مهندس امانینین اؤلوم (شهادت) خبرین ائشیدن بیر تورک میللتچیسینین راپورو! - عليرضا فرشي
بای بک، آذربايجان | آراگؤن, ۵-ي قیروو آی , ۱۱۰۰۸ اینجی ایل, چولا ۱۶:۳۴ [آ.خ] | ایچ ساولار, یازی و قوشوق
 |
. | یاغیشدا کی امان وئرمیردی، سحردن یاغیردی. تهران، قوم، قزوین، مییانا، همدان، اردبیل، رشت، اورمیه، سولدوز، قوشاچای، تیکانتپه، مرند، سلماس، خوی، اهر، ماکو، بیجار و … آذربایجانین تمام یئرلریندن میللتچیلر گلیردیلر و چوخدان گؤرمهدیغیم میللتچیلری گؤروردوک. هامی “باشین ساغ اولسون”، “آللاه رحمت ائلهسین”، “وطن ساغ اولسون”، و … دئییردیلر. |
جمعه گونو ناهارا یاخین، دوستلارین بیری زنگ آچیب، نیگران و حوزونلو سسله دئدی:
- سلام، علیرضا! مهندس امانینین تانییرسان!
- نئجه بهیه! کیم تانیماز کی!
- دئییرلر اهر یولوندا تصادوف ائلهییب، و ایکی قارداشی اولای یئرینده جانلارین آللاها تاپیشیریبلار!
- یا ابوالفضل!
- امانی، آما دیریدی، و ایندی ایمام ریضا بیماریستانیندا (خسته خاناسیندا) عمل آلتیندادیر!
- آللاها مین شوکور! هاردان سن بیلدین!
- منه م. ف. دئییب! آما، دئییرلر، ائله بیل … (آغلاماق امان وئرمه دی!)
- یا ابوالفضل!
تیلفون دسته یین یئره قویوب، گئیینیب، و سیما (خانیم) ایله بیماریستانا یولا دوشدوک! نئچه دقیقهیه بیماریستانا یئتریب، هئچ کیمی گؤره بیلمدیک! دوستلارا زنگ آچدیق، آما آغلاماق امان وئرمیردی دانیشماغا! دئدیلر:
- موهندیسین قارداشی گیله گلمیشیک، آما سیز گلمه یین! بورا چوخ شولوخدو!
- مهندیسین قارداشینین ائوی هاردادیر؟
آما باغلانتیمیز کسیلدی! بیماریستانین قاپیسی چوخ شولوخ و ایزدیحاملی ایدی! بیزیم دانیشیغیمیزی بیر نئچه نفر ائشیدیب، و دئدیلر:
- قارداشی گیلین ائولری مفتتحین آخیریندادیر!
دوستلارین بیری ایله تاپیشیب و اونون ماشینی ایله مفتتح (شاه آبادا) یولا دوشدوک. بیر آز آختاراندان سونرا، منبع (منبئه) طرفینده بیر ائوین اؤنونده ایزدیحامی گؤرونجه اورا ساری گئدیب، و آغلار خالقین خئیلینه قاریشدیق! هیدایت بئی ذاکردن باشقاسینا ساریلا بیلمهدیم! آغلارکن دئدی: “آخی! دئییرلر «قارا گونون عمری آز اولار»، علیرضا! بیزیمکی ندن اوزونا چکیب!”
خانیم، خانیملار ییغینجاغینا گئتدی، و بیر نئچه دقیقه دن سونرا آشاغی گلدی!
- گونش ساپ، سارالیب! سوسوب، اوزاقلارا باخیر، یاخینلاری گؤرمور! کورپه بالاسی اوتاغین بوجاغیندا گولر-آغلار اولوب! ملیک بالاسی تانریسیز قالیب، دئیهسن!
- ساریلدینمی گونشه؟! باغری چاتلامادان، آغلاتدین دنیز گؤزلرین!
- گؤز یاشلاریم آمان وئرمهدی آرتیق گؤرمه یه، یئریییب قوجاغینا دوشمهیه! پیلله لردن داها چیخا بیلمهدیم! قاپی اؤنونده گؤزلریم یولومو آلدی! یورویه بیلمهدیم!
