ايفطار ضيافتينده حبس ائديلن آذربايجانلي فعاللارين هارادا ساخلانديقلاري بللي دئييل
بای بک، آذربايجان | یئیگؤن, ۲۲-ي زومار آی , ۱۱۰۰۸ اینجی ایل, چولا ۱۳:۱۶ [آ.خ] | ایچ ساولار
 |
. | باشقا مهبوسلار
خاطيرلاتماق لازيمدير کي مهبوسلارين عاييله لري و اينسان هوقوقلاري مودافيعه چيلري نين ايران تلوکه سيزليک گوجلري طرفيندن حده-قورخولارا معروض قالديقلاري اوچون، ايران زيندانلاريندا حبسده اولان اونلار آذربايجانلي نين حاقيندا دقيق معلومات الده ائتمک مومکون دئييلدير. بو ندنله آذربايجان سياسي مهبوسلاريني مودافيعه کوميته سي، آسمک، ياييملاديغي راپورلارين دقيق، آنجاق کاميل اولماديغيني بيلديرير. يوخاريدا قئيد اولان آدلاردان علاوه حالي حاضيردا حبسده اولانلارين آدلاري آسمئک-اين دقيقلشديرديگي بيلگيلره گؤره بونلاردير؛ |
چرشمبه گونو ۲۰۰۸ سپتامبرين ۱۰-اوندا گونئي آذربايجانلي تانينميش سياسي مهبوس عباس ليساني-نين عاييله سي شرفينه وئريلن ايفطار قوناقليغيندا عباس ليساني-نين حيات يولداشي روقيه ليساني و اؤولادلاري سئودا، آتلا و اوختاي داخيل اولماقلا تقريبن ۲۰ آذربايجانلي حبسه آلينيب. حبسه آلينانلار گونئي آذربايجانين يازار، ژورناليست، طلبه و مدني فعاللاريدير.
بو ساعاتا قدر حبسه آلينانلاردان، ۱ ايله ياخيندير نشرينه قاداغا قويولموش “ديلماج” درگيسي نين باش رئداکتور و ايمتيياز صاحيبي، ژورناليست و يازار موهنديس عليرزا صرافي، ژورناليست و يازار موهنديس حسن راشدي، ژورناليست و يازار اکبر آزاد، “ياشماق” درگيسي نين رئداکتورو، شاعير سعيد موغانلي، خويلو عباس نعيمي، “آذربايجان گنجلر ائوي”نين کئچميش سدري، شاعير اکرم نجاري (عباس نيمي- نين حيات يولداشي)، آذربايجان تورکجه سي موعليمي اردبيللي مهدي نيمي، “اولوس” طلبه درگيسي نين باش رئداکتورو حسين حيدري، فرهاد رضايي، شهباز ابراهيم زاده، محمد عباسپور، رباب عظيمي گرگري، يوسف هشيار و ايفطار قوناقليغينا ائو صاحيبليگي ائدن صياد محمديان-اين (اووچو) آدلاري دقيقلشيب.
توتولانلاردان عباس ليساني-نين عاييله سي نئچه ساعات سونرا سربست بوراخيلسالار دا ديگر توتولانلارين هانسي ايتتيهاملا توتولمالاري و هارادا ساخلانديقلاري ايله علاقه لي معلومات يوخدور.
کرج شهرينده ياشايان آذربايجانلي اينسان هوقوقلاي مودافيعه چيسي حسن رحيمي بيات ايسه جومه آخشامي سپتامبرين ۱۰-اوندا کرج-ده توتولوب. حسن رحيمي سون ۲ آيدا توتولان آذربايجانلي طلبه لر حاقيندا راپورلار حاضيرلاييب، راديو “فردا” و آمئريکا سئسي فارسجا بؤلومو تي.وي-سينه موصاحيبه وئرميشدي. موهنديس رحيمي ميياناليدير و کرج شهرينده ياشايير.
