ترققي اوچون هانسي توپلوم مودئلي سئچيلمه ليدير؟ - بابک آذري
بای بک، آذربايجان | آراگؤن, ۲۸-ي خزل آی , ۱۱۰۰۸ اینجی ایل, چولا ۱۹:۰۷ [آ.خ] | یازی و قوشوق
 |
. | اگر گولونج ده اولسا، آما حاقيقتدير کي، ايراندا بير سيرا شاهپرستلر ايراندا شاهلارين شاهي توپلومو ياراتماق ايسته ييرلر. اونلار غئيري - فارس ميلتلري طايفا حساب ائله ييب و بيلديريرلر کي، غئيري - فارس طايفالار هره سي بير شاه سئچيب و سوندا بو شاهلار هاميسي ميلليتي فارس اولان شاهلار شاهينا تابئ اولماليديرلار. ائله بو سببلره گؤره، چوخ بؤيوک اهميتي وار کي، موعين اولونماليدير سؤيلنن فيکير هانسي توپلوم مودئلينده گرچکلشه بيلر. |
وطنپرور قوووه لر کوتله يه موعين ائتمه ليديرلر کي، هانسي توپلوم مودئليني گئرچکلشديرمک اوچون چابا گؤستريرلر. چونکي دونيادا موختليف اينسان ايجماعلاري وار و بو ايجماعلار ماهيت باخيميندان بير - بيريندن جيدي فرقله نيرلر. ميثال اوچون، مدني توپلوم، اينفورماسييا توپلومو، شريت يا موقدس توپلوم، سوسياليست توپلومو و س.
اگر گولونج ده اولسا، آما حاقيقتدير کي، ايراندا بير سيرا شاهپرستلر ايراندا شاهلارين شاهي توپلومو ياراتماق ايسته ييرلر. اونلار غئيري - فارس ميلتلري طايفا حساب ائله ييب و بيلديريرلر کي، غئيري - فارس طايفالار هره سي بير شاه سئچيب و سوندا بو شاهلار هاميسي ميلليتي فارس اولان شاهلار شاهينا تابئ اولماليديرلار. ائله بو سببلره گؤره، چوخ بؤيوک اهميتي وار کي، موعين اولونماليدير سؤيلنن فيکير هانسي توپلوم مودئلينده گرچکلشه بيلر.
ميثال اوچون، ايرانين ايسلام اينقيلابيندان قاباق، دينچي رهبرلر، او جومله دن، آيتوللا خومئيني کوتله ني اينقيلابا دعوت ائديب، آزادليق وعدهسي وئريردي. اونلار وعد وئرن آزادليق مدني ايجتيمايتده اولان آزادليق دئييلدي، اصلینده شريعت يا موقدس توپلومون چرچيوه سينده حياتا کئچيريلمه سي نظرده توتولان بير آزادليق ايدي. ائله بو ميثال گؤسترير کي، توپلوم مودئلي سياسي آراشديرمالاردا نه قدر رول اوينايير. ميثال اوچون، شريعت توپلوموندا آزادليق ساييلان رفتار نورماسي مدني ايجتيمايتده توتاليتاريزم حساب اولونا بيلر.
قئيد ائتديگيميز ايرانين شريت توپلوموندا سياسي ايسلام ايدئولوگيياسي نين اوسوللاري ايجتيمايتين ايداره سينده موطلق حاقيقت کيمي ديرلنديريليب اوندان ايستيفاده اولونور. بو اوسوللارا موخاليف اولان مونافيق، يني موسلمانلارين آراسينا ايختيلاف سالان، آللاهلا موحاريبه آپاران مورتد، کافير و س. آدلانيرلار. و اونلار داهشتلي فورمادا جزالانيرلار. آما عکسينه، مدني ايجتيمايتده بير موعين سياسي ايدئولوگييانين اوسوللاري موطلق حاقيقت ساييلمير. هر ساهه ده موخاليف فيکير داشيماق هر اينسانين تبيي و ان ايبتيداي حاقي ساييلير. آنجاق بير فيکري حياتا کئچيرمک اگر باشقالارينا ماددي و معنوي خسارت وورارسا، او زامان سياسي جينايت ساييلير.
