماياغ! بلليدير کي گونئي هرکاتي اوچون بايراغ گرکليدير- تبريزلي باي بک
- آذربايجان و اونا عايد اولان بؤلگه لرده چئشيتلي سورونلارين اولوشومو - تبريزلي باي بک
- عراق-دا گئدن پروسئسلرده تورکمنلره تيکيلن بؤرک! - تبريزلي باي بک
- عدم احساس مسئوليت و دروغگوئي در حال تبديل “سمبل پيشنهادي” به “بايراغ تحميلي” است - تبريزلي باي بک
- مشروطه يا کشمکش دموکراسي بين تورکها و پادشاهشان چه ربطي به فارسها دارد؟ - تبريزلي باي بک
- “هزاره ها” يا تورکهاي فراموش شده خون میگریند، دریابیمشان! – تبريزلي باي بک
http://www.baybak.com
بای بک سایتیندان پرینت اولوب
http://www.11008.baybak.com/il_11008_say_470.azr
یازینین اینترنت آدرسی
گوروش کاپانیبدی