- امانیمیزین باجیلاری نه حالدا دیر؟
- دئییرلر، آذربایجان خانسیز قالدی! باشسیز قالدی! بیزده قارداشسیز قالدیق! فلکه، دولانما! دایان! –دئییرلر!
- باجی قیزلاری نه حالدادیر؟
- چوخو بیلمیر هله نه اولوب! دئییرلر: “نه یه آغلاییرسیز! سن آللاه دئیین! داییلاریمیزا بیر شئی اولوبدور؟!”
- آناسیدا اوردایدی؟
- نه گؤزل آذربایجان تورک دیلینده اوخشاییر بالالارینا!…
آما آغلاماق، داها اونادا امان وئرمهدی! بیر آز دوروب و نئجه اولدو بو اولای سوروشدوق:
- دئییرلر مهندسین قارداشی کریم پیکان ماشینلارین سورویدو! آما، کریمین فرماندا الی یوخ ایدی! ایسته ییر کومپرسیدن سیبقت آلسین کی گؤرور قاباخدان خاور ماشینی گلیر، و یئرینه قاییتماق ایسته ییر. آنجاق، کمپرسینین دال طرفینین سولونا دهییب، باشقا طرفین وسطینه آتیلیر، و خاور یوک ماشینی پئیکانین قاباق قاپیسی ایله توققوشور! کریم و جعفر اوردا جانلارین الدن وئریرلر، و امانی دیری قالیر! اورژانس ماشینی اورا چاتیب، مهندسین یاریم جان بدنین ایمام ریضا بیماریستانینا گتیرنجه، ۴ ساعات یاریم کئچیر، و ساعت بیرده عمل اوتاغینا آپاریرلار! بیر نئچه دقیقهدن سونرا، اطلاعات مأمورلاری گلیب، و ایجازهسیز عمل اوتاغینا گیریرلر! بیر نئچه دقیقهدن سونرا، امانی قورتاردی و عملدن چیخمادی ائشیدیلیر!
- یانی دئییرسیز مهندسی اؤلدوروبلر؟!
- یوخ! بیلمیریک! آما شک ائلهمهیه عادت ائلهمیشیک! تبریزلیلر دئییرلر: اینانما، اوتانما، آللانما! بیزده بو بیر ایلده اولان اولایلاری دیققت اؤنونه چکندن سونرا، امانینین باشینا دا گله بیلردی دئییریک!
- بو شک ائلهمک بیزیم ایچیمیزه قورخو سالا بیلر آخی! اوجور دئییل؟ سیز دئییرسیز مهندس شهید اولوبدور؟!
- دئییرلر، مهندیس ایچیردن قان تؤکوردو و قولاقلاریندان دا قان گلمیشدی! اولا بیلر مغزی ضربه یئسین! آما، آخی دونیانین هاراسیندا اورژانس ۴ ساعت یاریم تأخیر ائدر! هاردان بیلک بو ۴ ساعت تأخیر و گئجیشمه عمدی دئییلدی؟ هاردان بیلک عمل اوتاغینا بونوندا جانین دا آلین دئمهییبلر؟ هاردان بیلک، بو تیرافیک قضاسینی اؤلدورندن سونرا بنزتمهییبلر؟ هاردان بیلک اؤز یاخین اقرباسی قورخوتما نتیجهسینده یالان دئمییرلر!…
- هر زادا شک ائتمهیه حاققیمیز وار. آما، هر زاددان اؤنجه سند توپلامالییق! هانکینیز گئدیب توققوشما یئریندن فیلیم گؤتورموسوز؟! هانکینیز خاور ماشینین سوروجوسو ایله دانیشمیسیز؟!
- دئییرلر خاور ماشینین سوروجوسونون یالنیز قیچلاری سینیب و باشقا بیر شئی اولماییب! آما، بیز قوهوملاری و قارداشی محمد، و گونش خانیم اولان یئرده نه ایش گؤره بیلریک! قانونسوز دا ایش اولار آخی؟!