مدني توپلوم
مدني توپلوملار سياسي - دئموکراتيک سيستئملرله تانينيرلار. دئموکراتييا - سياسي، ايدئولوژي دئييل، اصلینده دئموکراتييا بير سيرا هوقوق اوسوللاريدير کي، اونلارين عصاسيندا دئموکراتيک قايدا - قانونلار يارانير و بو دئموکراتيک قايدا - قانونلارين چرچيوه سينده موختليف سياسي ايدئولوگييالارلا اينانانلار برابرهوقوقلو فاليت گؤستريرلر. هر هانسي بير سياسي ايدئولوگييانين قلبه سي آنجاق سربست سئچيملرله و کوتله نين هيمايتي ايله مومکون اولور. بيلديگينيز کيمي، بير ايجتيمايتين ايداره سي مورککب پروسئسدير. اونون ايقتيصادي - سياسي و مدني جهتلري وار. ائله اونا گؤره، دئموکراتييا ائلم و تئخنولوگييادان فايدالانير. ميثال اوچون، ايقتيصاد، سيياست، هوقوق، سوسيولوژي، پسيخولوژي ائلملري و س. بو سببه گؤره، بير مدني توپلومدا زامان کئچديکجه يئني معلومات کؤهنه معلوماتين يئرين آلير. ايجتيمايت تدريجي حالدا سياسي، مدني و ايقتيصادي باخيمدان يئنيلشير. ائله بو يئنيلشمه پروسئسي سبب اولوب مدني توپلوم ماهيت باخيميندان دييشيب و اينفورماسييا ايجتيمايتينه چئوريله.
اينفورماسييا ايجتيمايتي
اينفورماسييا ايجتيمايتي چوج جهتدن مدني ايجتيمايتدن فرقله نير. من آنجاق ايکي اؤنملي جهته ايشاره ائديرم:
۱. بيولوژي بئينين ائلئکترونيکي بئيينله بيرلشمه سي
۲. ايدئولوژيلرين اؤلومو
سون زامانلار عاليملر مووففق اولوبلار بعضي عليل آداملارا سوني قول و يا قيچ دوزلديلر کي، بئييندن ائليکتيريکي سيقناللاري آليب، تبيي قول - قيچ کيمي عمل ائديرلر. بعضي خسته ليکلر وار کي، ياواش - ياواش نئرو کاناللاريني يئييب و آرادان آپاريرلار. بو دا سبب اولور بئيي نين بدنله علاقه سي کسيلير. نهايت، خسته يوز فايز ايفليج اولور و اؤز بدنينده مهبوس ساييلير. بئله کي، بو خسته ليگين نتيجه سي اولاراق، او، بير کلمه دئيه بيلمير و بير بالاجا ايشاره ائتمه يه بئله قادير اولمور. عاليملر مووففق اولوبلار بو نؤو بعضي ايفليج آداملارين باشينا ائلئکتروتلار باغلاييب و اونلار بئيين دالغالاري ايله بيلگيساياردا ساده مئساژلاري يازماغا نايل اولوبلار.
بو تجروبه لر بيولوژي بئيي نين ائلئکترونيکي بئيينله بيرلشمه سينه بير رئال پرئسپئکتيو آچير. بعضي عاليملرين نظرينه گؤره، ياخين گله جکده بير بالاجا سيقنال گؤندرن آپاراتي پالتاريميزا باغلاييب و بئينيميزين دالغالاري ايله قاپيني آچيب، ايشيغي سؤندوروب يا ائلئکترون پوچتا گؤندريب، يا حتّی اينتئرنئت واسيطه سي ايله باشقا آداملارلا فيکير موباديله سي آپاراجاغيق. حتّی بئينيميزين دالغالاري ايله بيلگيسايارلا عئيني زاماندا اونلارلا ايشي گؤرمه يه مووففق اولاجاغيق. بو ميثاللاردان بئله بير نتيجه آلماق اولار کي، بيولوژي بئيينله ائلئکترونيکي بئيي نين بيرلشمه سي علمي ترققي نين سورعتين آغلاگلمز درجه ده آرتيراجاق و علمي باخيمدان اينسان بير يئره چاتاجاق کي، بو گون اونو رؤياميزدا دا تصوور ائده بيلمريک.
بيرينجي دفعه آمئريکالي سوسيولوق دانيئل بئلل ” ايدئولوژي نين اؤلومو ” آديندا کيتاب يازيب و بو ايديعاني اورتايا چکيب کي، مدني ايجتيمايتلرين اينفورماسييا ايجتيمايتلرينه چئوريلمه سي ايدئولوژيلرين عؤمرونه سون قوياجاق. چونکي مدني ايجتيمايتده علاقه تئخنيکاسيندا نؤقسان اولدوغونا خاطير، اينسانلار مجبوردورلار سيايسي تمسيلچي سئچه لر. چونکي اونلارا نه حاقيقي دونيادا، نه ده ويرتوال دونيادا ييغيشيب موزاکيره آپارماق و قرارا گلمک مومکون دئييلدي.