حبسه آلينانلارين آراسيندا “وارليق” درگيسي نين يازارلاريندان دا گؤرونمکده دير. عليرزا صرافي، حسن راشدي و اکبر آزاد ايراندا ان اوزون نشر سابيقسه اولان تورکجه قزئت و بوتون تورک ديللي اؤلکه لرده تانينان وارليق درگيسي نين نشره باشلاديغيندان بري بو درگي نين يازارلار هئيتينده اولوبلار. موهنديس عليرزا صرافي آيريجا ايران هؤکومتي طرفيندن نشرينه سون قويولان “ديلماج” آيليق درگيسي نين ايمتيياز صاحيبي و باش رئداکتورودور. صرافي عئيني زاماندا تورک ديلي و فولکلورو موعليمي، سياسي آکتيويست و اينسان هوقوقلاي مودافيعه چيسي کيمي ده تانينماقدادير.
موهنديس حسن راشدي و اکبر آزاد وارليق درگيسيندن علاوه “کيهان هوايي” قزئتي طرفيندن نشر ائديلن “يول” درگيسي، “يارپاق”، “نويد آذربايجان” و ” اوميد زنجان” کيمي قزئتلئرين ده يازارلاريندان اولوبلار. اونلار آذربايجان اوشاقلارينا چئشيدلي پروقراملار حاضيرلايان “چيچکلر” قورولوشو-نون تسيسچيلريديرلر. ۵۵ ياشلي حسن راشدي “ديليميزين ساده قرامئري” و “تورک ديلي و اونون ايرانداکي مؤوقئيي” (فارسجا) کيتابلاري نين يازاريدير. حسن راشدي مي ۲۰۰۶ (خرداد ۱۳۸۵ - باي بک) ٫ “ايران” قزئتينده آذربايجانليلاري تهقير ائدن مقاله و کاريکاتورايا قارشي کوتلوي اعتيراضلاردان سونرا دا ۳ آيا ياخين حبس ائديليب و سونرا وثيقه قارشيسيندا سربست بوراخيلميشدي.
“فرنگيز ايله قيرميزي دون” (اوشاقلار اوچون) کيتابي نين يازاري اکبر آزاد ايسه جولاي ۲۰۰۴-اونجو ايلده آذربايجانليلارين بزز (بابک) قالاسينداکي يورويوشونده ايشتيراک ائتديگي اوچون گؤزالتينا آلينيب، ۶۷ گون ايشکنجه ائديله رک اهر، تبريز و تئهراندا ايران اطلاعات مأمورلاري طرفيندن سورغو سوالا چئکيلميشدي. او وثيقه قارشيليغيندا سربست بوراخيلديقدان سونرا اينقيلاب محکمه سي طرفيندن ۱ ايل و تجديد نظر محکمه سينده ۴ آي حبس جزاسينا محکوم اولدو. آزاد هپ سوره سي نين قالان قيسمي ايله الاقيلي اوکتيبر ۲۰۰۶-اينجي ايلده اهر زيندانينا گؤندريلدي.
سپتامبر ۱۰ و ۱۱-اينده توتولانلارين آراسيندا داها اؤنجه حبس سابيقه لري اولان ساده جه حسن راشيدي و اکبر آزاد دئييل؛
- “يارپاق” قزئتي نين کئچميشده کي و “ياشماق” درگيسي نين اينديکي رئداکتورو شاعير و ژورناليست سعيد موغانلي (محمدي) دا نئچه دفعه ، او جومله دن دسامبر ۲۰۰۲ و آپريل ۲۰۰۴-اونجو ايلده گؤزالتينا آليناراق ايران اطلاعات مأمورلار طرفيندن هفته لر سورغو سوالا چکيليب. سعيد موغانلي سون آيلاردا گونئي آذربايجان شاعيرلري آراسيندا مئديا واسيطه سي ايله کئچيريلين “قيزيل آلما” شعر فئستيوالي نين بيرينجيسي اولموشدو.
- تئهران شهرينده ياشايان قوشاچايلي (مياندواب) ميللي آکتيويست صياد محمديان (اووچو) دسامبر ۲۰۰۳-اونجو ايلده ايران اطلاعاتي مأمورلارين طرفيندن توتولوب و ۲ هفته يه ياخين ايران تهلوکه سيزليک حبسخاناسيندا ساخلانيلميشدي. سپتامبرين ۱۰-اوندا وئريلن ايفطار قوناقليغينا تئهرانين نواب کوچه سينده ائو صاحيبليگي ائدن محمديان-اين ائويني تهلوکه سيزليک گوجلري تفتيش ائديب و اونون بيلگيسايار و بعضي باشقا اشياسيني آپاريبلار.