- گونش خانیمین حالین گؤرورسوز دا! قارداشی محمد ده اوچ قارداشین بیردن الدن وئریب، بئلی سینیب! اینتیظاریز وار او قاباغا دوشوب، ایشلرین هاممیسینی اؤزو گؤرسون؟ کالبد شکافی ائلهییبلرمی؟
- بیلمیریک!
- صحنهنی گؤرن کیمدی؟
- بیلمیریک؟
- بو سؤزلری کیمدن ائشیتمیسیز؟
- قایناغی بللی دئییل! فیکر ائلهییریک مهندیسین قارداشی محمد بئله دئییب؟
- …
هر حالدا نیگران، حوزونلو حالدا ائوه گلدیک. گئجه ائشیتدیک کی صاباح ساعت ۱۰:۳۰-دا مارالاندا اولان بقائیه قبریستانلیغا ساری مفتتحدن تشییع جنازه اولاجاق. بیر آز ناراحات اولدوق، و نهیه “وادی رحمت”ه آپارمیرلار دئدیک. مارالان توتقون بیر یئردیر و احتیمالی وار گلجکده اورانی آرادان آپاریب، مسکونی یئر ائلهسینلر و شایعه وار کی ۲۰ ایلدن سونرا اورانی داغیلداجاقلار! بیرده اورا توپلانماق چتیندیر و جماعت اورا سیغیشماز! آنجاق، صاباحیسی تشیع جنازه اوچون ساعت ۹:۰۰-دا مفتتح خییابانینین آخیرینا ساری دوستلارین ماشینی ایله یولا دوشدوک!
ائوین قاباغیندا جماعت توپلانمیشدی و نئچه اتوبوس جماعتی مارالاندا بقائیه قبریستانلیغا ساری آپارماغا حاضیرایدیلر. ائوین قاباغیندا هئچ بیر ایش گؤرولمهدی! هاممی اوتوبوسلارا مینیب، قبریستانلیغا ساری یولا دوشدوک. قبریستانلیغین قاپیسینین قاباغیندا “گارد ویژه” و “راهنمایی رانندگی” ماشینلاریندان ساخلامیشدیلار. ماشیندان انیب، ایچهرییه گیردیک. جماعتده یاواش-یاواش گلیردیلر. اطلاعات مأمورلاری، و … ایچیمیزده اویان-بویانا گئتمکدهایدیلر. نئچه مین آدام توپلانماقدایدی.
یاغیشدا کی امان وئرمیردی، سحردن یاغیردی. تهران، قوم، قزوین، مییانا، همدان، اردبیل، رشت، اورمیه، سولدوز، قوشاچای، تیکانتپه، مرند، سلماس، خوی، اهر، ماکو، بیجار و … آذربایجانین تمام یئرلریندن میللتچیلر گلیردیلر و چوخدان گؤرمهدیغیم میللتچیلری گؤروردوک. هامی “باشین ساغ اولسون”، “آللاه رحمت ائلهسین”، “وطن ساغ اولسون”، و … دئییردیلر.
جماعتین ایچینده اطلاعات مأمورلاری جمعلره قاریشیب و آغیزلارین دادلارین بیلمک اوچون بحثه گیریردیلر. بیر نفر جماعت ایچینده دئییردی:
- ایلهام علی اف ایستهییردی چئهرهقانلینین یئرینه بیرین تاپیب، اونو گاموحون رهبری ائلهسین. آما، ایران مأمورلاری بیلیب، و مهندسی اؤلدوروبلر.
بو سؤزلره، و ساتقینلارین گولونج ترپنیشلرینه گولمکدن باشقا هئچ ایش گؤرمک اولمازدی!!! آنجاق، مهندسین جنازهسی بیماریستاندان گلمهمیشدیر. دئییردیلر شیناسنامهسینی (کیملیک بلگهسینی) اوغورلاییبلار! نئچه گون اونجه (کئچن شمبه) بیر مزدا ماشینین شهرداریدان بورج آلمیشدی کی تبریزین یاشیللیغین قوروسون. اوزونون و عائلهسینین کیملیک بلگهلری ماشینین داشبوردوندا ایدی. هم ماشینی و هم کیملیک بلگهلرین اوغورلاییبلار. بیر هفتهدی هله ماشین تاپیلماییب. مهندس کئچن گونلرده دادگاها شیکایت اوچون گئدمیشدی، و اوردا نئچه ایل بوندان اؤنجه اؤز قاضیسینی کی اونا بئش ایل زیندانا حوکمو وئرمیشدی گؤروموشدی. قاضی مهندیسه دئمیشدی کی:
- هله ایشلریندن ال چکمهمیسین؟
- سن ده کی هله ال چمکهمیسین، قاضی!
