ياشاسين آذربايجان - Long live Azerbaijan

.

سورقولاماني جاوابلاييبلارين ۲۱.۳۲٪ یؤزده سی ۳۱-۳۵ ياشينادديلار. ياني هرکاتيميزين گئنج اولدوغو اينتئرنئتده بللي اولور. ۲۰-۲۵ ياشي اولانلار ايسه ۱۵.۴۴٪ فايز تشکيل ائديبلر. يانيتلايانلارين چوخو اوغلان اولوب. بير سيراسي بو سورويا جاواب وئرمکدن چکينيبلر. اگر اونون ياريسين قيز و ياريسين اوغلان بيلنده، ۵۹٪ اوغلان و ۴۱٪ قيز اينتئرنئته گليبلر. ياني اوغلانلارين اينتئرنئتي قوللانماغ ايمکانلاري داها چوخدور. آذربايجاندا دوغولانلارين ساييسي ۱۱۸ نفر اولوب، آنجاق آذربايجاندا ياشايانلار ۵۴ نفردن اولوشوبلار. ياني، سورونلار ندنيله،

---

---

باي بک سيته سي اينترنت ساهه سينده چاليشان آذربايجان اوچون يارانميش، آذربايجانا دوشونن و يولوندان چاشمايان بير دؤشرگه دير.

طبيعیدير کي بير ساهه ده چاليشانلار اوچون بير چوخلو سورونلار يارانار. آنجاق، آذربايجان دونيانين آزاراق مودئرن اولکه لريندندير کي اينتئرنئتده يئترينجه اينکيشاف ائتمييب. اينکيشاف ائتمه مگين ندني ايسه، ايکييه بؤلونموش بير اولکه نين عاصيميلعاصييايا معروض قالماسيدير. باشقا ندنيسه، يئترسيز ايستک، يارارسيز چاليشانلار و ساوادسيز يئتکيليلر آدلانديرماغ اولار.

يئترسيز ايستک نه دئمکدير؟
آذربايجانلي اولاراق اينتئرنئتده گزنده، روس و فارس دؤشرگه لرينده ساييسيز حسابسيز آذربايجانلييا راسلاماغ اولور. آنجاق، بونلاري تورک دؤشرگه لرينده تاپماغ مومکون دييل!

يئترسيز چاليشانلار نه دئمکدير؟
اينتئرنئت آرتيق بير بيليم اولاراق آلينير. بو بيليمي گئنيش چاپدا يايماق چوخ اؤنمليدير. اينتئرنئت ايکينجي بير دونيا اولاراق آدلانير. بو دونيادا سؤز حاقيميزين اولماسي اوچون، گئنيش چاليشماليييق. هله کي بارماغ ساييس چاليشان وار، اونلاريندا چلسف ميللي هيسسلري آزدير. بيز يا بيزه بنزر اوزمان اولمايانلارين چاباسي ايسه چوخ آز اتکيلي اولماقدادير. ايران آدلانان اولکه ده سيته ميزين فيلتئر اولماسيسا (۳ ايلدن آرتيقدير کي باي بک ايراندا فيلتئردير) ايشلريميزين داها آز اتکيلي اولماسينا ندن اولور.

ساوادسيز يئتکيليلر کيملرديلر؟
او دانيشانلار کي کامپوتئرين نه اولدوغون بيلمييب، آنجاق ميللي هرکاتا اينتئرنئت امنييتيندن دانيشيب و اونلاري قورخودانلارديلار. ساوادسيزلار اونلارديلار کي ميللي هرکاتا يارانان آراجلاري دستکله مک يئرينه، اونلاري تخريب ائديب و اونلاردان بير يالانجيل قورخو ياراديرلار. تبيکي بيزيم دوشمانلار ايستييرلر کي بيزيم هرکاتيميزا ضربه يئنديرسينلر. بو نورمال بير اولايدير، آما، ندن بيز اونلارا ضربه يئنديرمک يئرينه، اؤز آراجلاريميزي داغيتاغ؟