ائله بو سببه خاطير مدني ايجتيمايتده تمسيلچيليک سيستئمي دئموکراتييايا پرچيمله نير. و اينسانلار مجبوردولار پارلامئنته ميلت وکيلي، يا باشقا هؤکومت دايره لرينه تمسيلچي سئچمکله اونلار اؤز مدني، سياسي و ايقتيصادي حاقفلرينه يئتيشه لر. آما اينفورماسييا ايجتيمايتينده بو جور تمسيلچيلره احتيياج يوخدور. چونکي اينسانلار حاقيقي دونيادا دا مومکون اولماسا دا، علاقه تئخنيکاسي بو ايمکاني ياراديب کي، ويرتوال دونيادا بير يئره ييغيشيب، اؤزلري تمسيلچيسيز سياسي، ايقتيصادي و مدني قرارلار آلالار. البتته، بو چوخ آغير بير بهسدير و من تکليف وئريرم اوخوجولار اينفورماسييا يا صنعتدن اوستون ايجتيمايتي ياخشي باشا دوشمک اوچون آمئريکالي سوسيولوق آلوين توففلئرين کيتابلارين اوخويالار.
شريعت يا موقدس توپلوم
شريعت توپلوموندا حاکيميته ايلاهي معنا وئريلير و حاکيميتده اولان آداملار چاليشيرلار اؤزلرين موقدس شخصلر کيمي تقديم ائده لر. آيتوللاه خومئيني ايراندا اينقيلابدان سونرا اؤزون ايمام زامانين واريثي حساب ائديردي. ايرانين اينديکي حاکيميتي، يعني احمدی نژادين باشدا اولدوغو حاکيميت ايمام زامانين زوهور حاکيميتي آدلانير. طاليبانلار افقانيستاندا حاکيميتده اولاندا اونلارين ديني رهبرلري موللا عمر ايديعا ائديردي کي، افقانيستاني ائداره ائتمک اوچون حضرتي محمددن مصلحت آلير.
موقدس توپلومدا ديني احکام موطلق حاقيقت کيمي گؤستريلير و ايجتيمايتين ايداره سينده يئگانه قايناق ساييلير. بو اوسوللاري سوال آلتينا آپاريب و اونلارا شوبهه ايله باخماق بؤيوک گوناه ساييلير و گوناهکار گرک کي، جزالانسين. ائله بو سببه گؤره، عومومي حالدا موختليف ساهه لرده ايصلاحات مومکون دئييل. اگر ايستيثنا حاليندا موموکون اولسا، چوخ اوزون و مورککب بير پروسئس کئچيرمه ليدير. ميثال اوچون حال حاضيردا ايران يئگانه اؤلکه دير کي، اوشاقلارا اعدام حؤکمو وئرير. تقريبن ۴ ايل بوندان قاباق محکمه اورقانلاري نين ريسي آيتوللاه شاهرودي يازيلي فورمادا فرمان وئردي کي، محکمه اورقانلاري ۱۸ ياشيندان آشاغي اولان شخصلره اعدام حؤکمونون يئرينه، عؤمروبويو حبس وئره لر.
آما بونا باخماياراق، کئچن سون ۴ ايلده ۱۸ ياشيندان آشاغي اولانلارا هم اعدام حؤکمو وئريلير و هم ده بو هؤکوملر ايجرا اولونور. بير نئچه گون بوندان اول ايرانين باش پروکورولونون موعاويني بيلديريب کي، محکمه لره يازيلي فورمادا فرمان وئريليب، ۱۸ ياشيندان آشاغي اولانلارا اعدام حؤکمو وئريلمه سين. بئله نظره گلير بو فرمان دا اولکي فرمانلار کيمي حياتا کئچيريلمه سي مومکون دئييل. چونکي محکمه لر قانون اساسيندا حرکت ائديرلر و ايرانين جزا قانونلاريندا قيز 13 ياشيندان و اوغلان 15 ياشيندان يئتکين حساب اولونورلار. يعني اونلاري حتّی اعداملا دا جزالانديرماق اولار. اگر ايسته ييرلر اوشاقلارين اعدامي نين قاباغين آلالار، اوندا اينديکي حاکيميت گرک ايرانين مجليسينه بو هاقدا لاييهه تقديم ائده و ايران مجليسينده بو لاييهه تصديقلنمکله بير يئني قانون يارانا کي، اوشاقلارين اعدامينا سون قويور.
بوردان بئله بير سوال قاباغا گلير: نه سببه بو ايش حياتا کئچمير؟ سببي آيديندير! ايرانين تعيين اولونان ميلت وکيللري نين چوخونون دينه فاناتيک باخيشلاري وار. بو جور لاييهه ني تصديقله مکله، اونلار اؤز ايناملارينا قارشي چيخيرلار. اگر مجليس ده بو باره ده قانون تصديقلسه، کئشيکچي شوراسي اونو تصديقله ميه جک. کئشيکچي شوراسي ايرانين آنا ياساسي نين عصاسيندا مجليسده تصديق اولونان لاييهه لري ردد ائده بيلر. و اونلارين عصاس وظيفه سي ديني احکامي کي، موطلق حاقيقت ساييرلار، اونو قورويوب ساخلاماقدير.