- دوزون دئ گؤروم، خانیمیوی سن بو یولا چکدینمی؟
- یوخ! او اولدن آذربایجان بالاسی ایدی! او اؤزو دوشونجهلی ایدی!
- …
مهندس بئله اینانیردی کی اطلاعات مأمورلاری اونون ماشینین اوغورلاییبلار تا میللتچیلیک چالیشمالارینا و گیزلی ایشلریندن باش چاخارتسینلار. مهندس دئییردی کی یاخچی یادیمی گلمیر کی کیفیمین ایچینده اؤزل بیر بلگه چالیشمالاریمدان وارمی یوخسا یوخ؟! و قورخویدی کی اؤزل بیر شئی اونلارین الینه چاتسین!
نئچه ساعت یاغیش آلتیندا، و چتیرلرین گؤزه گؤرونمز کولگهسینده میللتچیلر بحث اوتاقلاری و پالتاکلار آچدیلار و ساعت ۹:۳۰-دان ۱۲-ه دک بو جلسهلر سوردور. سونوندا دئدیلر مهندس امانینین کیملیک بلگهسینین کوپیسینی شهرداری ایدارهسیندن تاپیب، و جنازهیه دفن ائتمهیه ایجازه آلیبلار.
ساعت ۱۲:۰۰-ده اوچ جنازهنی برانکارت اوستونده گتیردیلر و “لا اله الا الله!” دئییه، دئییه جماعتین اؤنونه آپاردیلار و اؤلو نامازی قیلاندان سونرا، تورپاغا تاپیشیرماغا آپاردیق! یولدا “لا اله الا الله” و “آذربایجان سنین باشین ساغ اولسون / ایگیدلرین اوغوللارین وار السون” شعارلاری وئریلیردی. مهندسین قارداشی محمد هر زادی کنترل آلتینا چکمهیه چالیشیردی و آذربایجان آدی گلنده، چیغیر-باغیر سالیب، “لا اله الا الله” دئیین هارایلاییردی.
قبیر باشیندا، جنازهلرین قبیره قویاندان سونرا، قارداشی چالیشیردی میکروفوندان آذربایجان سسی چیخماسین و اوجا سسله چیغیر باغیر سالیب، “قویون منیم نوحه خانلاریم اوخوسونلار” دئییردی. کریم داداش اؤزو نوحه خان ایدی و نوحه خان دوستلاری دا قبیر اوستونه گلمیشدیلر. آما، جماعتین ۸۰ فاییزی مهندسین میللتچی دوستلاری ایدیلار.
هاممیدان اول “چنگیز بختآور” جنابلاری هاممییا باش ساغلیغی دئدی. سونرا “پرویز محمدی” سولدوز میللتچیلرین وریندن هاممیا باش ساغلیغی دئدی. سونرا، اسماعیل تبریزلی آپاریجیلیک ائدیب، “حسن دمیرچی” جینابلارین باش ساغلیغی دئمک اوچون چاغیردی. حسن دمیرچی گؤزل بیر شعر اوخودو، و سونرا میکروفونو وئری گونش خانیما! گونش خانیم آتاسیز قالمیش “آراز”ینا باخیب، میللهته اوز توتدو! گونش بایرامدان سونرا آتاسینین اؤلومونو و اونو الدن وئرمهیینی خاطیرلاییب، آرازی دوشونمهیه چالیشیردی. گونشین ایلک سسی یاغمورلو هاوادا دویولونجا، هاممی آغلاماغا باشلادی. گونش صلابتلی سسی ایله، آتیلا کیشیاوغلونون شعرینی اوخودو! بو شعری ایلک دفعه ستارخان تؤرهنینده گونش خانیمدان آپاریجیلیق سورهسینده ائشیتمیشدیم:
کامانین گوتوروب گئدن اووچو
آماندی آلا گوز جئیرانا دیمه
یالتاقجا یالواران تولکونو اولدور
قئیر تک باغیران آصلانا دیمه
وطنیم هوکورور آغلاییر یامان
کوکسونده یارا وار باشیندا دومان
توتایدیم گوله نی دئیه یدیم دایان
بات سینه مه آذربایجانا دیمه!…
بو شعری اوخویاندا، تمام آذربایجان آغلادی. گونش خانیم شعری اوخویاندان سونرا، دئدی:
- قول قانادیم سینب، ایجازه وئرمهیین دیزلریم ده سینسین! مهندیسه لاییق اولاق بیر یاس تؤرن سیزدن ایستهییرم!
