ياشاسين آذربايجان - Long live Azerbaijan

.

“آي قارداش، همشريدن تشکيلات رهبري اولماز، بير سؤزله، همشرييه ايش تاپشيريلاسي دئييل، سببي ده بو دور کي، همشريلر چاشير. ميثال اوچون، بير همشري گلير باکي-يا و بير نئچه مين دولار وئريريک اونون الينه. او دا گتيرير او پوللاري خيمير-خيمير خرجله يير. بيردن بير جووللاغي تاپيلير دئيير کي، آي فيلانکس سنه باکدا بئش مين يورو وئرميشلر، او دا تلم-تله سيک دئيير : يوخ يورو دئييلدي، دولار ايدي. باخ، محض بونا گؤره همشريلره اعتيباريميز يوخدور”. ملا عمي٫ من دولارلا يورو آراسيندا چاشان همشري نين چاشماسيني، کنديميزده کي

---

---

“دونيانين هاراسيندا بدبخت بير آدام گؤرسن بيل کي همشريدير”
جليل مممدقولوزاده

همشريلر چاشير

سالام ملا عمي!

بيزيم کند ده موراد آدلي بير کيشي وار ايدي. بير گون موراد کيشي کندين چايخاناسيندا بير احوالات دانيشيردي: “گونلرين بير گونونده اوغورلوغا گئتميشديک. من ايديم، هاقوئردي ايدي، نجفقولو ايدي، آما بيريني دئميه جگم. بيرده گؤردوک مشهدي کازيم ايتي آياقلادي”.

موراد کيشي چاشديغيني باشا دوشوب دئدي: “واي دئديم داي”.

بلي، موراد کيشي مشهدي کازيما حؤرمت ائده رک اونون اوغورلوغا گئتديگيني دئمک ايسته ميردي، آما چاشدي دئدي. بيزيم کندده بونا دئييرلر چاشماق، بونو ياددا ساخلاياق کئچک اسل مطلبه.

ملا عمي! اؤزونده ياخشي بيليرسن کي، خاريجده ياشايان آذربايجانليلارين ۹۹٪ همشريلردير. بونا باخماياراق سون واختلار اونلاري ۱۵-۱۰ ايل اؤنجه قوردوقلاري تشکيلاتلارين رهبرليگيندن چيخاريرلار. بو تشکيلاتلارين رهبرليگينه آذربايجان جمهوريسينين دؤولت و يا هؤکومت مأمورلاري “سئچيلير”.

اوتوردوم و پاپاغيمي قويدوم قاباغيما، بونون سببي هاقدا چوخ فيکيرلشديم. فيکيرلشديم، فيکيرلشديم آما بير سبب تاپا بيلمه ديم. سونرا دئديم بلکه، باکي-يا بير تيکه کاغيذ يازيم و بو ايشين ندنين سوروشوم.

ملا عمي٫ سنين تاپشيرديغين کيمي، من بير ايشي گؤرمه دن اؤنجه، اونون نتيجه سي هاقدا دا دوشونورم. دئديم توتاق کي، من کاغيذي يازديم، باکيدا کاغيذي اوخويوب اونا جاواب وئرن کيمدير. سونرا فيکيرلشديم کي، بيردن اينصافا گليب بو دفعه جاواب وئرديلر و يازديلار کي:

“آي قارداش، همشريدن تشکيلات رهبري اولماز، بير سؤزله، همشرييه ايش تاپشيريلاسي دئييل، سببي ده بو دور کي، همشريلر چاشير. ميثال اوچون، بير همشري گلير باکي-يا و بير نئچه مين دولار وئريريک اونون الينه. او دا گتيرير او پوللاري خيمير-خيمير خرجله يير. بيردن بير جووللاغي تاپيلير دئيير کي، آي فيلانکس سنه باکدا بئش مين يورو وئرميشلر، او دا تلم-تله سيک دئيير : يوخ يورو دئييلدي، دولار ايدي. باخ، محض بونا گؤره همشريلره اعتيباريميز يوخدور”.

ملا عمي٫ من دولارلا يورو آراسيندا چاشان همشري نين چاشماسيني، کنديميزده کي اوغورلوغا گئتميش موراد کيشي نين چاشماسي ايله قارشيلاشديرديم و گؤردوم کي، ائله دير بو همشري ده چاشيب و باکي-دان منه بئله بير جاواب گه لرسه، داها منيم اونلارا دئمه يه سؤزوم قالماياجاق.

کيشيلر هاقليدير. سن نئجه فيکيرلشيرسن ، ملا عمي؟ چاشماغين قاش-گؤزو اولمور کي، ايندي اؤزون ده سنين بو جيريق-ميريق همشريلرينه اعتيبار ائديب ايش تاپشيرماق اولارمي؟

۲۲/۰۶/۲۲۰۸

٫بير ميللتين سسي

_ _ _ _ _ _ _
مربوط اُلان یازیلار

• ===> “دونيانين هاراسيندا بدبخت بير آدام گؤرسن بيل کي همشهريدير” (۳) - صمد نيکنام
• ===> "دونيانين هاراسيندا بدبخت بير آدام گؤرسن بيل کي همشهريدير" (۲) - صمد نيکنام
• ===> "دونيانين هاراسيندا بدبخت بير آدام گؤرسن بيل کي همشهريدير" (۱) - صمد نيکنام

پایلاش | پرینت

---

بعضی عکسلر خبره باغلی اولمایا بیلیر. لطفا دیقتتلی اولون

گوروش کاپانیبدی