بايراق تارتيشمالارينين گره کليلييي و يارارلاري

بايراق تارتيشمالارينين گره کليلييي و يارارلاري - مئهران باهارلي

بای بک، آذربايجان | یئیگؤن, ۲۶-ي خزل آی , ۱۱۰۰۸ اینجی ایل, چولا ۲۱:۱۳ [آ.خ] | یازی و قوشوق

بايراق تارتيشمالارينا گلينجه، بو تارتيشمانين گونئي آزربايجان اوچون گئرچه ک بير بايراغين بليرله نيب سئچيلمه سي قونوسوندا فايدالي اولاجاغي کسيندير. آنجاق بو فايدا، بايراق تارتيشماسينين يارار و گؤره ولرينين هاميسي اولماييب، اونون فايدالارينين يالنيز يوزده اونلاري ايله محدوددور. دئمک من بو تارتيشمالاردان دوغاجاق اولان فايدالارين يوزده دوخسانيندان چوخونون، باشقا آلانلاردا اولدوغونا اينانيرام. قيسساجا:

گونئي آزربايجان بايراغينين ييرمينجي يوز ايل تاريخي حاققيندا يازديغيم يازيني، فارسجا قلمه آلمامين باشليجا ندني، واخت آزليغي ايدي. هر يازيني ايکي تورک و فارس ديللرينده يازمايا ايمکانيم اولماديغي اوچون، گنه لده هر بير يازينين ديليني، او يازيداکي موخاطبلريمين کيم اولدوغونا گؤره سئچيره م. آيريجا ييرمينجي يوز ايل گونئي آزربايجان بايراغينين تاريخي و ده قاجار-مشروطييت تورک بايراغي ايله ايلگيلي بير يازينين، فارس ديلينده يئري بوش اولدوغونو گؤره ره ک، او يازيمي فارسجا يازمايا قرار وئرديم. آنجاق من ده، مجبورييت اولماديغي صورتده، نثر ديليميزين -اؤزه لليکله سيياسي و عئلمي قونولاردا- موطلقن تورکجه اولماس گره کدييينه اينانيرام.

١- بير بايراغين نئجه يارانماسي، اونا باغليليق دويقوسونون هانسي شکيلده اورتايا چيخماسي، قوتسالليغينين نئجه اولوشماسي، … حاققيندا سؤيله نه ن دوشونجه و تثبيتلرين چوخو- دوغرو اولماقلا بيرليکده- بيز دئييل، داها ايستاندارد و ايدئال بير خالق و قوشوللار، ميللتله شمه سيني تاماملاميش بير خالق اوچون گئچه رليدير. بيزيم خالق ايسه بير ياندان بوتونويله، يا دا بؤيوک بير اؤلچوده آسيميله اولموش، ميللي ياشامي تهلوکه يه گيرميش؛ اؤته ياندان دا ميللتله شمه نين ايلکين آدديملاريني آتان بير خالقدير. بونون دا آنلامي بيزيم خالقين، طيبب ديلي ايله دانيشماق ايسته رسه ک، روتين موداخيله لرله بيرليکده اورژانس موداخيله، حتتا صونعي حياتا دؤنده رمه يؤنته ملرينه ده ائحتيياجي واردير دئمکدير.

باشقا بير دئييشله، من بو مساله يه ميللتله شمه آچيسيندان ياناشيرام. بيليندييي کيمي سؤزوموز`ده چيخان يازيلارين بؤيوک بير بؤلومو، بيلگيله نمه و اينسانلاري بيگليله نديرمه آماجيني گودور (گونئي آزربايجان`ين ميللي، سيياسي، ائتنيک و تاريخي سينيرلارينين دقيقله شديريلمه سي؛ تورکجه ني ايله تيشيم و يازيلي ديليميزه چئوريمه؛ ديليميزي فارسجا کلمه لردن آرينديرما؛ تقويمين تورکجه له شديرلمه سي؛ خالقيميزين مذهبي اولان جعفري شيعه لييينين فارسلارين ايمامي شيعه ليييندين فرقلي اولدوغو؛ وطنيميزين فارسلارين وطني اولان فارسيستان`دان فرقلي اولدوغو؛ ميللي تاريخيميزين اؤزگون و فارس ميللي تاريخيندن فرقلي اولدوغو، …..). آنجاق بيلگيله نمکدن باشقا، بو قونولارين هاميسينين بيزي فارس خالقيندان آييرت ائتمه، آيريشديرما، دولاييسي ايله ده بيزيم ميللتله شمه ميزه کؤمه ک ائتمه کيمي يان آماج و فايدالاري دا واردير. دئمه لي بو يازيلار عئيني حالدا، ايکي ده ييشيک آماجا اولاشما و يارار ساغلامايي – يعني “بيلگيله نمه” و “ميللتله شمه” آماجلاريني- گودمکده دير.