- آذربايجان تورکجه سي نين موعليمي، شاعير و مدني-سياسي آکتيويست اردبيللي مهدي نعيمي آپريل ۲۰۰۵-اينجي ايلده اطلاعات مأمورلاري طرفيندن توتولوب و ۱۲ گون حبسدن سونرا وثيقه قارشيليغيندا سربست بوراخيلميشدي.
سون ايکي آيدا توتولان طلبه لر
چرشمبه و جومه آخشامي ايرانين تئهران و کرج شهرلئرينده تقريبن ۲۰ آذربايجانلي نين حبسه آلينماسي ايله سون ۲ آيدا ايراندا حبسه آلينان آذربايجانلي يازار، ژورناليست، اينسان هوقوقلاري مودافيعه چيسي و طلبه لرين ساييسي ۲۵ نفري آشيب.
جولاي-ين ۱۷-سيندن بري ان آزي ۱۰ آذربايجانلي طلبه حبس ائديليبلر. حبس ائديلنلردن ساده جه ودود اسدي و شاهرخ حاتمي سربست بوراخيبلار و ديگر ۸ طلبه عاييله لري ايله گؤروش ايمکاني و وکيلله تامين اولمادان ايران اطلاعات-ي نين حبسخانالاريندا ساخلانيليرلار. مهبوسلارن عاييله لري اونلارا تطبیق اولان احتيمالي ايشکنجه لره گؤره نييارانچيليقلاريني بيلديريبلر. جولاي-ين ۱۷-سينده تبريز اونيوئرسيتئتينده توتولان سجاد رادمهر، فراز زهتاب، آيدين خواجه اي و داريوش حاتمي (ائلچين)، آگوستون ۲۰-سينده حبسه آلينان منصور امينيان و مقصود عهدي، آگوستون ۱۳-اونده تبريزده توتولان امير مرداني و آگوستون ۳۱-اينده خوي شهرينده توتولان مجيد ماکويزاد-اين (ائليار خويلو) عاييله لري ايرانين محکمه حاکيميتي نين سدري آيت الله هاشمي شاهرودي-يه آچيق مکتوب يازيبلار. عاييله لر مهبوسلارا ياخينالري ايله گؤروشمه و وکيلله تامين اولما حاقي ايسته ييبلر.
باشقا مهبوسلار
خاطيرلاتماق لازيمدير کي مهبوسلارين عاييله لري و اينسان هوقوقلاري مودافيعه چيلري نين ايران تلوکه سيزليک گوجلري طرفيندن حده-قورخولارا معروض قالديقلاري اوچون، ايران زيندانلاريندا حبسده اولان اونلار آذربايجانلي نين حاقيندا دقيق معلومات الده ائتمک مومکون دئييلدير. بو ندنله آذربايجان سياسي مهبوسلاريني مودافيعه کوميته سي، آسمک، ياييملاديغي راپورلارين دقيق، آنجاق کاميل اولماديغيني بيلديرير. يوخاريدا قئيد اولان آدلاردان علاوه حالي حاضيردا حبسده اولانلارين آدلاري آسمئک-اين دقيقلشديرديگي بيلگيلره گؤره بونلاردير؛
- عباس ليساني، گونئي آذربايجانين تانينميش سياسي و مدني آکتيويستي عباس ليساني، ژوئن ۲۰۰۶-اينجي ايلدن بري حبسده دير، او حبس ائديلنلندن سونرا معروض قالديغي باسقيلاردان دولايي دفعه لرجه اوزون سوره لي آجليق آکسيايالاري کئچيريب. ۲۰۰۸ مارچ-ين ۶-سيندا حيات يولداشي و ۳ اؤولادي ياشايان آذربايجانين اردبيل شهريندن تخمينن ۲۰۰۰ کيلومتر اوزاقدا اولان ايرانين يزد شهرينده کي حبسخانايا کؤچورولوب. روقيه ليساني ۲۰۰۸ مارچ آييندا حيات يولداشيني گؤرمک اوچون ۱۳، ۱۰ و ۹ ياشلاريندا اولان اوشاقلاري ايله بيرليکده يزد شهري نين زيندانينا گئتديکلريني آنجاق ساعاتلار اينتيظاردان سونرا ساده جه ۱۰ دقيقه گؤروشه بيلديکلريني آسمک-ه بيلديريب. اونون دئديگينه گؤره آنجاق کيچيک اوشاغين آغلاماسي سببي ايله گؤروشه ايمکان وئريليب. بو آغير شرطلرين ندني ايله ۶ آيا ياخيندير باشقا مولاقات گئرچکلشمه ييب.
