۹۰ ايل اؤنجه موستقيل دؤولتيميزي قوران محمد امين رسولزاده - صمد نيکنام
بای بک، آذربايجان | اُدگؤن, ۸-ي قئزاران , ۱۱۰۰۸ اینجی ایل, چولا ۲۲:۵۴ [آ.خ] | یازی و قوشوق
 |
. | “او آذربايجانلي پئيغمبر ايدي، اونون کيمي شخصيتي اولان ميلت خوشبختدير” سيد حسن تقيزاده محمد امين رسولزاده ۱۸۸۴-اونجو ايل آذربايجان جمهوري سينين پايتاختي باکي نين نووخاني کندينده دوغولوب. ايلک تحصيليني آتاسي آخوند حاجي موللا علي اکبر اين يانيندا آلير. سونرا ايسه روس-موسلمان و باکي پئشه مکتبيني بيتيرير. |
“او آذربايجانلي پئيغمبر ايدي، اونون کيمي شخصيتي اولان ميلت خوشبختدير”
سيد حسن تقيزاده
محمد امين رسولزاده ۱۸۸۴-اونجو ايل آذربايجان جمهوري سينين پايتاختي باکي نين نووخاني کندينده دوغولوب. ايلک تحصيليني آتاسي آخوند حاجي موللا علي اکبر اين يانيندا آلير. سونرا ايسه روس-موسلمان و باکي پئشه مکتبيني بيتيرير.
سياسي-ايجتيماعي فعاليته گنج ياشلاريندان باشلايير. او ، ۱۹۰۶-اينجي ايلده آذربايجاندا ايلک سوسيال دئموکرات تشکيلات اولان ” هوممت ” تشکيلاتي نين ياراديجيلاريندان و هوممتين اورقاني ” تکامول ” قزئتي نين باش رئداکتورو اولموشدو. نريمان نريمانوولا بيرگه نشر ائتديرديگي بو قزئت قيسا زامان سورجينده قافقازين مشهور قزئتلريندن بيرينه چئوريلير. قئيد ائتمک لازيمدير کي، رسولزاده نين ايلک يازيسي ” شرقي روسيه ” قزئتينده چاپ ائديلميشدير.
۱۹۰۹-اونجو ايل گونئي آذربايجانا و ايرانا کئچنه قدر آذربايجاندا چوخسايلي قزئتلر چيخارتميش و هوممتين رهبرليگينده ايشله ميشدير.
۱۹۰۹-اونجو ايلده گونئي آذربايجانا و ايران-ا کئچديکدن سونرا ايراندا ” ايران نو ” (يئني ايران ) آدلي ايلک اروپا تيپلي قزئت نشر ائدير و بو قزئتده يازديغي مقاله لرله فارس ادبي ديلينه يئنيليک گتيرير. حيدر عمي اوغلو و حسن تقي زاده ايله بيرليکده ” ايران دئموکرات پارتيياسي نين ” مرامنامه سيني يازير.
رسولزاده نين فاليتي ايراندا اوزون سورمور. روس دؤولتي نين تزييقي ايله تورکييه يه سورگون اولونور. 1913-جو ايلده آذربايجانا قاييدير و ميلتچي هوممتليلرله طرفيندن ياراديلميش ” موسلمان دئموکراتيک موساوات ” تشکيلاتيندا فاليته باشلايير.
۱۹۱۷-اينجي ايل فوريه اينقيلابيندان سونرا ” قافقاز و روسيه موسلمانلاري ” قورولتايينا قاتيلير. آز سونرا قافقاز پارلامئنتي ” سييئمده ” آذربايجاني تمسيل ائدير. ۱۹۱۸-اينجي ايل ” سييئم ” داغيلاندان سونرا ” آذربايجان ميللي شوراسي نين ” رهبري سئچيلير. ميللي شورا ۱۹۱۸-اينجي ايل مي آيي نين ۲۸-اينده آذربايجانين موستقيلليگيني ائلان ائدير. بئله ليکله، 34 ياشلي رسولزاده موسلمان دونياسيندا ايلک دفعه اولاراق دئموکراتيک خالق جومهوريتي نين پرئزيدئنتي سئچيلير.