باي بک ۵ ايل (۴ ايل دوزنلي) فعاليت گؤسترير. بو ايللر ايچينده، اينتئرنئت ساهه سينده بير چوخلو ايلکه ايمضا آتيب. باي بک هر زامان آچؤق اولاراق هر تور بيلگي و يارديم وئرمک اوچون حاضير اولدوغون بيلديريب. بير چوخلو ايمکان ياراديب، بير چوخلو آذربايجانلي فاللا يارديمجي اولوب و ايچريده بير سيرا ايشلملر ياپيب. بو اولايلارا شاهيد، سيته نين فيلتئر اولماسينا باخماياراق، سيته يه اولونان تخريبلره راغمن، باي بک هله ده اؤز ميللي سيياستيله يولونا دوام ائتمکده دير.

سورقولاما ايدئاسي هاردان چيخدي؟

يوخاريدا آچيقلانان سورونلار و يئترسيزليکلري گؤزده آلاراق، ميللي هرکاتا ماراغ ياراتماغ و اينتئرنئتده گزن ميللي دوشونجه يه صاحيب اولان و موخته ليف دوشونجه لر داشييان سويداشلارين گؤروشون توپلاماغ اؤنملي بير ايشدير.

بو ايشه باشلامادان اؤنجه، گئچميشده بيزه قارشي تخريبلري گؤزده آلاراق، ۱۵ گونلوک بير سورقولاما و توپلام ۸۰ جاواب آلماغ آماجييلا سورقولاماني ياراتديق. سورولارين سئچيلمه سي چوخ اؤنم داشيييردي. اونا گؤره، سورولارين بيزه يارارلي، آما، دوشمنه يارارسز اولدوقلارينا ديقت ائتديک. سورولارين هئچبيري اؤزل دييل، شخصي بيلگيلر توپلامير و عومومي سورونلارا توخونور.

بير چوخلو سويداش بيزه يازاراق سورقولامادا قارابغ يا کورد سورونونا توخوناراق اونلارين يئري نين بوش اولدوغون وورقولاديلار. اونلارا بيلديرديک کي اينتئرنئتده، و حتّی رئال ياشامدا سويداشلاريميز بو سورونلارلا تانيش دييللر. اونا گؤره، او سورولارا وئريلن جاواب داها چوخ گرچکدن اوزاق اولاجاقدير.

بير داها اؤز اينانجيميزي دئمک بلکي يارارلي اولور. ميللي هرکات آدلانان يولدا اولانلارين بير چوخو اينتئرنئته ال تاپا بيليرلر. بونا باخيب و يوخاريدا آچيقلانان فاکتا باخاراق، يني آذربايجانليلارين اينتئرنئتده اينکيشاف ائتمه مه سينه باخاراق، دئمک ميللي هرکات آدلانديرديغيميز، اونا گؤره داورانديغيميز و اوندان گؤزله ديکلريميز يالنيز اينتئرنئتده مهدود اولماماليدير. ميللي هرکاتيميز اينتئرنئتده يئر آلماييبدير، اينتئرنئت سادجه بير آراجدير.

ميللي دوشونجه ني ياراتماغ اوچون، ايکي سيته يا ۱۰ وبلاگ-لا ايش ياپماغ اولماز. گونده ۱ مقاله يازيب يا ۲ بيانات چيخاريب و يا ۳ شوعار وئرمکله ميللي هرکات گوجلنمز. ميللي هرکاتيميز ايچريده و اؤرکلرده اولماليدير. سؤزون قيسساسي، اگر بير سيرا قورخاغين اومودونا قاليب و ميللي ساواشيميزي مجازي دونيايا داشيساق، دئمک بيز يازيب و بيز اوخوياجاغيق،