- مهدي نوري (ائلمان)، سولدوز اؤزئل آزاد اونيوئرسيتئتي’نين طلبه سيدير. مي ۲۰۰۶ اعتيراضلاري ايله ايلگيلي سولدوزدا (نقده) توتولوب و ۸۰ گون ايشکنجيله بيرليکده سورغو سوالا چکيلديکدن سونرا سربست بوراخيلدي. مهدي نوري آزادليقدان سونرا محکمه طرفيندن ۲ ايل حبسه محکوم ائديليب و ۲۰۰۷ مي-ين ۸-اينده توتولاراق تکرار زيندانا گؤندريلدي. ايندي ايسه تبريز زينداني نين مالي بؤلمه سينده ساخلانيلير.
- احمد حسين پور، آگوستون ۳۰-اوندا تبريزده توتولوب و هارادا ساخلانيلديغي بللي دئييل.
- حميد رستمي (آرغيش)، ۲۰۰۸ مي آييندا خوي زيندانينا گؤندريليب، “قارلي ارک” و “… و سئنين هئکايه لريم” آدلي هئکايه توپلولارين يازاري و ژورناليست حميد آرغيش ۲۰۰۷ فوريه نين ۲۱-اينده دونيا آنا ديلي گونو آکسييالاريندا ايشتيراک ائتمک ايسته ديگي اوچون موهاکيمه اولوب! باتي آذربايجان محکمه سي طرفيندن اونا وئريلن حؤکمده ۱ ايل حبس و ۲ ايل بيجار شهرينه سورگون ائديلمئيه محکوم ائديله رک، ۳ ايل بويونجا بوتون اثرلر و يازيلاري نين نشرينه قاداغا قويولوب.
- حجت الاسلام عبدالعزيز عظيمي قديم، ۲۰۰۸ مي-ين ۲-سينده قوم شهري نين لنگرود زيندانينا گؤندريليب. او دين آداميدير و بوندان اؤنجه تبريز، اردبيل و قوم شهرلرينده ان آزي ۴ دفعه حبس ائديليب.
- عارف علوفي ۲۰۰۸ مي-ين ۳۱-اينده اورميه زيندانينا گؤندريليب، نخجوان اونيوئرسيتئتي نين طلبه سيدير، ۲۰۰۷ فوريه نين ۲۱-اينده دونيا آنا ديلي گونو آکسييالاريندا ايشتيراکي اوچون موهاکيمه اولوب.
- ابراهيم جعفرزاده ژوئن-ين ۲۱-اينده خوي زيندانينا گؤندريليب، خوي شهرينده فعاليت ائدن “اورين” غئيري هؤکومت تشکيلاتي نين سدري اولوب، سياسي و مدني فعاليتلري اوچون ۱۹۹۹-اونجو ايلدن بري ان آزي ۷ دفعه حبس ائديليب، سون دفعه ۲۰۰۷ فوريه-نين ۲۱-اينده دونيا آنا ديلي گونو آکسييالاريندا ايشتيراک ائتمک ايسته ديگي اوچون موهاکيمه اولوب! باتي آذربايجان محکمه سي طرفيندن اونا وئريلن سون حؤکمده، ۱ ايل حبس و ۲ ايل ايران-اين گونئيينده يئرلشن برازجان شهرينه سورگون ائديلمئيه محکوم ائديله رک بوتون سياسي-ايجتيماي فعاليتلرينه ۳ ايل، ميلت وکيلليگي و شهر شورالاري سئچيملرينده ناميزدليگينه ايسه بير دؤنم (۴ ايل) قاداغا قويولوب.