گونش خانیمدان سونرا آپاریجی “هوشنگ جعفری”نی شعر اوخوماق اوچون چاغیردی. هوشنگ جعفریده چوخ گؤزل شعری ایله هاممینی دویغولاندیردی. آنجاق، مهندیسین قارداشی محمد داها آمان وئرمهدی، و “قویون منیم نوحه خانلاریم نوحه اوخوسونلار” دئدی. اوچ نفر نوحه اوخویان دالبادالا ایمام حسیندن، ابوالفضلدن، و … دئدیلر! آنجاق، مهندس امانیدن هئچ سؤزدن دانیشمادیلار. محمد اؤزو ده میکروفونو الینه آلیب، دئدی:
- کئشکی یاغیش یاغمازیدی، و من ایمام حسین کیمی قارداشلاریمین قانلی گؤزلرین قوجاغیما آلیب، اونلارا اوخشایاردیم.
محمدین باغری چاتلاماقدایدی و جماعت “قارداشدیدا، دؤزه بیلمیر!” دئییردیلر. نوحه اوخویانلار چالیشیردیلار میللهتی سینه وورماغا دا باشلاتسینلار کی نئچه نفر محمدی قوجاقلارینا آلیب، ایجازه وئر قوناقلاریمیز ایستهین کیمی یاس تؤرن قاباغا گئدسین! بونلار یوزلر کیلومتر یول گلیبلر مهندس امانیدان ائشیتسینلر. سینه وورماغی قویون قالسین آیری زامانا!
یاغیش بیر طرفدن و محمدین دؤزومسول حالی بیرطرفدن، میللتی اینجیدیردی. هاممی تؤرهنین بیتمهیینه قرار وئری و آذربایجان مارشینی اوخوماغا باشلادیلار. آذربایجان سن سن منیم … مارشینی اوخویار کن اوچ رنگ گوللری گؤیه ساری و قبره ساری آتدیلار. سونرا جماعت یولا دوشوب، آیریلیق ماهنیسینی، چیرپینیردی قارا دنیز ماهنیسینی، و … اوخوماغا باشلادیلار. سونرا، بیر نئجه شعار “یاشاسین آذربایجان”، “آذربایجان وار اولسون، دوشمنلری خار اولسون!”، و … دئییلدی و یاس تؤرن بیتدی.
آخشام چاغی ساعت ۱۸:۳۰-دان ۲۱:۳۰-آ دک شام غریبان ایدی. مفتتح خییابانیندا بیر کیچیک مچیدده (طالقانی مچیدینده) یاس تؤرن قورولموشدو. هاممی ناراحت ایدی کی ندن بوردا! ندن طوبا مچیدینده یوخ! ندن بو گیزلی و یولو چتین اولان یئرده! و … و بو ندنلره جاواب تاپا بیلمیردی. مچید دولوب بوشالیردی و ائله بیل میللت طواف حالینده مچیدین بیر قاپیسیندا گیریب، اوتورماغا یئر تاپماییب، و او بیریسی قاپیدان چیخیردیلار. هاممی چیخیش قاپیییا یئتیرنده محمده و مهندسین باشقا قوهوملارینا “باشین ساغ اولسون” دئییب، ائشیگه چیخیردیلار و دانیشماغا باشلاییردیلار. بعضیلری دئییردی: “ندن اؤزوموز مهندسه لاییق اولان بیر یاس تؤزنی توتمایاق! و ندن بیز گونش خانیمین سؤزونه عمل ائتمهیک!”