باي بک چاليشيب کي ميللي بيلگيلر کاغاز اوزرينده، کيتاب شکلينده و يا فيلم اولاراق ايچريده ياييلسين. چتيندير، آما ايستسک باشاراجاغيق، شاه دونمينده نئجه بير ساوادسيز اکينچي، بير دوکتور و بير موهنديس خومئيني کاسئتلرين گيزلي اولاراق دينلييردي، نئجه کي بيلديريلر الدن-اله دولاشيردي و نئجه کي پول توپلاما کاناللاري يارانميشدي، بيزيم ميللي هرکاتيميزدا عئيني يولدان ايلرله مه ليدير. اينتئرنئت هاميدا يوخ، ميللي ماراخ هاميدا يوخ. سؤز ۵۰ ميلييون آذربايجانلي تورکدن گئدير. اونلارين ۴۰ ميلييونو فارس و ۱۰ ميلييونو روس کؤلگه سينده ياشايير.

سورقولامايا گلينجه، عومومي اولاراق ۸۰ يانيت توپلاماغ اوچون سورقولاما اينتئرنئته يوکلندي. ۱۵ گون ايچينده ۱۳۶ يانيت توپلاندي. بو اولاي بيزي سئوينديرديش نومونه سورقولاما اولاراق، بو قدر جاوابي اينجله مک اوچون پلانيميز يوخيدي. آما، يانيتلايانلاردان هير داها تشککور ائده رک، سورقولامانين تام اينجله مه ايشيني ميللي فاللاريميزا بوراخيريق. باي بک اؤز گوروشون قيسسا اولاراق سيته يه آرتيراجاق.

سون اولاراق، اينتئرنئت دونياسين آشماغ لازيمدير. بو دونيادان قورخماماليييق. ساوادسيز اينسانلارا بير داها سسله نيريک کي بوش يئره ميلتين آراسيندا قورخو ترتمه سينلر. اگر شوبهنيز وارديرسا، آچيق اولاراق اعتيراض ائديب و تهلوکه لي اولان ايشلملري آچيقلايين. آما، گيزلي-باغلي سؤزلر دئييب و ميلته آماندير سيته لره گيرميين دئديکلرينده، دئمک بير تور اؤزوموزه ضربه يئنديريلير.

تئکنيکي باخيميندان، بيري نين کامپوتئرينه گيرمک اوچون، اونا ويروس گؤندرمک بيله لازيم دييل. بيري نين کامپوتئرين بوشالتماغ اوچون اينتئرنئتدن آدرئس تاپماغ لازيم دييل. چوخلو يول واردير کي اگر ايران حاکيمييتي ايستسه، او يوللار ايله هاميني ايزله يه بيلير! آما، بو اولان ايشميدير؟

چوخلاري خاريجي اولکه لره گئتديکدن سونرا ميللي دوشونجه ني اؤيره نيبلر. او اينسانلار داها سونرا او اولکه لرين پولون آلاراق زامان الده ائديبلر. چاليشمادان دئولتدن يارديم آلان بو سويداشلار اؤزلرين بير يوکسک سوييه لي سيياستچي گؤروب و تئررور! اولماقدان قورخويا قاپيليبلار! ائله اونا گؤره دير کي هرکسه شوبهه ايله ياناشيرلار، هاميني جاسوس يا خايين بيليرلر، آنجاق اؤزلريده بير ايش گرمه دن قورخو تؤره ديرلر!

ميللي هرکاتيميزين کؤکو ايچريده دير. اونا سو وئرمک، اونو قوروماق اينتئرنئت ايشي دييلدير.

باي بک قيسسا اولاراق ۱۳۶ نفرين وئرديگي يانيتلارا اينجله مه حاضيرلاييب. بو اينجله مه ساده شکيلده يازيليب و اؤنملي اولان بؤلوملر سئچيليب.

سورقولامادان الده اولونان سونوجلارا باخاراق، آذربايجانلي سويداشلار (ائله ساناق) کي باي بک سيته سيني زيارت ائديب و سورقولاماني جاوابلاييبلارين ۲۱.۳۲٪ یؤزده سی ۳۱-۳۵ ياشينادديلار. ياني هرکاتيميزين گئنج اولدوغو اينتئرنئتده بللي اولور. ۲۰-۲۵ ياشي اولانلار ايسه ۱۵.۴۴٪ فايز تشکيل ائديبلر.