- ابراهيم رشيدي (ساوالان)، ۲۰۰۸ آگوستون ۵-اينده اورميه زيندانينا گؤندريليب، شاعير و يازاردير. آذربايجان طلبه هرکاتيندا اؤنملي رولو اولان ابراهيم رشيدي اورميه اونيوئرسيتئتي نين مکانيک موهنديسي فاکولته سي نين مأذونو “آذر تورپاق” غئيري هؤکومت تشکيلاتي نين قوروجوسو، اورمييه اونيوئرسيتئتي نين “اوستاد شهريار” درنگي نين سدري، “اولدوز”، “بولود”، “باخيش” و “اويانيش” درگيلري نين رئداکتورو اولوب. کئچميشده ده ان آزي ۵ دفعه اورميه، تهران، اهر و اردبيل شهرلري نين حبسخانالاريندا ساخلانيليب.
- محمد نصيري، ۲۰۰۸ آگوست آييندا ۶ آي حبس سوره سينه چکمک اوچون، باتي آذربايجانين ماکي شهرينده زيندانا گؤندريليب.
- علي عباسي، اردبيل زيندانيندا.
آذربايجان سياسي مهبوسلاريني مودافيعه کوميته سي، آسمک، ايران هؤکومتي نين آذربايجانلي مدني-سياسي آکتيويستلر، يازارلار، ژورناليستلر، اينسان هوقوقلاري مودافيعه چيلري و طلبه لرين حبسه آلينماسيني بين الخالق قانونلارين علئيه اينه اولاراق ديرلنديرير. آسمک-ه داخيل اولان معلوماتا اساسن مهبوسلارين عاييله لري اونلارين حاقيندا هر هانسي معلومات بوراخماماق اوچون قورخودولوبلار. تبريز اونيوئرسيتئتي نين طلبه سي منصور امينيان-اين عاييله سينه هر هانسي قزئت و راديويا موصاحيبه وئرديکلري تقديرده داها آرتيق باسقيللارلا اوزلشه جکلريني دئييبلر.
قورخودولان عاييله دن مئديا طرفيندن موراجيعت اولوناندا “هر هانسي بير ياخينلاري حبسه آلنماييب” شکلينده دانيشماقلاري ايسته نيلير. آسمک گؤز آلتينا آلينانلاردان نئچه سي نين وکيلله تامين اولماديقلاري و اعتيراف وئرمک اوچون ايشکنجه يه معروض قالديقلاريني تسبيت ائديب. اونلارين هاميسي نين بنزر دورومدا اولدوقلاري تخمين ائديلير. آسمک ايران هؤکومتي و محکمه لر مسئوللاريني بين الخالق قانونلار و ايران دؤولتي نين ده قول چکديگي اينسان هوقوقلاري آنلاشمالارينا اويماغا چاغيرير.
بوتون سياسي و عقيده مهبوسلاري نين آزادليغي ديلگي ايله
۱۲ سپتامبر ۲۰۰۸
آذربايجان سياسي مهبوسلاريني مودافيعه کوميته سي – آسمک
٫بير ميللتين سسي
پایلاش | پرینت
بورا باغلي يازيلار:
- گزارش آسمک از بازداشتهای اخیر در شهرهای آذربایجان
- آذربایجانیها در ایران به خاطر برگزاری مراسمها و مناسبتهای ملی خود بازداشت و مورد شکنجه قرار می گیرند
- گزارشی از وضعیت زندانیان سیاسی و عقیدتی در آذربایجان
- د.ا.ک رهبرليگي گونئي آذربايجان تشکيلاتلاري نين تمسيلچيلري ايله گؤروش کئچيرميشدير
http://www.baybak.com
بای بک سایتیندان پرینت اولوب
http://www.11008.baybak.com/il_11008_say_1159.azr
یازینین اینترنت آدرسی
گوروش کاپانیبدی