محمد امين رسولزاده موستقيلليگيميزي ائلان ائتمکله ياناشي، او واختا قدر روسييا دؤولتي طرفيندن ياساق ائديلميش ” آذربايجان ” سؤزونو گوندمه گتيرير و وطنيميزين آديني اؤزونه قايتارير. رسولزادنين قوردوغو آذربايجان خالق جومهوريتي ۲ ايل ياشاسا دا، آذربايجانين موستقيلليگيني ابديلشديردي. بو معنادا کي، او واخت موستقيل دؤولت قورا بيلمه سه يديک، سونرالار سووئتلر بيرليگي ترکيبينده ده، رئسپوبليکا کيمي تمسيل اولونماغيميزا قارانت يوخ ايدي و سووئتلر بيرليگي داغيلارکن موستقيلليگيميزين برپاسي مومکون اولماياجاقدي. او ” بير کره يوکسلن بايراق بير داها يئنمز ” دئمکله بيليردي کي، بو بايراق کئچيجي اولاراق يئنديريلسه ده، گله جک نسيللر اونو باشي اوزرينده قالديراجاق و ياشاداجاقدير. ( رسولزادنين بو فيکريني چاغداش تاريخيميزده، ۱۹۸۸-اينجي ايل ايلک دفعه آذربايجانين گونئييندن اولان محمد حاتمي يئنيدن گوندمه گتيره رک، اونون يولونون دوام ائده جگيني بيلديردي ).
۱۹۲۰-اينجي ايل آپريل آيي نين ۲۵-اينده روس قوشونلاري بيزدن سورمادان سرحديميزي کئچه رک آذربايجاني ايشغال ائتدي. آذربايجان خالق جومهوريتي دئوريلدي و رسولزاده سيلاهداشلاري ايله بيرليکده حبس ائديلدي. اونو گولللنمه تهلوکه سي گؤزله ييردي. بو تهلوکه ني آرادان قالديرماق اوچون هئيدر اميوغلو سووئت آذربايجاني نين رهبري نريمان نريمانوولا گؤروشور و ” مممد امي نين باشيندان بير توک اسکيک اولماماليدير ” دئيير. بوندان سونرا نريمانوو رسولزادني باکييا (باييل تيرمه سينه ) گتيزديره رک رسمي اولاراق بيلديرير کي، مممد امين رسولزاده نين تهلوکه سيزليگيني قوروماق اوچون اونو مرکزه گتيرميشلر.
۱۹۲۰-اينجي ايل نوامبر آييندا قاتارلا طيفليسدن موسکو-يا گئدن استالين باکي-دا اولارکن واختيله اونو اؤلومدن قورتاران و کؤهنه دوستو مممد امي نين سوراغين توتور. اونون باييل توتمه سينده اولدوغونو بيلندن سونرا ستالين ، بير باشا اورايا گئدير و مممد اميني اؤزو ايله موسکو-يا آپارير. رسولزاده ايکي ايل موسکوادا خالقلار کوميسساري کيمي چاليشير و نهايت سووئتلر بيرليگيني ترک ائده رک فينلاندييا کئچير. سونرالار او تورکييه، آلمانييا و پولشادا ياشايير. ۱۹۵۵-اينجي ايل مارچ آيي نين ۶-سي آنکارا-دا وفات ائتميشدير.
موستقيل دؤولتيميزين بانيسي مممد امين رسولزاده دن بيزه موستقيل دؤولت، موستقيلليک ايدئياسي و موستقيل دؤولتيميزين تاريخيني داشييان چوخسايلي علمي، فلسفي، تاريخي و ادبي اثرلردن عيبارت زنگين بير ايرس قالميشدير. او سياسي فلسفه اوزره موتخصيص و فيکير صاحيبي ايدي. سوسياليزم و قرب اؤلکهلري نين ايجتيماي سياسي پروسئسلريني دريندن بيليردي. رسولزاده نين اثرلري اوزون ايللر مشهور عاليملرين آختاريش مؤوزوسو اولموشدور.