يانيتلايانلارين چوخو اوغلان اولوب. بير سيراسي بو سورويا جاواب وئرمکدن چکينيبلر. اگر اونون ياريسين قيز و ياريسين اوغلان بيلنده، ۵۹٪ اوغلان و ۴۱٪ قيز اينتئرنئته گليبلر. ياني اوغلانلارين اينتئرنئتي قوللانماغ ايمکانلاري داها چوخدور.

آذربايجاندا دوغولانلارين ساييسي ۱۱۸ نفر اولوب، آنجاق آذربايجاندا ياشايانلار ۵۴ نفردن اولوشوبلار. ياني، سورونلار ندنيله، آذربايجاني ترک ائدنلرين سايي اوردا ياشايانلاردان چوخ فرقليدير. و، ايچريدن اينتئرنئته گلنلرين ساييسي نين آز اولماسيدا ميللي هرکاتين ايچريده سورونلارلا قارشي اولدوغون گؤزه چارپير.

تزييقه معروض قالانلار، و اونلار کي بيليرلر تزييق ندير ۸۸ نفر اولوب. ان چوخ اينجيديکلريسه ديل باخيميندان اولوب. ياني کي تورکجه دانيشماغ اوچون، يادا تورکجه لهجلري اولدوغو اوچون اينجيديليرلر. داها سونرا سوي باخيميندان شيکايت ائدنلر چوخدور. ساده دئييشده، بونلاردان ۴۴ نفري هم تورکجه دانيشمالاري اوچون و همده تورک اولمالارينا گؤره تزييقه معروض قاليبلار. اوندان سونرا جينسييت ساييسي گلير. ياني قيز يا اوغلان اولمالارينا گؤره اينجيديلنلرين یؤزده سی ۱۸.۰۲٪ اولور. اينديکي دوروما باخاندا، بونلار قيز اولماليديلار. دين باخيميندان ازييت اولانلارين ساييسي ۳۰ نفردير.

اينتئرنئته گلنلرين ساوادلاري اورتالاما اولاراق اورتا اوخول اولور.

۸۲٪ یؤزده ايشله ديکلرين بيلديريبلر. اورتا اوخول بيتيريب و چاليشان سويداشلارين آچيقلاماسيندان گؤرونور کي بيزيم توپلوم هم اوخويان و هم چاليشانديلار. بونلارين بئينينه، يالنيز ميللي دوشونجه آخماليدير.

ياري-ياري اولاراق، تاريخيميزي بيلنلر وارديلار. ۱۰۸ نفر آذربايجانين هارا و کيمين اولدوغون بيلديريبلر. اونلارين ۵۷.۴۱٪ یؤزده سي اينانيرلار کي اينديکي قوزئي و گونئي آذربايجان تورپاغلاري بيرگه آذربايجاندير و تورکوندور. ۲۹.۶۳ یؤزده اينانير کي خزر-دن عمان-آ، داشکند-دن آنادولو-يا قدر آذربايجاندير و تورکوندور.

تورک اولوسون اولماسينا اينانانلار ۷۷.۳۷٪ یؤزده دن اولوشوبلار. اونلار دئيير کي آذربايجانلي و تورکييه لي تورک ساييلير. بو اولاي بيلديرير کي سويداشلاريميز تورک تاريخيندن خبرلري آزدير. ندن کي سورقولامادا يئرلشن ليسته نين هامه سي تورک سويوندان سئچيليبلر.

دئموکراسيني “هرکسين سؤز و سس (راي/اوي) حاقي ائشيت اولسون” بيلنلرين ساييسي ۵۰ نفر اولوب. بو گؤسترير کي سويداشلاريميز چوخ اينساني دوشونجه يه ماليکديلر و هئچ آيريسئچکيليک قويماغا اينانجلاري يوخدور.