منجه بيز آسيميله اولموش خالقيميزين، ميللتله شمه سينه کؤمه ک ائده ن، کؤمه ک ائده بيله ن، کؤمه ک ائده بيله جک ائحتيمالي اولان نه وارسا، نه بولابيليرسه ک اونلاردان يوخاريداکي آماجلار دوغرولتوسوندا يعني “بيلگيله نمک” و “ميللتله شمک” دوغرولتوسوندا يارارلانماليييق. بونلار آراسيندا “بايراق” کيمي ياپاي (صونعي)، يا دا “ديل” کيمي دوغال (طبيعي) قونو و آراجلار اولابيله ر. گونئي آزربايجان`ا آيري بير بايراق منيمسه تمک، حتتا صيرف بئله بير بحثي آچماق، ايران چرچيوه سينده اؤزونو تانيملاما و اونا باغلي قالما تابوسونو ييخاجاق، بيزيمله فارس خالقي آراسيندا وار اولان آيريشماني چوخالديب آرتيراجاق، خالقيميزين ميللي آسيميلاسييونو قاباغيندا انگه ل تؤره ده جک و اونون ميللتله شمه سينه يارديم ائده جکدير. ايشته بو اوزدن ده، ده يه رله نديريلمه سي گره که ن ائشينه آز راستلانير بير فورصتدير. گونئي آزربايجانين ميلل بايراغي قونوسوندا، دوغرو توتومون نه اولدوغونو باشا دوشمک اوچون، دؤولتي اولماديغي حالدا چوخدان اؤزونه ميللي بايراق منيمسه ميش کورد حرکتيني، اؤزه لليکه تورکييه و عراقدا اينجه له مک يئته ر.

البتته داوام ائده ن بو تارتيشمالار، گونئي آزربايجان اوچون بللي بير ميللي بايراقلا سونوجلانيرسا، داها ياخشي اولار. آنجاق بو تارتيشمالار هر هانسي بير بايراغا سونوجلانماسا دا، تک باشينا بئله بير تارتيشمانين ياپيلماسي بيله، بيزيم فارسلاردان آيريشماميزا، دولاييسي ايله ميللتله شمه ميزه يارديم ائده جکدير. بو اوزدن ده، بو تارتيشما آلقيشلانمالي و يايقينلاشديريلاراق درينله شديريلمه ليدير.

٢- بو قونونون فارس مئديياسي اوزره ينده کي ائتگي و يانقيسي دا اؤنه مليدير. بو تارتيشمانين ياپيلماسي، بيزيم ميللي مساله و گونده ليکلريميزين فارس خالقيندان فرقلي اولدوغونون بير قانيتيدير. بو آيريجا تورک خالقي و گونئي آزربايجان`ين اؤز گونده ميني بليرله مه و داهاسي آزربايجان ميللي دئموکراتيک حرکتينين موديرييتينين فارس و ايرانچي-سراسري تشکيلاتلاردان تامامي ايله آيري و موستقيل اولدوغونون گؤسته رگه سيدير. بئله بير آدديم، گئچميشده و بنزه ري دوروملاردا گؤرولدويو کيمي، موطلق شکيلده فارس تشکيلات و شخصييتلري، سيياسي اولاراق تعويض وئرمه و گوذشته گئتمه يه مجبور ائده جکدير.