بس بوردا آيدين اولور کي، نه اوچون ايرانين شريعت توپلوموندا ۲۹ ايلين عرضينده جزا سيستئمينده بير بالاجا اولسا دا، ايصلاحات آپارماغا قادير دئييللر. معلومات اوچون قئيد ائتمه لييم، بير ايجتيمايتده ترققي و اينکيشاف پروسئسي آنجاق موختليف زمينلرده ايصلاحات و سازيشله موموکوندور. اگر ايصلاحات و سازيش دوندورولا، او ايجتيمايت ترققي عوضينه گئرييه گئدر. بس بو حسابلا هئچ ده تججوب يئري يوخدور کي، بين الخالق اورقانلارين اينسان هاقلاري ايله باغلي وئرديکلري هئاساباتلارا گؤره، ايران عربيستان و طاليبانلار حاکيميتده اولاندا افقانيستانين شريت توپلوملاري دونيانين ان گئريده قالميش اؤلکه لري ساييليرلار.
بو اهميتلي نؤقته ني اونوتماماليييق کي، هر ايدئولوژي، ايستر ديني يا غئيري - ديني ماهيت داشييا، او ايدئولوگييادا هم ايفراطي دوشونجه لي و هم ده علمي دوشونجه لي آداملار وار. ميثال اوچون، آوروپانين اؤلکهلرينده خريستيان - دئموکرات پارتييالاري وار. بو پارتييالار اؤز پروقراملاريندا ديني احکامي موطلق حاقيقت کيمي گؤسترميرلر. اونون يئرينه چاليشيرلار باشقا پارتييالار کيمي ستاتيستيک تجروبه، منطيق اوسولو و موعين فاکتا دايانيب، کوتله يه قانع ائديجي ايضاحات وئره لر. اوزاغا گئتمه يه ک، تورک جومهوريتينده حاکيم پارتييانين اگر ايسلام تمايوللو اولسا دا، شريت توپلومو ياراتماق فيکرينده دئييل. عکسينه، چاليشير مدني ايجتيمايتين نورمالاري عصاسيندا فاليت گؤستره. گلين بو يئرده سوسياليزم مفکوره سيني نظردن کئچيرک.
اونداندا دا هم علمي و هم ده ايفراطي دوشونجه لر وار. ميثال اوچون، سوسيال - دئموکراتلار سوسياليزمي مدني ايجتيمايته اويغون اولان بير حالدا حياتا کئچيريرلر. آما عکسينه، مارکسيست - لئنينچيلر سوسياليزمده عصاس بير سيرا اوسوللاري موطلق حاقيقت کيمي قبول ائديب، سوسياليست توپلومو و نهايت کوممونيزم توپلومون ياراتماق ايسته ييرديلر. کئچميش سووئت ايتتيفاقي و شرقي آوروپانين بعضي اؤلکهلري نين تجروبه سي نيشان وئردي کي، بو توپلوم بيزلره اؤرنک اولا بيلمز. نهايت کي، اونلار اؤز ايچينده بؤهرانا دوشوب توپلوم مودئللرين دييشمه يه مجبور اولدولار.
سون سؤز: طبیعیدير، هر بير وطنپرور ان ياخشي توپلوم مودئلين ترققي اوچون اؤز وطنينه سئچمه ليدير. و بيزيم آذربايجان اوچون ده ترققي و اينکيشاف مودئلي اينفورماسييا ايجتيمايتي اولا بيلر. البتته، بو آيدين مسئله دير کي، اونا چاتماق هئچ ده آسان بير ايش دئييل و اونون قاباغيندا چوخ جيدي مانعه لر وار. بو مانعه لري تانيماق اوچون من ديگر يازيمين لينکين سيزه نيشان وئريرم.
بابک آذري (حقوقچو)
۱۸/۱۰/۲۰۰۸
٫بير ميللتين سسي
پایلاش | پرینت
بورا باغلي يازيلار:
- “آزاد تريبون” سيته سي نين مسئولو ايديعا ائتديگي ژورناليسمين ائتيکاسنا صاديق قالا بيلمه دي!
- آذربايجانين ستوکهولمداکي سفيرينه آچيق مکتوب - بابک آذري
- اينسانليغا تهقير اولان ايشگنجه ني گونئي آذربايجاندا دايانديراق! - بابک آذري
http://www.baybak.com
بای بک سایتیندان پرینت اولوب
http://www.11008.baybak.com/il_11008_say_1503.azr
یازینین اینترنت آدرسی
گوروش کاپانیبدی