هر نه ایدی، آنجاق دونن گئجهنی ده سونا اردیک، و ایندی ناهاردان سونرا، ساعت ۳:۰۰-دی! و من، دوستلار ایله بیرلیکده مفتتحین آخرینا، طالقانی مچیدینه ساری یولا دوشورم کی مهندیسین اوچونون یاس تؤرهنینه قاتیلام!
مهندس٫ روحون شاد اولسون!
عليرضا فرشي
۰۵/۰۸/۱۳۸۷
٫بير ميللتين سسي_ _ _ _ _ _ _
مربوط اُلان یازیلار
- ===> غلامرضا امانینین و اونون قارداشلاری جعفر و کریم امانیلرین اؤلومو ایله علاقهدار آ.د.ا.پ -ین باش ساغلیغی
- ===> تبريز آغلار گؤز ايله ايگيدلرين تورپاغا تاپشيردي
- ===> آذربايجانليلار جمعييتي، اونتاريو، کانادا٫ مهنديس امانينين اؤلومو موناسبتيله وئرديگي بيانات
- ===> گونئي آذربايجان سياسي بيرليک و امکداشليق کوميسسيياسي نين بياناتي
- ===> گونئي آذربايجان کونقرئسي نين غلامرضا اماني و اونون قارداشلاري نين اؤلومو موناسيبتيله بياناتي
- ===> سانمايين اؤلوم قهرمانلاري اونوتدورا بيلر، امانيلر اؤرکلرده ياشاياجاق - ميللي پارتي بيلديريسي
- ===> بیانیه تشکیلات مقاومت ملی آذربایجان در رابطه با حادثه مشکوک درگذشت مهندس غلامرضا امانی
- ===> غلامرضا امانی، زندانی سیاسی سابق آذربایجانی، در اثر سانحه رانندگی درگذشت
- ===> امان سیز یاس (امانی قارداشلاریمیزین امانسیز آیریلیغینا) - اسماعيل جميلي
- ===> غلامرضا اماني-نين اؤلومو قونوسونا ميللي فعاللار نئجه توخونوب؟
- ===> مرحوم غلامرضا اماني نين ميللي مراسيملردن شکيللري٫ قضا ايله باغلي يئني خبرلر
- ===> داریخدیریجی آنلارین ان قاباریق فورماسی - سید حیدر بیات
- ===> تبريز ميلليتچيلري ترافيک قضاسيندا ياشاملارين ايتيريبلر (گؤنجللندي)
پایلاش | پرینت
بورا باغلي يازيلار:
- چگونه میتوان به حق جمعی تحصیل به زبان مادری رسید؟ - عليرضا فرشي
- آیا من نیز متهم هستم؟! - عليرضا فرشي
- آزادی را به نام سجاد و ائلچین فریاد بکشیم! - عليرضا فرشي
- حرکت سیاسی یا حرکت ملی! زندانی ملی یا زندانی سیاسی! - عليرضا فرشي
- حرکت ملی آذربایجان جنوبی و حرکت در راه احیای حقوق ملی آذربایجانیها و فرق آن با حرکت سیاسی آذربایجان - عليرضا فرشي
- اصلاح یا براندازی!؟ کدام یک؟! چه کسی انتخاب خواهد کرد؟! ملل یا هیأت حاکمه کشور؟! - عليرضا فرشي
- ایرفاندان اوجالمیش شعر، و شعر ایله آیاقلانان شاعیر! - عليرضا فرشي
- آذربایجانی دفن ائتمک اولماز - عليرضا فرشي
- آیا غرب وحشی میخواهد مرا نسبت به نظام جمهوری اسلامی ایران «بدبین» کند؟! - عليرضا فرشي
- آرزوهای بزرگ در دلهای دخترانه… و آیناز (حسنا)! - عليرضا فرشي
http://www.baybak.com
بای بک سایتیندان پرینت اولوب
http://www.11008.baybak.com/il_11008_say_1562.azr
یازینین اینترنت آدرسی
گوروش کاپانیبدی