۱۱۰ نفر اينانير کي بير ميلتين بير دئولتي اولماليدير. بو سورو ايکي باخيمدان اينجلنمه ليدير: ۱- گونئيده دئولت قورولماسي، ۲- گونئي و قوزئيين بير دئولت بايراغي آلتيندا بيرلشمه سي. دئمک سويداشلارين چوخو اؤزگورلوک و بيرلشمکدن ياناديلار. بونلار اينانيرلار کي دئولتيميز اؤزگور و باغيمسيز اولماليدير. ناراخليدير کي ۱۵.۴۵٪ یؤزده آذربايجاندا کيرراليغين يارانماسين طلب ائديرلر.

عومومي سياسي بيلينجين ميلتيميزده اولوب اولماماغي سوروسونا، ۳۶.۵۰٪ یؤزده چوخ آزدير يانيتي وئريبلر. ۲۳.۳۶٪ یؤزده سه يئترلي دييل دئييبلر. آما، ۱۴.۶۰٪ یؤزده سويداشيميز اينانير کي ميلتيميزين سياسي بيليمي يوخدور. بو اولاي بيزي دوشوندورمه ليدير کي ندن گئچميشده مودئرن و دئموکرات قالخيشلارا اؤندرليک ائدن بير بؤلگه ده ياشايانلارين بيلينجي آزاليب.

سويداشلارين چوخو ميللي دوشونجه سي نين ياييلماسين ايستييبلر. اونلارين ۳۹.۸۰٪ یؤزده ي دئيير کي مئدييا ياراتيلماليدير (کيتاب، قزئت، تلويزيون، راديو، سيته و.س)! يوخاريدا يازيلديغي کيمين، مئدييالارين چوخالماسي بير گرکدير. بونا مانعا يارادانلار يا اوندان قورخو يارادانلارين ايشلمينه سون وئرمک لازيمدير.

ميللي دوشونجه ني يايماغ اوچون ۲۴.۹۱٪ یؤزده هر يئرده دانيشاجاقلارين بيلديريبلر. عومومي باخيشدا، قالان سويداشلاريميز مئدييا و فيزيکي ايشدن سوواي، هر تور يارديما حاضير اولدوقلارين بيلديريبلر.

۸۰ نفر بيلديريب کي اؤلسه لرده ميللي دوشونجه لرين دييشميه جکلر.

گؤستري ياپماغ اوچون گؤنوللو سويداشلارين ساييسي چوخ آزدير، يني يالنيز ۸ نفر بو باره ده حاضير اولدوقلارين بيلديريبلر. باشقالاريسا، گؤسترييه قاتيلمالارين موحافيزکارليقلا بيلديريبلر.

ميللي فعاللارين توتولماسين بيلديرمک اوچون چوخلو سويداشيميز راضي اولدوقلارين دئييبلر. اونلار بو ايشي يارارلي بيليب و توتولانين جانين خيلاص ائده بيله جک قدر اؤنملي بيليرلر.

گلديک سونا،

سورقولاما بيتدي، آنجاق اوندان آليناجاق ايدئالار بيتمييب. اينجلمه لرين سونوجون ميللي فاللاردان ائشيتمک ايستريک. اونلار قرار وئرمه ليديلر کي ميللي دوشونجه و تاريخيميزين بيلمه سينده اولان قيريخ پارچاني نئجه ياپيشديرماغ اولار. اونلار قرار وئره جکلر کي ايسته نيلن مئدييالار نئجه يارانا بيلر و.س.

و، باشقا سورقولامالارين يارانماسي اوچون، پروقراملاماغ، يئرلشديرمک و ايداره ائتمه سي اوچون حاضير اولدوغوموزو بيلديره رک، سيزلره بيرداها تشککور ائديريک.

باي بک
۰۴/۰۷/۲۰۰۸

٫بير ميللتين سسي
پایلاش | پرینت

---

بعضی عکسلر خبره باغلی اولمایا بیلیر. لطفا دیقتتلی اولون

گوروش کاپانیبدی