٣- بايراق تارتيشماسيني گره کلي قيلان اوچونجو بير قونو، بؤلگه ده کي دنگه سيز ميللي دورومدور. بيزيم قونشولار، اؤزه لليکله سورونلو اولدوغوموز ايکي قونشوموز يعني فارس و کورد (و قوزئيده ائرمني) خالقلاري چوخ سورعتله ميللتله شمه سوره جينده ايله رله يير، حتتا اونو بيتيرميشديرلر. بونون طبيعي سونوجو اولاراق دا ميللتله شمه نين، عئيني حالدا بيرله شديريجي اولان ذئهني شرطلرينين هاميسيني، بير بير الده ائدير و يا الده ائتميشديرلر. ميللتله شمه نين بيرله شديريجي ذئهني شرطلرينين باشيندا، “اورتاق تاريخ حيسسي”، “اورتاق وطن تانيمي”، “اورتاق ديل، ادبييات، خط و ايملا”، “اورتاق سمبوللار” و “اورتاق تقويم” ساييلابيله ر. بيز ايسه اورتا دوغو، قافقاز و آناتولويا داغيلميش آزربايجان تورکلري اولاراق، يوخاريدا ساييلان ميللتله شمه نين ذئهني شرطلري آچيسيندان و هئچ بير يؤندن بوگون فارس، کورد و ائرمني خالقلاري ايله آياقلاشا بيلمه ريک. بيز ميللتله شمه سوره جينده بو خالقلاردان اونلارجا ايل، بلکه ده يوز ايلدن آرتيق داليداييق.

بيزيم بو ميللي گئري قالميشليغيميز و قونشولاريميز اولان کورد و فارسلارين ميللتله شمه آشامالارينداکي بيزيمله آرا، حتتا اوچوروم آچمالاري، ياخين گله جکده بيزه چوخ جيددي سورونلار ياراداجاقدير. بو سورونلارين باشيندا گئرچه کله شمکده اولان “تورپاق ايتيرمه” اولاسيليغي گلمکده دير. منجه اينديکي دورومدا بيز بو ايکي خالقلا وار اولان ميللتله شمه آراميزي سورعتله قاپاتماز ايسه ک؛ غربي آزربايجان، کوردوستان، کيرمانشاهان و همدان اوستانلاريندا تورک-آزربايجان تورپاقلاريني کوردلره؛ و مرکزي، قزوين، همدان، قوم، تئهران و حتتا زنجان اوستانلاريندا فارسلارا بؤيوک تورپاق قاپديرماقلا اوزله شه جه ييک. آنجاق گونئي آزربايجان`ين اؤزونه عاييد ميللي بير بايراغا قاووشماسي، سمبوليک و عئيني اولاراق خالقيميزين ميللتله شمه سوره جيني قيپيرداديب يئيينله شديره جکدير، اليميزي بو ايکي خالق قارشيسيندا گوجله نديره جک و تورپاق ايتيرمه ريسکيني آزالداجاقدير. دوغروسو کوردلرين اورمودا کوردوستان بايراغي قالديقلاري بير حالدا، گونئي آزربايجان`ين بايراقسيزليغي آبسورد گؤرونور.

۴- بايراق تارتيشمالارينين دؤردونجو فايداسي، بيزه سيياسي مساله لري تارتيشمايي اؤيره تمه، دئموکراتيک دييالوق آلانيندا ورزيش و تمرين ائتمه، چوخ سسليلييه آليشما، يئکه (ماکرو) ميللي سورونلاريميز حاققيندا چئشيتلي، يئني دوشونجه لر اوره تمه، اونلارا اؤزگون چؤزوملر بولما قابيلييتيميزي گليشديرمه و بونلارين هاميسي ايله ايلگيلي، وارسا ضعف و اکسيکليکلريميزين نه لر اولدوغونو اؤيره نمه ميزه فورصت و ايمکان ياراتماسيدير. بئله بير بحثه گيريشمک، آيريجا بيزي قارشيلاشديغيميز مساله لردن قورخمامايا، لاپ ترسينه اونلارين اوستونه گئتمه يه آليشديرار. بيز بوگون گونئي آزربايجان`ين ميللي بايراغي کيمي بسيط بير قونونو تارتيشانميرساق، تارتيشماني باشارميرساق، تارتيشماق بيله ايسته ميرسه ک، ياخين گله جکده چوخ داها جيددي مساله لريميزين البتته کي ايچينده قالاجاق و بوغولاجاييق.