آذربايجان ميلتي رسولزاده نين عمللري، اثرلري و عئيني زاماندا اونون هاقدا اجنبي عاليملر طرفيندن يازيلميش اثرلرله فخر ائدير. رسولزاده شرق عالمينده 20-جي اسرين قاباقجيل و آپاريجي ضياليلارينداندير. او، عئيني زاماندا ۲۰ عصر آذربايجان دؤولتچيليگي نين هم نظري عصاسلاري نين فورمالاشديرميش، هم ده موستقيل دؤولتيميزين معماري، بانيسي و قوروجوسودور.
رسولزاده و فيکيرداشلاري ميللي معنوي ديرلر باخيميندان آذربايجانين ان زنگين و کوبار چاغلاريندا يئتيشميشدي. ميلت بو شخصيتلري يئتيرمکله اونلاردان اؤز خيلاصيني گؤزله ييردي و اونلار ميلتين خيلاصکارينا چئوريلدي. رسولزادنين قوردوغو آذربايجان خالق جومهوريتي دؤورونده، اينسانلار وطنداش هوقوقوندان و فردي آزادليقدان فايدالاناراق، سربست سياسي و ايجتيماي فاليت گؤسترميشلر.
رسولزاده و اونون ميللي کادر اوردوسو بؤيوک اخلاق، فزيلت و کامال صاحيب ايدي.
رسولزاده دؤولتينده روشوت، کورروپسييا، خالقين و دؤولتين املاکينا خور باخان دؤولت و هؤکومت آدامي اولماميشدي. ميلتين معنوي زنگينليگي ايله اؤيونن مممد امين رسولزادنين کابينه سي و ميللي کادر اوردوسو و دؤولت آداملاري بو زنگينليکدن يوغورولان شخصيت صاحيبي ايديلر. ميلتي ، يالنيز مممد امين رسولزاده کيمي عاليم، عاديل و عاليجناب شخصيتلر قورتارا بيلر.
معنوي زنگينليگي، دوهاسي، ذکاسي و عاليجنابليغي ايله بوتون موحيطينه تاثير ائدن، حتّی قونشو اؤلکه لرين ضياليلاريني موتاثير ائدن بو شخصين يئري و رولو ۲۰-اينجي اسر دؤولتچيليک تاريخيميزده عوض اولونمازدير.
۲۸/۰۵/۲۰۰۸
٫بير ميللتين سسي
پایلاش | پرینت
بورا باغلي يازيلار:
- قاراباغدا يول وئريلن سهولري باتی (غربی) آذربايجاندا تکرار ائتمک اولماز - صمد نيکنام
- ” قاراباغدا يول وئريلن سهولري غربي آذربايجاندا تکرار ائتمک اولماز” يازيسي نين مؤليفي حؤرمتلي ن. صمد بئيه! - تيمور امينبئيلي
- “دونيانين هاراسيندا بدبخت بير آدام گؤرسن بيل کي همشهريدير” (۱) - صمد نيکنام
- “دونيانين هاراسيندا بدبخت بير آدام گؤرسن بيل کي همشهريدير” (۲) - صمد نيکنام
- “دونيانين هاراسيندا بدبخت بير آدام گؤرسن بيل کي همشهريدير” (۳) - صمد نيکنام
- “دونيانين هاراسيندا بدبخت بير آدام گؤرسن بيل کي همشهريدير” (۴) - صمد نيکنام
- نه قدر يازيرساندا بو دؤنيا دؤزلمير کي دؤزلمير! (۵) - صمد نيکنام
- گونئي آذربايجاني ائلچي بئي سيندروموندان قوروياق - صمد نيکنام
- قارا اولدوز ! - صمد نيکنام
- آذربايجان و تورکيه (۱) - صمد نيکنام
http://www.baybak.com
بای بک سایتیندان پرینت اولوب
http://www.11008.baybak.com/il_11008_say_144.azr
یازینین اینترنت آدرسی
گوروش کاپانیبدی