دئمه لي بيز بوگون جيددي گؤرونمه يه ن بايراق بحثيني، جيددي بير شکيلده اؤزوموزو اولقونلاشديرماق، گليشديرمک، مدنيله شديرمک و دئموکراتيکله شديرمک اوچون قوللانماليييق. بايراق دئموکراتيک يوللارلا سئچيلمه مه يه بيلير، آنجاق دئموکراتيک يوللارلا ياپيلان بايراق تارتيشماسي، بيزي اولقونلاشديرار، مدنيله شديره ر و دئموکراتلاشديرار. اينديليک بو بحثلر، بير سيرا سيياسي فععال و آيدينلاريميزين مدني تارتيشما آدابينا ياد و دار گؤروشلو اولدوغونو اورتايا قويسا دا، بو آجي گئرچه ک بيزي مايوس ائتمه مه ليدير. بلکه بيز بو فورصتي اؤز اکسيکليک و قوصورلاريميزي اورتايا چيخارتما، اونلاردان درس آلما، تجروبه قازانما و اونلاري گئده رمه اوچون ايشله تمله ليييک.

۵- بو بحثلرين باشقا بير ياراري، ايندييه جه ن تارتيشيلمايان، تابو ساييلان چوخ ساييدا قونونو اورتايا چيخارماسي و ديشا وورماسيدير. منجه بو يارار، باشلي باشينا بؤيوک بير قازانيمدير. اؤرنه يين، بو تارتيشمالار سيراسيندا اورتايا چيخان بير نئچه مساله بئله دير:

-گونئي`ين قوزئي`دن آيري و اؤزگون سيياسي کيملييک، سوره ج و ائحتيياجلاري اولدوغو،

-قوزئي آزربايجانلا گونئي آزربايجان`ين بير بيري ايشلرينه نه اؤلچوده و هانسي بير شرطلرده قاريشابيله جکلري،

-بيرله شيک آزربايجان`ين نئجه اولوشاجاغي، بونون گونئي مساله سيني چؤزمکده نه اؤچوده اؤنه ملي اولدوغو و نه قده ر حئسابا قاتيلماسي گره کدييي،

-ائلچي به ي`ين اؤزه لليکله گونئيله ايلگيلي دوغرو ويانليشلاري،

-حرکتده گاموح`ا دا حاکيم اولان دئسپوتلوق، اينحيصارچيليق، شخصييته پرستيش و اورتا مخرجه يئتيشمک نييتينين يوخلوغو کيمي ايلکه ل توتوم و داورانيشلارين وارليغي،

-گونوموزده کي فئدئرالچي قوروپلارين چوخونون خالقيميزين يئکه مساله لرينين نه اولدوغونو يانليش تشخيص وئرمه لري، ايران مرکزلي دوشونوب داورانمالاري، گونئي`ين اؤزگون سيياسي و ميللي سيمبوللارا صاحيب اولماسيندان قورخمالاري و بونا قارشي چيخمالاري، حتتا ٨٠ ايل بوندان قاباق اؤزونه بايراق سئچه ن آزاديستان دوشونجه سيندن ده گئريده اولمالاري، بونون ايسه اونلاري قيراقلاشديماسي (مارژيناللاشديرماسي)، حرکتين ديشينا ايته له مه سي و اونلارين حاققيندا ايرانچي اولدوقلاري شوبهه لريني ياراتماسي

-سيياسي فععاللاريميزدان بير چوخونون موطلق شکيلده تورک آزربايجان تاريخي و دؤولتلري (قاجار- افشار- صفوي؛ آغ قويونلو-قاراقويونلو-ائلدنيزلي؛ ائلخانلي-جالاييرلي-تيمورلو؛ خارزمشاهلي-سلجوقلو-غزنه لي؛ …..) حاققيندا بيلگيسيزليکلري، اونلارين ميراث، سوننت و سمبوللاريني تانيما و قورومايا اؤنه م وئرمه مه لري، بونا گره ک دويمامالاري

-سيياسي فععاللاريميزين موطلق چوخونلوغون آزربايجان تورکلرينين تورکيه، عراق و سورييه ده اولان ديياسپورالاريني هئچه سايمالاري، اونلارلا هر هانسي ميللي بير باغي حيسس ائتمه مه لري، اونلارا ياخينلاشما کيمي بير مساله لرينين اولماييشي …

مئهران باهارلي
۰۸ آگوست ۲۰۰۸